Money rituals: Babaláwo kan ní kò sí ètùtù òògùn owó nínú Ifa, àwúre ló wà

Babalawo Olukunle Idowu ti ṣalaye lẹkunrẹrẹ fun BBC Yoruba pe ko si ohun to jọ oogun owo ninu Ifa.

Eyi tako igbagbọ ọpọ eeyan pe awọn babalawo lo n ṣe oogun ọrọ fawọn ọdọmọde ti wọn n wa owo ojiji lasiko yii.

Lẹnu ọjọ mẹta yii, iroyin fifi awọn eeyan ṣe oogun ti wa wọ pọ lawujọ.

O si buru debi wi pe awọn ọdọ langba ti ko tii pe ogun ọdun ni wọn n saaba ba nidi awọn to n ṣe oogun owo.

Alaye babalawo ree lori oogun owo:

Babaawo Idowu ni ọrọ naa dabi owe tawọn Yoruba maa n pa wi pe amukun, ẹru rẹ wọ, o ni oke lẹ n wo ẹ o wo isalẹ.

''Ikanju lo n mu ki awọn ọmọ kekeke maa ṣoogun owo, gbogbo nkan lo ti di ikanju lode oni.

Ninu ikanju ni a n bimọ si, ninu ikanju ni a n bi ọmọ si laye ode oni.

Ikanju ni a fi n loyun ọmọ, ikanju ni a fi n wa sile aye, ikanju yii naa ni wọn fi n fi aye silẹ.

Nitori awọn eeyan o dagba di ogbo mọ, ẹni to ba fi ikanju waye yoo kanju lọ.

Amọ, ko si ohun to n jẹ oogun owo ninu Ifa o nitori ki a gbo, ki a tọ ni Orunmila dimu.

Orunmila n ṣe tiwa lode ọrun, ẹni to ba ti ṣe ti Orunmila lode aye, ki ni kanju ku tori Orunmila ko kanju ri.

Ikanju lo bi gbogbo ohun to n ṣẹlẹ yii lati inu ile bọ si ode to fi de ọdọ ijọba.

O yẹ ki a ba awọn alaṣẹ sọrọ lori gbogbo awọn to n kowo sinu kanga nla, awọn mii n kan posi fun owo, gbogbo ẹ lawọn ọmọ yii n gbọ.

Awọn ọmọ yii naa fẹ la loojọ, awure ni n bẹ lọdọ babalawo ko si oogun owo.

Awure ti n sọ yii gan an, ti ọmọde ba wa labẹ obi rẹ, ko ni le ṣe tori ẹru.

Ti oogun owo ba wa ni, n ko ni maa gbe ile atijọ to ma wa mọ, n ko ba ti ko lọ ile ara mi.

Inu ile atijọ ni mo n gbe, ti oogun owo ba wa ni, n ko ba ti wo ile naa palẹ ki n fi kọ ile alaja mẹta.

Ẹmi gigun ati aṣiri bibo lawọn baba wa maa n tọrọ, awa o le iyẹn mọ.

Owo gbigbona ni, ẹni to ba wa, oun naa maa ku iku gbigbona ni.

Kinni onimọ nipa ihuwa si ọmọde sọ?

Onimọ nipa ihuwasi ẹda, Akinola Akinropo ni awọn ọmọde to n ṣe oogun owo yii nikan kọ jẹbi ọrọ yii.

O ni ''nkan ti Obi ba n ṣe, awọn ọmọ naa maa gbagbọ pe awọn naa le ṣe iru rẹ.

Fun apẹrẹ, fifi ẹgba lu ọmọ to ba ṣẹ kii ṣe ibawii, ibinu lasan ni iru awọn Obi bẹẹ kan n fihan.

Gbogbo ọmọ lo gbe ogo wọn waye, ṣugbọn o ku sọwọ Obi lati tọ ọmọ sọna.

Kii ṣe gbogbo obi kọ lo mọ pe kii ṣe gbogbo ile ẹkọ ni ọmọ le lọ, kii ṣe gbogbo adugbo ni ọmọ ti le dagba.

Aṣiṣe ti ọpọ awọn obi maa n ṣe ni pe wọn kii tọ ọmọ fun ọjọ iwaju.

Iru awọn ọmọ to n dunkoko mọ awọn ọmọde ẹgbẹ wọn nile ẹkọ ti awọn alaṣẹ ile ẹkọ lo n pada n fi awọn eeyan ṣe oogun owo kaakiri.

Ko yẹ ki ile ẹkọ maa le awọn akẹkọọ to ya apanle ọmọ kuro nile ẹkọ.

Nitori ti wọn ba le wọn kuro, igboro naa ni wọn yoo pada si ti wọn yoo si da idakuda.

Ijọba gan an ni ẹbi tiẹ nipa aiṣeto ẹkọ to mọyan lori fun awọn akẹkọọ.