Ar nos Fawrth Mai 20 yn Neuadd y Ddinas cafodd nifer dda ohonom gyfle i fod yn bresennol yng Nghinio Maer newydd Dinas Lerpwl a chafodd groeso mawr gan y gwahoddedigion. Y mae gan yr Arglwydd Faer am 2008 nifer o rinweddau amlwg: Ef yw un o feiri ieuengaf i gael yr anrhydedd. Ni fu yn Cynghorydd am fwy na 6 blynedd. Etholwyd ef yn 2002 dros ward Fazakerley fel aelod o'r Blaid Lafar. Dim ond 46 mlwydd oed ydyw.Mae yn boblogaidd gyda gwleidyddion pob plaid wleidyddol. Talodd arweinydd y Ddinas, Cynghorydd Waren Bradley deyrnged uchel iddo fel person agos atoch, a dyna'r stori a glywais y noson honno gan o leiaf 6 o wleidyddion ar Gyngor y Ddinas.Mae yn Sgowser go iawn o ran iaith ac acen ac yn ymffrostio yn ei gysylltiadau â'r ddinas, ac yn arbennig ei fod ef yn cael gweithredu fel yr Arglwydd Faer ym mlwyddyn Prifddinas Diwylliant Ewrop.Mae ganddo gefndir gwerinol ond hefyd manteisiodd ar gyfleusterau addysgol fel myfyriwr aeddfed. Gadawodd ysgol yn bymtheg mlwydd oed i weithio ym myd adeiladu, ond blynyddoedd yn ddiweddarach, yn ei oriau hamdden, astudiodd pynciau Lefel O ac ati a chael ei dderbyn am radd Prifysgol John Moores. Yno ym 1993 graddiodd ac yn awr dechreuodd ar radd MA. Dymunir yn dda iddo ym myd addysg.Mae ganddo nod eleni o godi'r swm o ddau gan mil i achosion da y ddinas fel Ysbyty Plant Alder Hey ac Ysbyty'r Galon yn Broadgreen. Dymunir yn dda iddo yn yr ymdrech arbennig yma.Medda ar ddigonedd o hiwmor a chafwyd yn ei anerchiad aml i stori. Un o'r gwahoddedigion y cefais gyfle i sgwrsio ag ef oedd y canwr Gerry Marsden sydd â th^y haf ganddo ym Marianglas Môn ac yn meddwl y byd o drigolion yr ynys. Gallwn ddisgwyl arweiniad ganddo. Estynnais ddeheulaw cymdeithas iddo yn enw y gymuned Gymraeg ac roedd yr Arglwydd Faer, Steven Rotheram, yn dra diolchgar am imi ddod ato i'w gyfarch yn swyddogol.
 | 
