Kaduna kidnap: Àwọn jàndùkú jí Emir Bungudu gbé, wọ́n pa ọlọ́pàá lọ́nà mọ́rosẹ̀ Abuja sí Kaduna

Eto abo to mẹhẹ ni Naijria papaa julọ lẹkun ariwa ti wa n buruu si bayii.

Lọjọ Iṣẹgun ni iroyin kan jade pe awọn janduku ajinigbe pawo gbe Emir Bungudu, Alhaji Hassan Attahiru lọ lopona ilu Abuja si Kaduna.

Alukoro ileeṣẹ ọlọpaa ipinlẹ Kaduna, Mohammed Jalige lo fid iṣẹlẹ ọhun mulẹ ninu atẹjade to fi sita lalẹ ọjọ Iṣẹgun.

Jalige ṣalaye ninu atẹjade naa pe ọlọpaa kan dero ọrun lasiko ikọlu naa to ṣẹlẹ lagbegbe ilu Dutse lopona Abuja si Kaduna.

Alukoro ileeṣẹ ọlọpaa ni ọpọ eeyan ni wọn jigbe lọ pẹlu Emir Bungudu nigba ti awọn meji mi farapa yana yana.

O ni awọn ti wọn farapa naa ti n gba itọju bayii nile iwosan.

Jalige fikun ọrọ rẹ pe ṣadeedee lawọn ajinigbe ọhun da awọn ero ọkọ naa lọna ti wọn si bẹrẹ si ni yinbọn ni mẹsan an mẹwaa.

Agbẹnusọ ileeṣẹ ọlọpaa ni awọn ẹṣọ eleto abo gbera pa lọ sibẹ lati doola awọn eeyan, ṣugbọn ọlọpaa kan ba iṣẹlẹ naa lọ.

O ni ọkọ mẹrin ni ileeṣẹ ọlọpaa ri nibi ti iṣẹlẹ ọhun ti waye nigba ti o sọ pe oun ko le sọ pato iye eeyan ti wọn jigbe lọ.

''Emir Bungudu wa lara awọn ti wọn jigbe lọ si ibi ti ẹnikan ko mọ bayii.

Ṣugbọn iṣẹ n lọ lọwọ lati doola gbogbo awọn ti wọn jigbe lọ lai ni ifarapa.

Iru iṣẹlẹ ijinigbe yii ko saaba wọ pọ mọ lopopona Abuja si Kaduna lẹnu ọjọ mẹta yii ki eleyii to ṣẹlẹ,'' Jalige lo sọ bẹẹ.

Ẹwẹ, ọga agba ọlọpaa ipinlẹ Kaduna, CP Mudassiru Abdullahi ti rọ awọn eeyan pe ki wọn maa ṣe bẹru lati maa rinrin ajo lopopona Abuja si Kaduna.

CP Abdullahi ni awọn ọlọpaa ko ni kaarẹ lati maa pese abo to peye fawọn eeyan loju ọna ọhun.