Eleni bydd yr athletwraig Tanni Grey-Thomson, yn cael ei derbyn ynghyd a Connie Fisher a fydd yn canu'r brif rhan yn y Sound of Music yng Nghanolfan y Mileniwm adeg yr Ŵyl. Un arall fydd yn gwisgo'r wisg werdd yn Eisteddfod y Bala fydd Randal Issac o Rydaman. Mae ei gyfraniad yntau i'n diwylliant wedi bod yn sylweddol ac, er diddordeb i ddarllenwyr Tua'r Goleuni, yw'r ffaith ei fod ar un adeg wedi bod yn athro yn Ysgol Gymraeg Caerffili.

Dywed cyhoeddiad yr Eisteddfod am Denzil, "Bardd, llenor, darlledwr a gweinidog disglair ei ddoniau. Y mae ei gyfraniad mewn llu o wahanol swyddogaethau o fewn enwad y Bedyddwyr ac ar gyrff rhyngenwadol cenedlaethol, wedi dangos sicrwydd ei arweiniad. Yn sylfaenydd a golygydd Papur Bro Caerffili y mae ei egni yn allweddol ym myd drama a chorau lleol ardal Caerdydd."

Mae darllenwyr Tua'r Goleuni, with gwrs yn gwybod mai braslun yn unig yw hyn o gyfraniad y gwr ifanc a ddaeth i Gaerffili yn 1972 i fod yn weinidog ar Fedyddwyr capel Tonyfelin. Buan ychwanegodd ofalaeth eglwys yr Annibynwyr ym Methel, Heol Nantgarw, at restr ei gyfrifoldebau. Gweinidog a ddaeth yn rhan o'i gymuned ydoedd gan fod am gyfnod yn gadeirydd ar bwyllgor Mudiad Ysgolion Meithrin, aelod o Bwyllgor Cenedlaethol RHAG, ac yn ogystal â bod yn llywodraethwr yn Ysgol Gyfun Cwm Rhymni.

Wrth i ni droi tudalennau rhifyn cant ac ugain o Tua'r Goleuni mae'n werth cofio mai Denzil sydd wedi golygu pob un ers y rhifyn cyntaf. Ac nid yn unig golygu'r papur ond, hefyd, ysgrifennu yn helaeth ar ei gyfer, mynd a'r gwaith at yr argraffydd a dosbarthu'r copïau i dîm o garedigion yr iaith a ffurfiwyd ganddo. Fe hefyd sy'n delio â Bwrdd yr laith ac yn cadeirio'r pwyllgor llywio.

Roedd ymhlith y dyrniad cyntaf a sefydlodd ein cwmni drama, Cwmni Cwm Ni, yr unig gwmni yn y de ddwyrain, y tu allan i Gaerdydd sydd yn perfformio yn y Gymraeg. Mae hefyd yn aelod brwdfrydig o Gôr Meibion Taf. Mae ei adnabyddiaeth o Gymry Cymraeg yr ardal yn anhygoel a bu'n ddiwyd ar hyd y blynyddoedd yn cyflwyno siaradwyr Cymraeg i'w gilydd a'u hannog i ddefnyddio'r iaith. Wedi'r cyfan does fawr o bwynt brwydro dros yr iaith os na wnawn ei defnyddio!

Teithiodd Denzil i sawl cornel o'r byd gan gynnwys Affrica a De America fel rhan o'i waith dros elusennau Cristnogol. Ac mae ei agwedd eangfrydig yn ei wneud yn ddewis delfrydol ar gyfer Cadeiryddiaeth y sefydliad yn erbyn cam-ddefnyddio alcohol a sylweddau.

Mae Sian, gwraig Denzil, ar fin ymddeol o'i swydd fel athrawes yn Ysgol Gymraeg Caerffili. Deallwn ei bod yn gwneud hynny i raddau helaeth er mwyn canolbwyntio ar ei gorchwylion o fod yn nain. Bendithiwyd Sian a Denzil ag wyres, Hawys, merch fach Luned eu merch a'i gwr hithau Dyfrig. Mae Aled, mab Denzil a Sian, sy'n briod â Lynwen (de la Taste gynt) yn gweithio yn y cyfryngau, a'r ddau wedi gwneud eu cartref yn Nelson. Braf yw bod y teulu yn dal i fod gyda'i gilydd o fewn y filltir sgwâr.

Ben Jones