Roedd yr ymateb a gawsom yn rhyfeddol. Gwir y dywedir mai'r Cymro oddi cartre yw'r un sy'n teimlo effaith hiraeth ar ei galon fwyaf ac sy'n ymateb i apêl emosiynol yr anthem orau.

Trwy gyd-ddigwyddiad rhyfedd cyrhaeddodd ein pamffled Idris Evans, Llywydd Cymdeithas Gymraeg Gogledd Califfornia, ddiwrnod cyneu Cymanfa Ganu yn San Fransisco ar Ddydd Gŵyl Dewi. Cafodd ei ddarllen gerbron yr holl gynulleidfa, gan eu hysbrydoli i ganu'r anthem gydag afiaith.

Yn ei lythyr o gydnabyddiaeth, soniodd Mr Evans fod gan un o'i aelodau gopi o gyhoeddiad cyntaf yr alaw rymus hon a ymddangosodd yn y gyfrol "Gems of Welsh Melody". Dyma drysor gwerth ei ddiogelu!

Testun balchder i'n dosbarth Cymraeg yw ein bod ni wedi cofnodi ein hanthem genedlaethol fel hyn, a bod copïau ohoni wedi eu dosbarthu i P30'ion drwy Gymru gyfan. Teimlem mai ein cyfrifoldeb gwladgarol oedd gwneud felly, yn arbennig gan fod cyfansoddwr yr alaw gref hon, James James, wedi'i gladdu yn y fynwent nepell o'r Coleg yn Aberdâr lle rydyn ni'n cyfarfod.

Ceir copïau o'r pamffled gan aelodau dosbarth Cymraeg P30 sy'n cyfarfod fel arfer am 10am ar yr 2il a'r 4ydd Dydd Gwener y mis yng nghaffi Amgueddfa Aberdâr. Ar hyn o bryd mae'r dosbarth yn cael hwyl wrth ddarllen nofel Daniel Owen, 'Rhys Lewis'. Mae croeso i aelodau newydd.

Gan Tydfil Thomas (Arweinydd Dosbarth Cymraeg P30 Cwm Cynon)