Yn gorwedd dan gysgod gwarchodol y graig fawr, doedd dim arall i alw'r fferm fechan ond Y Graig. Ond ai lloches ddiogel neu gysgod gormesol yw'r garreg fawr uwchben y buarth?

Y Graig yw nofel gyntaf yr awdures o Ardudwy a Llanuwchllyn, Haf Llewelyn. Fe'i lansiwyd mewn noson arbennig yn Nhafam yr Eryrod yn Llanuwchllyn.

Wedi ei lleoli ar fferm Y Graig yng nghefn gwlad gogledd orllewin Cymru, mae dyfodol y fferm yn y fantol wrth i'r genhedlaeth iau dorri eu cwys eu hunain.

Ond, mae yna hefyd lu o gyfrinachau personol gan sawl aelod o'r teulu, ac yn raddol cant eu datgelu, gan ailgodi creithiau o'r gorffennol sy'n rhoi dyfodol y fferm yn y fantol.

"A dweud y gwir nes i ddim meddwl am ddirywiad cefn gwlad fel cefndir y stori o gwbl ar y dechrau. Y cwbl nes i oedd meddwl am gymeriadau a sut oedd cymeriadau mewn un teulu yn gweu trwy'i gilydd, dim ond digwydd ei gosod hi ar fferm nes i gan mai dyna ydy fy nghefndir i," eglurai'r awdur a ddaw yn wreiddiolo0 Gwm Nantcol, Ardudwy, lle mae ei brawd yn parhau i ffermio ar y fferm deuluol.

Mae cefndir Haf wedi bod yn adnodd amhrisiadwy wrth iddi fynd ati i ysgrifennu'r nofel hon sy'n cael ei hadrodd drwy lygaid cymeriad gwahanol ym mhob pennod.

Cawn fwrw golwg ar y stori, sy'n digwydd dros gyfnod o ychydig dros wythnos, drwy lygaid rhai o'r trigolion, o'r hen ŵr, Iori, i ferch y fferm gyfagos, Alice sy'n adrodd y cyfan yn eu geiriau ei hunain, geiriau cefn gwlad.