Doeddwn i ddim wedi cymryd ato yn y cinio, hyll ei geg, dydy 'love at first sight' ddim yn bodoli nad ydy? Wel, yn sicr nid oedd yma rhwng fi ac Aled. Ond es i ar y trip.

Yn gyntaf roedd Berlin yn wych, yn fawr ac yn le hanesyddol. Aethom i weld y wal, dychrynllyd wrth feddwl mai dim ond pymtheng mlynedd sydd ers iddi ddod i lawr.

Mi wnes i ddreifio car 'Trabi' o amgylch y ddinas ... wel, sôn am glec! Dwi byth am ddreifio dramor eto!

Aethom i fyny'r tŵr uchel i weld y ddinas, roedd yr olygfa'n ffantastig. Bechod bod fi ac Aled wedi cael ffrae cyn mynd i mewn i'r tŵr!

Cawsom ddiwrnod mewn bragdy ar ôl noson yng nghlwb nos mwyaf poblogaidd Berlin; lwcus fy mod yn hogan nobl, de, neu fuasa Aled dal yno rŵan.

Cawsom wersi salsa ac O! dwi'n cochi wrth feddwl am y peth! A'r caraoci ... o, plîs bod nhw wedi ei dorri o'r ffilmio!

Roedd yn brofiad unigryw i ddweud y gwir. Roeddwn yn teimlo braidd yn gas oherwydd mi wnes i'n siŵr bod y criw ddim yn fy ngadael ar ben fy hun efo Aled ac mi roedd yn swnian am hynny wrtha'i ... wps!

Mae'n siŵr eich bod wedi dyfalu bellach, nid oes unrhyw gysylltiad rhwng Aled a fi bellach! Roedd y criw yn grêt a chefais hwyl gyda nhw ond am Aled ... pwy ydy Aled?

Yn wir i chi roedd pob dim yn mynd o'i le - a dim actio oedden ni - rhaglen lawn comedi. Gwyliwch a mwynhewch!

Elen x