Ar ôl misoedd a misoedd o aros yn amyneddgar, ar bigau'r drain eisiau i'r wythnosau symud yn gyflymach, o'r diwedd fe ddaeth y 27fed o Dachwedd gyda'r profiad mwyaf arbennig erioed i'w ddilyn. Erbyn 2 o'r gloch (hanner awr yn gynnar) mi roedd pawb fwy neu lai yn eistedd llawn cyffro ar y bws, yn ysu i'r gyrrwr ddechrau gyrru er mwyn dechrau'r daith fythgofiadwy. Er bod pawb yn brin o gwsg, mi roedd pawb, llawn bywyd, yn barod i fynd. Ar yr awyren, wrth lanio yn yr U.D.A, mi rwyf i'n cofio gweld y tir am y tro cyntaf a dyna pryd sylweddolais mawredd y sefyllfa. Roeddem ni wedi cyrraedd America. Fe ddeffrodd pawb o'u trwmgwsg ac fe ddechreuodd bwrlwm y bws unwaith eto. Doedd y merched hyd yn oed ddim yn pryderu am eu gwallt na'u colur (er ein bod ni'n edrych yn weddol 'rough'), roedd pawb yn barod i fwynhau wythnos o flasu bywyd Americanaidd, (a'r bwyd wrth gwrs).
Cyrhaeddom ni'r gwesty yn Washington D.C, pawb yn ddiolchgar i gael seibiant a phrofi pa mor gyfforddus oedd y gwelyau. Ond, yn nodweddiadol o'r daith i gyd, nid oedd gormod o amser i fod yn ddiog. Aethom i'r Food Court yn Union Station ar y metro, lle profais i Coca Cola 'large' Americanaidd (bwced o hylif) am y tro cyntaf, a lle roedd cyfle i brynu tocynnau sinema am y diwrnod canlynol. Yna, nôl i'r gwesty er mwyn cael noson dda o gwsg haeddiannol (opsiynol), neu gymdeithasu. Dewisodd pawb yr opsiwn cyntaf wrth gwrs!
I fyny am 6.30 y bore wedyn, fe leddfodd y brecwast blasus y blinder ac roedd pawb yn barod i weld y golygfeydd gyda chymorth ein tywyswr gwybodus - y Tŷ Gwyn a'r cofebau i gyd. Roedd lot o gerdded ond nid oedd yr un cwyn, sy'n adlewyrchiad o'n mwynhad. Yna aethom i Amgueddfa'r Holocost lle cawsom flas ar hanes a chawsom y cyfle i gael gwybodaeth ychwanegol ar gyfer ein gwaith cwrs Lefel-A. Ar ôl prynhawn eithaf afiach, roedd noson hwyl o chwarae gemau yn ESPN zone, cyn mynd i wylio ffilm yn y sinema.
Gyda diwrnod 3 fe ddaeth taith o amgylch adeiladau llywodraethol Washington lle cawsom ni lun tu allan i'r Capitol Building. Roedd y tywydd yn braf ac fe fwynhaodd pawb y profiad. Ar ôl cael Pizza ENFAWR yn Yr Hen Swyddfa Bost, roedd modd i ni ddewis pa amgueddfa ddiwylliannol oedd well gennym ni i ymweld. Fe ddewisodd y rhan fwyaf o bobl i fynd i siopa (syrpreis, syrpreis) ond fe aeth eraill i'r Amgueddfa Ysbio, Celf a'r Amgueddfa Gofod. Ar ôl diwrnod llawn o gerdded roedd pawb eisiau bwyd. Aethom i Chinatown i gael pryd o fwyd Tseiniaidd. Blasus iawn.
Ar ddiwrnod 4, roedd rhaid i ni ffarwelio â Hotel Harrington yn Washington a dweud 'Hylo' i Efrog Newydd. Ond nid yn syth. Stopiodd y bws yn Philadelphia tu allan i risiau Rocky, lle trechodd Mr Webb y bwrsar, Mr Phillips gan osod llwyfan ar gyfer ei bryfocio am weddill y daith. Treulion ni 3 awr yn Franklin Mills shopping mall, lle roedd bargeinion di-ri ar gael a chyfle i brynu anrhegion, a dillad i ni wrth gwrs. O'r diwedd, yn teithio tra'n canu i Frank Sinatra, New York, fe gyrhaeddon ni westy moethus y Beford, yn Efrog Newydd . Wrth i'r nos ledu dros y ddinas, aethom i'r Hard Rock cafe, gan werthfawrogi mawredd y lle with gerdded yno. Rhyfeddol.
Nid oedd unrhyw beth yn medru ein paratoi ar gyfer heddiw. Y daith gyntaf o amgylch golygfeydd Manhattan lle gwelon ni'r Empire State Building, Chrysler Building, Rockefeller Centre a nifer o lefydd eraill. Yn ystod y prynhawn, yr oedd gennym y cyfle i weld Efrog Newydd ar y Circle Line Cruise - cyfle arbennig i dynnu lluniau. Gan mai heddiw oedd diwrnod Calan Gaeaf, trefnodd yr athrawon noson anhygoel yn nhŷ bwyta Jekyll & Hyde, lle roedd adloniant addas. Ar ôl hynny, aethom i ben yr Empire State Building a gweld Efrog Newydd o'r 86ed llawr. Er fod gen i ofn uchder, roedd yn brofiad ysgubol.
Ar ôl llond plât o frecwast yn Scotty's Diner, aethom i gwrdd â'r tywyswyr cyn mynd ar daith gerdded o amgylch Lower Manhattan. Fe stopion ni mewn cafe yn Little Italy lle roeddent yn gwerthu cacen gaws Americanaidd (maint bric). Blasus iawn. Yna aethom i weld Ground Zero ac roedd hyn yn brofiad trawiadol. Yr oedd cyfle unwaith eto yn ystod y prynhawn i siopa a chael rhywbeth bach i fwyta wrth edrych allan ar Bont Brooklyn o Pier 17. Yn ystod y prynhawn roedd dewis unwaith eto, ond y dewis mwyaf deniadol oedd siopa yn Macy's.
Fel uchafbwynt i'r noson, trefnodd yr athrawon Limousines i'n cludo ni i Broadway i wylio'r sioe, Hairspray. Roeddem yn teimlo fel enwogion wrth deithio trwy Times Square mewn rhes o Stretch Limos. Roedd y sioe yn fendigedig, ac i orffen y noson yn berffaith, cerddodd pawb i Dŷ Bwyta Gwyddelig er mwyn trafod y sioe a mwynhau pryd o fwyd.
Ein diwrnod olaf yn y 'ddinas sydd byth yn cysgu', ond eto roedd trefniadau ar ein cyfer. Taith o amgylch y Cenhedloedd Unedig oedd ar y teithlyfr wedi'i ddilyn gan siopa. Roedd pawb yn flinedig ond yn awyddus i ddangos eu brwdfrydedd hyd at y funud olaf. Erbyn 2 o'r gloch y prynhawn roedden ni ar ein ffordd i'r Maes Awyr. Cysgodd pawb fwy neu lai ar hyd y daith adref i gyd, wedi blino ar ôl cyffro taith orau eu bywydau, siŵr o fod.
