Bu'n byw ym Mangor ers 30 mlynedd.

Efo'r Cymro y dechreuodd ei yrfa newyddiadurol. Penderfynodd fynd i fyd papurau newydd ar ôl iddo fod yn athro ysgol am ddwy flynedd. Ond yn nwfn yn Ardudwy y mae ei wreiddiau.

Aeth i Ysgol Gynradd Dyffryn ac Ysgol Ardudwy Harlech cyn mynd i'r Coleg Normal, Bangor. Wedi bod yn athro yn Birmingham ymunodd â'r Cymro pan oedd y papur yn eael ei gyhoeddi yng Nghroesoswallt (Oswestry).

Symudodd i weithio gyda'r BBC ym Mangor lle bu'n ohebydd, yn gyflwynydd a chynhyrchydd rhaglenni newyddion Radio Cymru. Oddi yno aeth i weithio i'r rhaglen Hel Straeon yng Nghaernarfon cyn iddi ddod i ben. Aeth yn ôl i'r BBC i weithio yn yr adran wybodaeth cyn ymddeol.

Eleni dechreuodd weithio yn rhan amser i'r Cymro yn eu swyddfa ym Mhorthmadog. Pan adawodd y golygydd ym mis Hydref cafodd wahoddiad i wneud y gwaith yn ei le.

Meddai: "Doeddwn i 'rioed wedi meddwl gneud gwaith o'r fath. Ond mae hi'n fraint fawr cael gofalu am y papur yr oeddan ni'n brynu gan Elinor Post yn Awelon ers talwm. Dim ond Y Cymro a'r Cambrian News oeddan ni'n gael o'r pentyrrau mawr o bapurau oedd ganddi ar y cownter. Roeddwn i'n ennill hanner coron weithiau gan Dewyrth Tom.

"A dwi'n cofio 'nhad yn ennill 'Ble mae'r Bêl?' yn y pumdegau, yn rhannu'r £50 efo rhywun o ochrau Caernarfon. Roedd £25 yn bres mawr amser hynny!"

Mewn ateb i'r cwestiwn faint sy'n prynu'r Cymro erbyn hyn dywedodd: "Dim hanner digon!"

Y cwmni sydd piau'r Cambrian News yw perchnogion Y Cymro hefyd ers dwy flynedd. Y rheolwr cyffredinol sy'n gofalu am y ddau bapur yw Lis Owen Jones, Lasynys Fach gynt, un arall a fu yn Ysgol Ardudwy, ond rai blynyddoedd ar ôl 'golygydd newydd Y Cymro!