Gwnaeth y pêl-droediwr addawol o Gaerffili greu hanes yn y gêm drwy dorri record sydd wedi para ers 42 o flynyddoedd, sef y chwaraewr ifanca' i gynrychioli'r clwb. Y person ifanca' diwethaf i wisgo crys glas Caerdydd oedd rheolwr presennol Cymru John Toshack nôl yn 1965. Llwyddodd Aaron, a oedd yn 16 oed ar ddydd San Steffan llynedd, i dorri'r record o 113 o ddyddiau.

Daeth Aaron i'r cae gyda phum munud yn weddill fel eilydd i asgellwr Cymru, Paul Parry. Collodd Caerdydd y gêm o gôl i ddim o flaen torf o 12,421 ond fe wnaeth y rheolwr Dave Jones gynnig sylwadau cadarnhaol iawn am y Cymro ifanc, "Mae Aaron Ramsey yn dalent mawr. Byddai wedi bod yn well petai wedi gwneud ei ymddangosiad cyntaf mewn tîm buddugol, ond roedd yn ddiwrnod arbennig iddo ac rwy'n falch iawn drosto. Mae ganddo ddyfodol disglair yma yng Nghaerdydd a rhaid i'r clwb yn awr edrych ar ei ôl."