| Llongyfarchiadau i'r Aelwyd sydd newydd gael ei ffurfio ar gyfer disgyblion blwyddyn 7, 8 a 9 yn Aberystwyth - Abercadabra (Uwch Adran yr Urdd Bro Aberystwyth) ar ennill y wobr gyntaf yn Eisteddfod Sir yr Urdd yn Llanbedr Pont Steffan ar y parti deulais o dan 14 oed. Dyma'r tro cyntaf i'r parti (a hyfforddwyd gan Mari Rhian Owen a Jeremy Turner) gystadlu, ac maent wrth eu bodd gyda'r wobr! Bydd y parti yn mynd ymlaen yn awr i Eisteddfod Geendlaethol yr Urdd yng Nghaerfyrddin ym mis Mai. Daeth yr un parti yn ail yn y gystadleuaeth parti llefaru (fe'u hyfforddwyd gan Non Walters a Gwenan Creunant) a byddant hwy hefyd yn mynd ymlaen i Gaerfyrddin. Cafwyd llwyddiant hefyd i'r aelwyd yng nghystadleuaeth y ddeuawd, lle cafodd Megan Seira a Megan Haf y wobr gyntaf.
Dywedodd Cadeirydd y pwyllgor greodd yr Uwch Adran, Mr Brian Davies: Rydym wrth ein bodd gyda'r canlyniadau. Hwn oedd y tro cyntaf i ni gystadlu, ac fe lwyddon ni mewn cystadlaethau o safon uchel! Ond nid cael ei sefydlu er mwyn cystadlu yn yr Urdd a wnaeth yr Uwch Adran; yn hytrach, rydym wedi trefnu pob math o weithgareddau Cymraeg i'r aelodau, ac ar ôl yr Eisteddfod, yn ystod nosweithiau'r haf, gobeithiwn dreulio mwy o amser yn gwneud gweithgareddau awyr agored. Gobeithiwn yn fawr y bydd mwy o aelodau am ymuno â ni flwyddyn nesaf." Am ragor o wybodaeth ynglŷn ag Aelwyd Abercadabra, cysylltwch gyda Brian Davies 01970 617351 / 07794 010 831 neu Jeremy Turner 01970 636579 / 07791 951244.
 | 
