Er ei sefydlu ym 1979 mae StrataMatrix wedi ymwneud ag ymron â phob agwedd o fywyd Cymru ac mae'r cwmni wedi bod yn rhan o amryw o'r datblygiadau allweddol sydd wedi cymeryd lle yn ystod y chwarter canrif ddiwethaf wrth i Gymru ailddarganfod ei hun.
Does dim dwywaith i StrataMatrix arloesi dros y blynyddoedd yn arbennig yn y defnydd creadigol o'r Gymraeg ym myd cyfathrebu.
Yn ôl Cadeirydd a sylfaenydd y Cwmni, Wynne Melville Jones, y nod o'r cychwyn oedd llanw bwlch drwy ddarparu gwasanaeth cyflawn proffesiynol a deallus yn ddwyieithog ym maes cysylltiadau cyhoeddus a marchnata.
"Roeddem yn arloesi yn 1979 am mai ni oedd y cwmni Cymraeg cyntaf yn y maes ond roedd yn gyfnod o gyffro yng Nghymru yn sgîl dros ddegawd o ymgyrchu brwd a lwyddodd i ddenu mwy a mwy o sylw a hawliau i'r iaith Gymraeg.
Mae'n anodd dychmygu heddiw, ond roedd yr hinsawdd yn wahanol iawn ar ddiwedd y saithdegau a hynny yn y dyddiau cyn sefydlu S4C, cyn deddfwriaeth y Ddeddf laith a chyn i fawr o neb freuddwydio y byddai yna gamau sylweddol wedi eu cymryd i sicrhau Cynulliad Cenedlaethol i lywodraethu'r wlad yng Nghaerdydd.
Roeddem ni y pryd hwnnw yn gorfod perswadio'n cleientiaid i ddefnyddio'r Gymraeg yn ogystal â'r Saesneg.
'Fel mae Cymru wedi newid a datblygu mae StrataMatrix wedi ymateb ac wedi bod yn hyblyg i addasu a newid i ateb gofynion newydd dros y blynyddoedd", medd Wynne.
Fe gyrhaeddodd y Cwmni garreg filltir arbennig yn 2002 drwy gael eu cynnwys o fewn yr 20 uchaf ar restr y cwmnïau twf "Fast Growth Top 50".
Er i StrataMatrix dyfu ac esblygu ac agor swyddfa yn y Bae yng Nghaerdydd y mae'r pencadlys yn dal yn Aberystwyth ac yn sicr mae wedi cyfrannu at roi Aber ar y map.
"Rydym ar un olwg yn cael y gorau o ddau fyd ond mae cadw'r brif swyddfa yn Aberystwyth wedi bod yn bolisi bwriadol sy'n rhan bwysig o'r rheswm dros ein llwyddiant", medd Wynne.
O greu delweddau, hyrwyddo negeseuon, cynhyrchu taflenni, posteri a hysbysebion, monitro gwleidyddol a lobïo, trefnu digwyddiadau, mynychu arddangosfeydd a sioeau ym Mhrydain ac Ewrop, bwydo straeon i'r wasg a'r cyfryngau, llunio adroddiadau, cyflwyniadau, mae'r cyfan a mwy yn rhan o waith beunyddiol StrataMatrix.
Mae gan y Cwmni dîm o bobl yn Aberystwyth sy'n treulio'r diwrnod yn cribo'u ffordd drwy holl bapurau newydd sy'n cael eu cyhoeddi yn Nghymru, 120 ohonynt, er mwyn darparu gwasanaeth monitro'r wasg i gleientiaid ledled y wlad.
Cig, caws, dŵr, sment, crefydd, amlosgfa, yr amgylchedd, ysbytai, llyfrau, colegau, gwyliau banciau, ffermio, hyfforddi, gwestai, diwydiant, elusennau, datblygu economaidd, cadwraeth, gwleidyddiaeth, iechyd, chwaraeon, fferyllfeydd, archfarchnadoedd, telegyfathrebu, hyfforddiant, llyfrgelloedd, teledu, ymgyrchoedd cymunedol, pwerdai meysydd a oedd i gyd yn rhan o weithgaredd StrataMatrix dros y chwarter canrif ddiwethaf.
Mae'r amrywiaeth yn fawr, mae'r cyffro mor fyw ag erioed a hynny yn bennaf am fod gan y Cwmni dîm arbennig o bobl yn gweithio yn y swyddfeydd yn Aberystwyth a Chaerdydd.
Ac am y dyfodol. "Wel, creu mwy fyth o gyffro am y chwarter canrif nesaf a cheisio cael mwy a mwy o bobl i ddeall beth yn y byd yw PR", yn ôl Wynne Melville Jones.
