| Mae braidd yn rhyfedd i ysgrifennu hyn achos ar ôl blynyddoedd o ffarwelio â gwahanol aelodau o staff am wahanol resymau, y tro yma fi sy'n ffarwelio â chi gan fy mod wedi derbyn swydd newydd fel Rheolwr Ansawdd ac Hyfforddiant Cymraeg i Oedolion o fewn Coleg Gwent yn Y Fenni. Felly dyma'r erthygl olaf y byddaf yn ei hysgrifennu i bapurau bro Rhondda Cynon Taf. Hoffwn i ddiolch yn gyntaf i Penri Williams ac Eric Jones, Golygyddion Tafod Elai a Clochdar, ac hefyd cyn gadeiryddion Menter Iaith. Mae'r ddau wedi bod yn help mawr i mi dros y blynyddoedd ac mae'r papurau wedi rhoi pob cyfle i fi a staff eraill y Fenter adrodd am ein gwaith a gofyn am gefnogaeth y cyhoedd at yr hyn rydym yn ceisio cyflawni yn y gymuned. Mawr yw fy niolch hefyd i John Ll Thomas sy'n parhau fel Cadeirydd Ymddiriedolwyr y Fenter. Mae fy niolch diffuant yn mynd at bob cyn-gadeirydd, trysorydd ac ysgrifennydd Menter Iaith, a Menter Taf-Elai fel ag yr oedd, yn ogystal â phob aelod o'n gwahanol pwyllgorau.  Hoffwn i ddiolch hefyd i holl bartneriaid y Fenter dros y blynyddoedd Dyfrig Morgan yr Urdd, Jim Price, Ron Jones, Chris Ashman, Paul Dear, Caroline Mortimer a Vivian Lloyd o Gyngor Rhondda Cynon Taf, holl staff Interlink wrth gwrs, GTFM a Phrifysgol Morgannwg, Aled ac Afryl yn benodol o'r BBC - ble byddai Parti Ponty heb Radio Cymru? Pwy arall? Y Cymro, Golwg, ysgolion y sir, Bwrdd yr Iaith Gymraeg fel cyllidwyr a chefnogwyr ymarferol hefyd. Ymddiheuriadau i'r cyrff ac unigolion nad wyf wedi cyfeirio atynt.
Hoffwn i ddiolch hefyd i bob aelod o staff sydd wedi bod gyda fi dros y blynyddoedd yn enwedig efallai Huw T Davies, Rhian James, Vicky Pugh a Helen John oedd yn ffurfio uned fach gadarn iawn i'm cefnogi a gweddill staff y Fenter dros y blynyddoedd. Gan fod tua 100 o bobl yn gweithio i'r Fenter ar unrhyw un adeg dwi ddim yn mynd i geisio diolch i bob un nac ychwaith enwi pob un ond dwi yn cofio nifer fawr ac wedi elwa o'ch ymdrechion cyson.
Steffan Webb Nodyn gan y Golygydd:
Mae Clochdar yn dymuno'n dda i Steffan Webb wrth iddo dderbyn swydd arall ac yn diolch iddo am y gwaith diflino a gyflawnodd ar hyd y blynyddoedd fel Prif Weithredwr Menter Iaith. Fe wnaeth ymdrech fawr i sicrhau cyllideb enfawr i gyflogi rhywbeth fel dwsin o swyddi Cymraeg yn y Sir a rhyw hanner dwsin ohonynt yn ardal Aberdâr, naill ai yng Nghanolfan yr Urdd neu yn Swyddfa'r Fenter nepell o'r Amgueddfa a Siop Tesco.
Yn ychwanegol, roedd degau o swyddi eraill rhan amser yn y Clybiau Carco a gwaith ieuenctid a chyfle i bobl ifainc a dderbyniodd addysg gyfrwng Cymraeg i ddefnyddio'r iaith yn eu bywyd bob dydd - cyfle sydd yn llawer rhy brin yn yr ardaloedd hyn o hyd - ydym ni'n fodlon ar y sefyllfa honno? Cyfle i ofyn cwestiwn i ymgeiswyr ar gyfer etholiadau'r Cynulliad yn ystod y tri mis nesaf. Pob Lwc yn y gwaith newydd Steffan! Ewch i wefan y Fenter i weld oriel luniau o Steffan Webb ar hyd y blynyddoedd. (Dyw'r BBC ddim yn gyfrifol am gynnwys safleoedd rhyngrwyd allanol)
 | 
