Ers cychwyn y fenter cafwyd cyfraniadau o bob math gan wahanol bobl o'r ardal ac o ffwrdd. Daeth nifer o hanesion difyr, atgofion gan hwn a'r llall, darnau o destun a nifer helaeth iawn o luniau. Rydym yn ddiolchgar iawn amdanynt.

Daeth nifer dda o drigolion a chyn-drigolion Talsarnau i'r cyfarfod lansio i fwynhau ac i gael rhagflas o gynnwys y safle. Wrth gyflwyno, dywedodd Hefin Williams fod y safle hwn yn unigryw yn yr ystyr mai trigolion yr ardal sydd yn gyfrifol am fwydo gwybodaeth ac i gynnal a chadw a gwneud newidiadau i'r safle yn ôl y galw. Safle we gymunedol yng ngwir ystyr y term.

Ar ôl y cyflwyniad cafodd pawb gyfle am baned a sgwrs ac roedd awyrgylch braf cartrefol yn bodoli a chyfle i'r hen a'r ifanc i rannu a chyd-ymwneud. Yn dilyn cafwyd cyfle ymarferol i edrych ar y safle yn yr ystafell gyfrifiaduron. Braf iawn oedd gweld cymaint o blant a phobl ifanc yn bresennol ac yn gwbl gartrefol yn trin y peiriannau. Roedd y rhai hyn hefyd yn amlwg yn mwynhau'r profiad a chlywyd sawl ebychiad a sawl ymadrodd pan yn edrych ar yr adran luniau. A sawl gwaith y clywyd "Wyt ti'n cofio ...?"

A dyna mae'n debyg beth o werth y safle. Dwyn yn ôl i gof rai o'r pethau sydd wedi digwydd o fewn ein hardal ni, modd i ddiogelu a chadw y pethau sy'n perthyn i ni, - modd i gyfleu sut bobl ydym ni a beth sy'n ein gwneud ni yr hyn ydym ni yn y rhan hon o Gymru.

Yn ogystal mae hefyd yn fodd i roi sylw i'r hyn sy'n digwydd heddiw, yn gyfle i roi gwybod am ddigwyddiadau o bob math o fewn yr ardal.

Er gwybodaeth, mae dros 37,000 o dudalennau'r safle wedi cael pobl yn edrych arnynt ers inni gychwyn.

Os am gael blas ar gynnwys y safle, ewch i www.talsarnau.cvmru.org