Baba Ijesha: Ta ló yọ ojú òpó 'GoFundMe' tí wọ́n ṣí fún afurasí Olanrewaju Omiyinka kúrò lórí ayélujára?

Wọn ti yọ oju opo GoFundMe ti ẹnikan ṣi fun Baba Ijesha lati ba kowojọ lori igbẹjọ ifipa ba ọmọde lopọ kuro lori ayelujara.

Bo tilẹ jẹ pe a ko tii le sọ ni pato boya ọgbẹni Oladele Matti to ṣi oju opo naa lo yọ ni tabi ileeṣẹ GoFundMe funra rẹ.

Ṣugbọn iroyin sọ pe igbeṣe naa waye lẹyin ti awọn eeyan kan bẹrẹ si n ṣe ifẹhonuhan lori ayelujara lẹyin ti Matti ṣi oju opo naa tan.

Ṣaaju ni ni wọn ti kọkọ fẹsun kan Baba Ijesha pe o ba ọmọde ni ibalopọ lọna ti ko tọ, eyii to lodi si abala ofin 135, 137, 261, 202, 262 ati 263 to rọ mọ ibalopọ ni ipinlẹ Eko.

Asiko ti igbẹjọ naa bẹrẹ ni ọkan lara awọn ololufẹ rẹ to fi orilẹ-ede Ireland ṣebugbe, Oladele Matti ṣi oju opo GoFundMe fun Baba Ijesha pẹlu erongba lati ko €50,000 jọ ko le fi ṣe ẹjọ ọhun.

Nigba to n sọrọ lori idi to fi gbe igbeṣe naa, Matti ni "Mo n ṣe ikowojọ yii lati ran Olanrewaju Omiyinka, ti ọpọ mọ si Baba Ijesha lọwọ lori igbejọ rẹ."

"Afojusun mi ni ki Baba Ijesha le ri idajọ ododo gba lori ẹsun ti wọn fi kan an."

Ẹwẹ, igbesẹ naa ko dun mọ awọn kan ninu, ti wọn si woye eredi ti ẹnikan yoo fi gbiyanju lati ko owo jọ fun ẹni ti wọn fi ẹsun biba ọmọde lopọ kan.

Lasiko ti BBC Yoruba ṣe abẹwo si oju opo naa, a ri wi pe ko si nibẹ mọ pẹlu akọle pe "A ko ri oju opo yi ṣi mọ."

Ileeṣẹ GoFundMe jẹ ileeṣẹ kan to n fun awọn eeyan lanfani kaakiri agbaye lati ṣe ikowojọ fun eredi kan tabi omiran.