Cefndir : Yn wreiddiol o Sir y Fflint, mab i blismon yn Nyserth a wedyn Penyffordd ger Caer. Ar ôl treulio fy holl yrfa yn Lloegr mi ddychwelais i ymddeol i Harlech.

Hoff le: Does dim dwywaith amdani - Harlech a'r ardal o gwmpas.

Hoff liw: Coch fel ar fynwes robin goch.

Hoff fwyd: Gwledd i bedwar mewn ty bwyta Tseineaidd.

Hoff ddarn o gerddoriaeth: Yr ail gonsierto i biano gan Rachmaninov.

Pa adeg o'r dydd sydd orau gennych:Yn y bore pan rydw i'n llawn o nerth.

Pa fath o ganu fyddwch chi'n ei hoffi?Côr meibion. Dwi'n aelod ffodus iawn o gôr ardderchog 'Cantorion Colin Jones'. Rydan ni'n ymarfer dwy waith y mis ym Metws y Coed.

Beth ydych chi'n ei gario efo chi?Waled, gan gynnwys y cardiau plastig, dipyn bach o arian a goriadau.

Hoff amser o'r flwyddyn?Dwi'n mwynhau bob tymor, ond yn arbennig yr hydref gyda'r lliwiau tlws ar y coed.

Hoff anifail:Pob aderyn bach sy'n ymweld â fy ngardd.

Beth wnaech chi efo £5,000? Buaswn yn ei roi i elusen debyg i 'Ty Gobaith yng Nghymru'.

Sut ydych chi'n hoffi treulio eich oriau hamdden?Yn canu'r piano, yn cyfansoddi, darllen llyfrau Cymraeg (fel Barti Ddu!), garddwriaeth, chwarae golff, a cherdded yn y mynyddoedd.

Pa atgofion sydd gennych o fod yn yr ysgol?

Atgofion hapus iawn. Dwi'n cofio torri ffenestr efo pêl griced a chael tair ergyd ar fy mhen ôl.

Pryd ac ym mhle y buoch chi hapusaf?Pan fum i'n gyrru i weld fy nghyntafanedig, Susan, yng nghartref mamolaeth Stockton-on-Tees. Roeddwn yn canu'n braf ac roedd fy nghalon yn llawen iawn.

Pwy ydych chi'n ei edmygu yn yr ardal hon?Yr arlunydd Rob Piercy o Borthmadog. Mae o'n peintio lluniau hardd iawn.

Pwy yw eich arwr?John F. Kennedy. Dwi'n dal i gofio'n fanwl am ddydd ei lofruddiaeth.

Beth sy'n eich blino chi neu yn eich gwylltio chi?Rhaid i mi fod yn onest, pobl sy'n mynnu bod newydd-ddyfodiaid yn dysgu Cymraeg. Mater i'r unigolyn yw beth y mae'n dewis ei wneud efo'i fywyd. Fy newis personol i oedd dysgu'r iaith.

Tasech chi'n mynd allan i ginio, pwy fase'n cael dod efo chi? Anne, fy ngwraig, wrth gwrs, a'r teulu. Mae gennyf bedwar o wyrion bywiog.

Beth fyddech chi yn ei gael i fwyta?Rhywbeth efo sglodion, a Spotted Dick wedyn efo cwstard.

Sut y buasech yn disgrifio chi eich hun ar hyn o bryd?Yn lwcus, lwcus iawn yn cael mwynhau iechyd da, gwraig annwyl a theulu cariadlon.