BWA

Ym Mhontypridd gweli fwa cain
Fel enfys unlliw'n asio'r glannau llwm
A lleidiog ddyfroedd Tâf yn floesg eu sain
Wrth alarnadu ar eu rhawd drwy'r cwm
O ddeutu'r afon prin y gweli mwy
Y llannerch werdd na llwyn na choedlan ir,
Lledaenodd pla'r peilonau dros y plwy
A llysoedd hap a dawns fel brech ar dir;
Mae'r bwa'n aros yn y cerrig llwyd
Gan ddwyn ar gof yr enfys yn y glaw,
A'r adeiladydd â'i anorthrech nwyd
Yn ennyn gobaith â deheurwydd llaw
Wrth lunio patrwm yr addewid ddrud
Yn gywrain gelfydd yn y meini mud.