| Gwelwyd Eurig Davies, prifathro Ysgol Gyfun Ystalyfera a chyn bennaeth y Gymraeg yn Ysgol Gyfun Cwm Rhymni, fel un o arweinwyr yr Eisteddfod ar y llwyfan yn ddyddiol. Roedd R. Alun Evans, gweinidog Eglwys Annibynnol Bethel, Caerffili, fel Llywydd Llys yr Eisteddfod, ym mhobman, - o dywys cyfarfodydd cyhoeddus i ddelio gyda'r wasg. Un arall o drigolion y fro a wnaeth gyfraniad cyhoeddus sylweddol yw Dafydd Islwyn Huws, a fu'n brysur fel cadeirydd Pwyllgor Llên yr Eisteddfod ac yn amlwg mewn nifer o'r seremonïau ynghyd â gofalu am babell Barddas. Cafodd gymorth parod ei ferch Angharad yn y gwaith pwysig hwnnw. Bu Robert Dutt yn arwain gweithgareddau Pabell y Dysgwyr ac roedd nifer o blith trigolion y fro yn gweithredu fel stiwardiaid mewn nifer o fannau.
 | 
