విద్యా లక్ష్మి: చదువుకునేందుకు సులువుగా రుణాలిచ్చే ఈ పోర్టల్ గురించి తెలుసా?
ఫొటో సోర్స్, Getty Images
- రచయిత, ఎ. కిశోర్బాబు
- హోదా, బీబీసీ కోసం
విద్యార్థులు చదువుకునేందుకు రుణాలిచ్చే ఉద్దేశంతో కేంద్ర ప్రభుత్వం ఒక ప్రత్యేక పోర్టల్ను నడిపిస్తోంది.
బ్యాంకుల చుట్టూ తిరగాల్సిన అవసరం లేకుండా ఆన్లైన్లోనే రుణం కోసం దరఖాస్తు చేసుకునేలా దీన్ని రూపొందించారు.
విద్యార్థి ఒకేసారి మూడు రకాలైన ఎడ్యుకేషన్ రుణాలకు దరఖాస్తు చేసుకునే సదుపాయం కూడా ఇందులో ఉంది. అతి తక్కువ వడ్డీతో ఈ రుణాలు ఇస్తారు.
వీటన్నిటి కోసం కేంద్ర విద్య, ఆర్థిక మంత్రిత్వ శాఖలు ‘విద్యా లక్ష్మి’ పేరిట ఒక ప్రత్యేక పథకాన్ని అమలు చేస్తున్నాయి.
ఇంతకీ విద్యా లక్ష్మి పథకం అంటే ఏమిటి? ఈ పోర్టల్ ద్వారా ఆన్లైన్లో ఎడ్యుకేషన్ లోన్కు దరఖాస్తు చేసుకోవడం ఎలా ? ఏమేం పత్రాలు సమర్పించాల్సి ఉంటుంది? తదితర వివరాలు పూర్తిగా తెలుసుకుందాం.
ఫొటో సోర్స్, Getty Images
ఏమిటీ విద్యా లక్ష్మీ?
విద్యార్థులకు సులభంగా, అతి తక్కువ వడ్డీతో ఎలాంటి పూచికత్తులు లేకుండా రుణాలు పొందేలా కేంద్ర ప్రభుత్వం అమలు చేస్తున్న పథకం ఇది. కేంద్ర ప్రభుత్వ ఆర్థిక మంత్రిత్వ శాఖ ఈ పోర్టల్ను 2015 ఆగస్టు 15న ప్రారంభించింది.
బ్యాంకులు ఎడ్యుకేషన్ లోన్లు ఇస్తున్నాయి కదా?
ఇస్తున్నాయి. కానీ విద్యా లక్ష్మి పథకానికి, వాటికి మధ్య చాలా వ్యత్యాసం ఉంది.
ఈ పోర్టల్లో ఒకే చోట 39 బ్యాంకులు విద్యా రుణాలు ఇవ్వడానికి అందుబాటులో ఉంటాయి.
మామూలుగా అయితే ఒక రుణం తీసుకోవడానికి విద్యార్థి, వారి తల్లిదండ్రులు బ్యాంకుల చుట్టూ తిరగాల్సి ఉంటుంది. పైగా అక్కడ ఒకే బ్యాంకు చుట్టూ తిరగాలి.
కానీ ఇక్కడ ఎవరి వద్దకు వెళ్లకుండా పూర్తిగా ఆన్లైన్లోనే రుణం కోసం దరఖాస్తు చేసుకోవచ్చు.
ఈ పోర్టల్ ప్రత్యేకత ఏమిటి?
ఈ పోర్టల్ ద్వారా విద్యార్థి ఒకసారి ఆన్లైన్లో దరఖాస్తు చేసుకుంటే చాలు.. ఇది మూడు బ్యాంకులకు, మూడు రకాల విద్యా రుణాలకు దరఖాస్తు చేసుకున్నట్లే.
ఫొటో సోర్స్, Getty Images
ఎన్ని రకాల రుణాలుంటాయి?
ఇందులో విద్యా రుణాలను మూడు వర్గాలు విభజించారు
- రూ.4 లక్షల లోపు రుణాలు
- రూ.4 లక్షల నుంచి రూ.7.5 లక్షల లోపు
- రూ.7.5 లక్షల పైన ఎంతైనా ఉన్న రుణాలు
ఈ మూడు రకాల రుణాలకు విద్యార్థి ఆన్లైన్ ద్వారా చేసుకున్న ఒకే ఒక దరఖాస్తు సరిపోతుంది.
వడ్డీ ఎంత ఉంటుంది?
ఈ విద్యా రుణాలకు వడ్డీ మిగిలిన బ్యాంకులతో పోల్చితే తక్కువనే చెప్పాలి.
సహజంగా విద్యా రుణాలపై ఏడు శాతం వడ్డీ ఉంటుంది. అంతకంటే ఎక్కువ కూడా కొన్ని బ్యాంకులు వసూలు చేస్తున్నాయి.
