Oyo beggars: Agbègbè tí ìjọba ìpínlẹ̀ Oyo kó wa lọ báyìí kò tẹ́ wa lọ́rùn - Àwọn oníbárà

Awọn onibaara to wa lagegbe Sabo, niluu Ibadan ti ijọba ipinlẹ Oyo ko kuro nibi ti wọn wa tẹlẹ ti sọ pe igbesẹ naa ti jẹ ki awọn padanu owo ti iye rẹ tí ko din ni miliọinu marun un naira.

Lara awọn ti wọn ko kuro ni Sabo ni a ti ri afọju, arọ atawọn mii to n tọrọ baara nibẹ.

Awọn eeyan naa sọ pe bi ijọba ipinlẹ Oyo ṣe le wọn kuro nibi ti wọn wa ni pajawiri lo jẹ ki awọn padanu owo naa.

Nigba ti ọkan lara awọn eeyan naa, to tun jẹ olori awọn afọju, Ibrahim Muhammad, n ba awọn akọroyin sọrọ, o ni ijọba Oyo ko sọ fun awọn ṣaaju pe wọn n gbe igbesẹ lati le awọn kuro nibi ti wọn wa.

Gẹgẹ bo ṣe sọ, "Wọn kan dede wa sọdọ wa ni, ti wọn si sọ fun wa pe ki a fi Sabo silẹ."

"Bo tilẹ a bẹ wọn titi ki wọn fun wa ni akoko diẹ lati palẹmọ, ṣugbọn awọn oṣiṣẹ ijọba ti wọn ran niṣẹ ọhun kọ jalẹ."

"Niwọn igba to jẹ pe aṣẹ ijọba ni wọn tẹle, ko si nnkankan ti a le ṣe. Ka ma fa ọrọ gun, iye owo ti a padanu ko le din miliọnu marun un si mẹfa."

Muhammad ṣalaye pe ijọba ipinlẹ Oyo fi ẹtọ awọn dun wọn gẹgẹ bii ọmọ Naijiria nitori wọn ko ta awọn lolobo tẹlẹ wọn n bọ wa le awọn onibaara naa kuro ni Sabo.

Ṣaaju ni ijọba ipinlẹ Oyo ti kọkọ kede pe awọn yoo ko awọn onibaara kuro laarin igboro si ibi ti wọn ṣeto fun wọn lagbege Akinyele.

Ninu atẹjade kan ti agbẹnusọ gomina Seyi Makinde, Taiwo Adisa fi ṣowọ si awọn akọroyin, o ni awọn ti bẹrẹ igbesẹ ọhun lati nnkan bii oṣu melokan sẹyin.

Adisa fi kun awọn yoo ṣe abẹwo si agbegbe naa pẹlu awọn adari ẹgbẹ Arẹwa, to fi mọ awọn aṣoju awọn onibaara nipinlẹ Oyo.

Ẹwẹ, awọn onibara naa sọ pe ijọba ko bun awọn gbọ tẹlẹ, ati pe ibi ti ijọba Oyo ṣeto fu wọn ni Akinyele bayii ko tẹ awọn lọrun.

Gẹgẹ bii ohun ti wọn sọ, awọn araalu kan ti lọ ja ṣoọbu awọn, wọn si tun ti ji awọn dukia ti awọn fi silẹ nigba ti ijọba Oyo ni ki wọn kẹru wọn tipa-tikuku.