'Cinio gawn yn Kinnegad,' meddai Iwan Morgan sy'n medru cynganeddu, wrth gwrs. Rhai yn cymryd powlen o gawl tra roedd eraill yn ymestyn am ginio rhost!

Cafwyd dau gwis ar y bws i ddifyrru'r amser. Roedd llawer o sgoriau uchel. Idris Lewis a Gareth Jones [Banc] oedd yr enillwyr ar y cwis cyntaf ac roedd Iwan Morgan, Gwynli, Gwen a Ieuan Edwards ar y brig yr eildro a hefyd Huw Dafydd a Rhian a Dafydd a Mair, Faeldref.

Cyrraedd Galway o gwmpas 4.30 a chyfle i bawb ymlacio wedi siwrnai go faith. Gwesty braf a'r staff i gyd yn fynwesol.

Y Gwyddelod yn dathlu Calan gaeaf ac amryw yn cwyno fod 'na sŵn yn y stryd tan oriau man y bore.

Dydd Iau
Pawb yn rhydd drwy'r bore. Y merched wrth eu boddau gan fod yma siopau gwerth chweil. Ymweld ag ysbyty leol dros yr awr ginio a rhoi cyngerdd u rhyw hanner awr. Llawer wedi mwynhau, gan gynnwys aelodau'r côr am fod yna acwstig gwych yn y cyntedd.

Teithio wedyn i gartref henoed a difyrru'r trigolion am rhyw hanner awr. Pawb ond un ohonyn nhw wedi mwynhau! Ond roedd y croeso yn gynnes iawn a'r cyngerdd yn un cofiadwy - er nad oedd y piano gystal yn fan hyn! Roedd y metron wedi plesio'n arw.

Dydd Gwener
Pawb yn rhydd i grwydro. Manteisiodd rhyw hanner dwsin ar gyfle i ymweld ag un o ynysoedd yr Aran. Bu rhai eraill yn cario bagiau i'r gwragedd!

Cyngerdd min nos yn Eglwys St Ffransis ar y cyd â Hoga'r Bonc o ardal Bethesda. Y lle yn orlawn - rhyw 400 yno siŵr o fod. Acwstig gwych eto a'r côr ar ei orau. Bili ac Iwan yn cael derbyniad gwresog iawn a'r diweddglo, ar y cyd â 12 o Hogia'r Bonc, yn wefreiddiol - fel ag yr oedd y cyfle i ganu'r ddwy anthem. Gwerthwyd pob CD oedd gennym ni a Hogia'r Bonc.

Dydd Sadwrn
Diwrnod o ymlacio cyn cychwyn am Eglwys Na Forbacha yn y Gaeltacht lle maen nhw'n siarad Gwyddeleg fel iaith bob dydd. Yr eglwys yma hefyd yn llawn a'r gynulleidfa yn wresog eu hymateb. Ieuan Edwards a Gareth Jones yn swyno fel y gwnaeth Iwan gyda'i gerdd dant a Bili a ganodd un gan yn y Wyddeleg. Cyngerdd gwych arall.

Cyfle i gymdeithasu wedyn a chael tamaid i'w fwyta yn Tigh Pairaicin. Aeth yn gymanfa yn y fan honno am sbel cyn i tachograff Wmffra orfod rhoi taw ar y gyfeddach, a hithuau'n hanner nos!

Dydd Sul
Gadael Galway am 10.30. Paned yn Afulone am 12.30 a chyfle i stopio mewn canolfan siopa [eto fyth] yn Dundrum, rhyw hanner awr o'r porthladd. Y merched wrth eu bodd a'r dynion yn gwneud eu gorau i wenu! Taith gofiadwy arall! Diolch yn fawr i Aled Morgan Jones am ein harwain mor ddeheuig ac i Idris Lewis am ei gyfeilio medrus. Diolch i Wmffra am ei ddreifio gofalus ac i Bili'r conductor prysur. Diolch i bawb a gyfrannodd mewn unrhyw fodd i wneud y daith yn un mor llwyddiannus.