Ac wrth gwrs mae yma ddau adeilad i ofalu amdanynt yn y pentref. Mae hynny yn ei hun yn dipyn 0 waith, sef cynnal a chadw'r adeiladau hyn mewn cyflwr digonol.

Braf yw cael nodi bydd 2 bopty trydan newydd yn cael eu gosod, un yn y Neuadd a'r llall yng Nghanolfan Artro maes o law.

Mae'r cae chwarae hefyd yn mynd i gael offer newydd ar gyfer y plant lleiaf. Disgwylir y bydd hwn wedi ei osod erbyn y Pasg.

Mae bwrdd hysbysebu newydd wedi cael ei brynu a'i osod ar wal y Wenallt. Mae digon o le arno i hysbysebu gweithgareddau cymunedol.

Gwelir mainc newydd Er Cof am holl Gymwynaswyr ein Cymuned wedi ei gosod ym mynwent yr Eglwys.

Mor amserol gywir yw'r cyfraniad yma gan y Cyngor Cymuned. Mae wedi bod yn aeaf caled iawn a nifer o rai annwyl wedi'n gadael.

Ie, eitha gwir yr hen ddywediad "Gaeaf glas, mynwent fras".

Hyderwn y caiff bob un ohonom gysur o'r fainc yma, a dwyn i go' hen ffrindiau a chymwynaswyr bro rhy niferus i'w henwi, ond yr atgofion amdanynt yn dal yn annwyl yn ein cof.

Materion eraill sy'n codi yn fisol bron yw budreddi cŵn ar hyd y palmentydd yn y pentref. Mae'r arwyddion hysbysebu hefyd i'w gweld ar gynnydd drwy'r pentref, ac yn tueddu i fod yn flêr.

Ceisiadau cynllunio hefyd sy'n achosi cur pen ar lawer achlysur. Ond hyderwn fod barn a safbwynt y Cyngor yn cael ei barchu. Wedi'r cwbl, maent wedi cael eu hethol i gynrychioli'r bobl yn y gymuned.

Ni wneir unrhyw benderfyniad ar chwarae bach.

Mae croeso i bawb fynychu unrhyw gyfarfod.

Cynhelir hwy ar y nos Iau cyntaf ym mhob mis yng Nghanolfan Artro i ddechrau am 7.00 gyda Phwyllgor y Neuadd a'r Cae Chwarae, ac yna i ddilyn gyda'r Cyngor Cymuned. Croeso i unrhyw un ohonoch fynychu'r rhain.