పూచీకత్తు ఇవ్వాలా?
ఈ రుణాల ప్రత్యేకత పూచీకత్తు లేకుండా పొందే సదుపాయమే. ఆర్థికంగా వెనుకబడిన విద్యార్థులు ఇక్కడ ఎలాంటి పూచీకత్తు లేకుండా (కొల్లేటరల్) రుణాలు పొందవచ్చు.
రూ.7.50 లక్షల వరకు ఈ తరహా పూచీకత్తు రహిత రుణాలు పొందడం సాధ్యమవుతుంది.
ఫొటో సోర్స్, Getty Images
కుటుంబ ఆదాయం ఎంతుండాలి?
పూచీకత్తు రహిత రుణం పొందడానికి విద్యార్థి కుటుంబ ఆదాయం 4.5 లక్షలకు లోపు ఉండాలి. అయితే ఇది ఒక రుణానికి మాత్రమే వర్తిస్తుంది.
ఎన్ని రకాల విద్యా రుణాలు అందిస్తారు?
ఈ పోర్టల్లో 70 రకాల విద్యా రుణాలు అందుబాటులో ఉంటాయి. వాటిని ప్రధానంగా 5 వర్గాలు విభజించారు.
- టెక్నికల్ కోర్సెస్ లోన్: టెక్నికల్ కోర్సులైన ఇంజినీరింగ్, కంప్యూటర్ సైన్స్, ఇన్ఫర్మేషన్ టెక్నాలజీ తదితర రంగాలకు సంబంధించిన కోర్సులు చదివే విద్యార్థులకు ఇచ్చే రుణాలివీ.
- వొకేషనల్ ప్రోగ్రామ్స్ లోన్: వృత్తి విద్యా సంబంధమైన కోర్సులు చదివే వారికి ఇచ్చే రుణాలివీ.
- ప్రొఫెషనల్ డిగ్రీస్ లోన్: ప్రొఫెషనల్ కోర్సులైన ఎంబీబీఎస్, లా, చార్టెడ్ అకౌంటెన్సీ, ఆర్కిటెక్చర్ తదితర ప్రొఫెషనల్ కోర్సులు చదివే వారికి ఇస్తారు.
- డిగ్రీ ప్రోగ్రామ్స్ లోన్: అండర్ గ్రాడ్యుయేట్, పోస్టు గ్రాడ్యుయేట్ కోర్సులు చదివే విద్యార్థులకు ఇచ్చే రుణాలివీ.
- ఎడ్యుకేషన్ లోన్ ఫర్ స్టడీస్ అబ్రాడ్: విదేశాల్లో ఉన్నత విద్య చదవాలనుకునే వారికి ఇచ్చే రుణాలు. ఈ రుణాల్లో విద్యార్థుల ట్యూషన్ పీజు, లివింగ్ ఎక్స్పెన్సెస్, రవాణ ఖర్చు తదితరాలన్నీ కవర్ చేస్తారు.
దరఖాస్తు చేయడానికి ఏమైనా డబ్బులు చెల్లించాలా?
ఒక్క పైసా కూడా చెల్లించాల్సిన అవసరం లేదు. ఇక్కడ ఉచితంగా దరఖాస్తు చేసుకోవచ్చు. పైగా లోన్ ప్రాసెసింగ్ రుసుములు కూడా ఉండవు. పారదర్శకంగా రుణాల మంజూరు ప్రక్రియ నిర్వహిస్తారు.
ఏ పత్రాలు సమర్పించాలి?
- విద్యార్హతల ధ్రువపత్రాలు
- చివరి సారిగా విద్యార్థి చదివిన కోర్సుకు సంబంధించి ఉత్తీర్ణత సర్టిఫికేట్
- కొత్తగా తాను చదవబోయే కోర్సుకు సంబంధించి అడ్మిషన్ ధ్రువపత్రాలు
- కుటుంబ ఆదాయ ధ్రువీకరణ పత్రం
- ఇంకా ఏవైనా బ్యాంకులు అడిగితే ఆ పత్రాలు
ఫొటో సోర్స్, Getty Images
ఎలా దరఖాస్తు చేసుకోవాలి?
ముందు విద్యార్థి విద్యా లక్ష్మి వెబ్సైట్కు వెళ్లాలి. విద్యా లక్ష్మీ వెబ్ లింక్ ఇది. https://www.vidyalakshmi.co.in/Students/index#studentlogin
ఇందులో విద్యార్థి ముందుగా తనకు ఒక ప్రత్యేకమైన లాగిన్ ఐడీ, పాస్వర్డ్ క్రియేట్ చేసుకోవాలి. తరువాత సీఈఎల్ఏఎఫ్ పూర్తి చేయాలి.
