Bu cystadlu cryf yn Nhwrnamaint Cenedlaethol yr Urdd ar Fai 10fed ac fe fydd ennill y tlws yma yn galondid i dimoedd Dwyrain Cymru ac yn glod i'r ysgol. Tîm lleol Llanelli oedd yn eu herbyn ac roedd curo Ysgol Dewi Sant yn profi bod gan fechgyn Gwent ddoniau trafod arbennig.

Mae'r tîm a welir isod yn cael ei hyfforddi gan Mr Ioan Dyer, sydd ar staff yr ysgol. Yn ôl pob son bu dathlu mawr yng Nghlwb Rygbi Bargod yn ddiweddarach yn y mis, ac i bawb fwynhau'r achlysur.

Pwy a wyr na fydd rhai o'r tîm yma yn chwarae rygbi dros dimoedd yn yr Uwch adran rhyw ddydd, ac mae'n siwr bydd staff presennol yr ysgol gyda'r cyntaf i roi gwybodaeth i Tua'r Goleuni. Oni fyddai'n hyfryd gweld y disgyblion hyn yn datblygu a chwarae i dimoedd Ysgolion Uwchradd Cymru yn ystod yr wyth mlynedd nesaf.

Beth am gael adroddiadau cyson oddi wrth yr Ysgolion Cynradd a'r Ysgol Uwchradd am eu hynt ar feysydd y campau? Mae'n sicr bydd darllenwyr Tua'r Goleuni yn awyddus i wybod amdanynt, ac i weld lluniau rhai ohonynt.