సీఈఎల్ఏఎఫ్ అంటే ఏమిటీ?
సీఈఎల్ఏఎఫ్ అంటే కామన్ ఎడ్యుకేషన్ లోన్ అప్లికేషన్ ఫాం. అంటే అన్ని రకాల విద్యా రుణాలకు ఒకటే దరఖాస్తు.
ఒకేసారి విద్యార్థి ఈ పోర్టల్ ద్వారా 3 బ్యాంకులకు రుణం కోసం దరఖాస్తు చేసుకోవచ్చు.
వీటన్నిటికీ ఈ కామన్ ఎడ్యుకేషన్ లోన్ అప్లికేషన్ ఫాం ఒక్కటే సరిపోతుంది.
రుణం వస్తుందా రాదా అని ఎలా తెలుస్తుంది?
మీరు ఆన్లైన్లో దరఖాస్తు చేయగానే ఏ రుణాలకు అర్హులవుతారో ఇందులో ఆటోమేటిగ్గా తెలుసుకోవచ్చు.
అలాగే ఆ రుణాలు ఏఏ బ్యాంకులు ఇవ్వడానికి సిద్ధంగా ఉన్నాయో కూడా తెలిసిపోతుంది.
ఆన్లైన్లోనే సంప్రదింపులు జరపొచ్చా?
మీకు నచ్చిన, అర్హత ఉన్న రుణం పొందడానికి ఆయా బ్యాంకులను మీరు ఆన్లైన్లో ఈ పోర్టల్ ద్వారానే సప్రందించవచ్చు.
పత్రాలన్నీ కూడా ఆన్లైన్లనే సమర్పించాలా?
అవును. మీరు పొందాలనుకున్న రుణానికి సంబంధించి పత్రాలన్నీ కూడా ఆన్లైన్లోనే అప్లోడ్ చేయాల్సి ఉంటుంది.
15 రోజుల్లో తెలిసిపోతుందా?
అవును. మీకు విద్యా రుణం వస్తుందా రాదా? తదితరాలన్నీ కూడా 15 రోజుల్లోనే తెలిసిపోతుంది.
అలా తెలియని పక్షంలో 20 రోజుల వరకు వేచి ఉండి, ఆ తరువాత ఈ పోర్టల్కు ఫిర్యాదు కూడా చేయొచ్చు.
పోర్టల్ను ఎలా సంప్రదించాలి?
Tel - 020-2567 8300
ఈమెయిల్: [email protected]
పనిచేసే సమయం- సోమవారం నుంచి శనివారం వరకూ - ఉదయం 9:30 నుంచి సాయంత్రం 6:00 వరకూ..
ముంబయి హెడ్ ఆఫీస్
చిరునామా – టైమ్స్ టవర్, ఒకటో అంతస్తు, కమల మిల్స్ కాంపౌండ్, లోవర్ పరేల్, ముంబయి - 400 013.
ఫ్యాక్స్ - (022) 2491 5217
పనిచేసే సమయం- సోమవారం నుంచి శనివారం వరకూ - ఉదయం 9:30 నుంచి సాయంత్రం 6:00 వరకూ..
దిల్లీ
చిరునామా : 409/410, అశోక ఎస్టేట్ బిల్డింగ్, నాలుగో అంతస్తు, బారాఖంబా రోడ్, కనాట్ ప్లేస్, దిల్లీ - 110 001.
ఫోన్ - (011) 2370 5418 / 2335 3817
ఇవి కూడా చదవండి:
- మిస్ యూనివర్స్ అందాల పోటీలు: ‘తనిఖీల పేరుతో మగవాళ్ల ముందు దుస్తులు విప్పించారు’
- నేను ‘బైసెక్సువల్’ అని నాకన్నా ముందే నెట్ఫ్లిక్స్కు ఎలా తెలిసింది?
- భారత్-పాకిస్తాన్ విభజన: ఆనాటి ఉద్రిక్త పరిస్థితుల్లో వేల మంది ప్రాణాలను విమానాలు ఎలా కాపాడాయంటే...
- అఫ్గానిస్తాన్: తాలిబాన్లు ఫుట్బాల్ స్టేడియంలో 22 మందిని బహిరంగంగా కొరడాలతో కొట్టారు... ఈ దేశంలో ఏం జరుగుతోంది?
- 'ఏనుగుతోనే కలిసి పెరిగాను, అది నా కోసం చెమట చిందించింది... వచ్చే జన్మలోనైనా దాని రుణం తీర్చుకుంటా'
(బీబీసీ తెలుగును ఫేస్బుక్, ఇన్స్టాగ్రామ్, ట్విటర్లో ఫాలో అవ్వండి. యూట్యూబ్లో సబ్స్క్రైబ్ చేయండి.)
