Baba Ijesha: Iyabo Ojo àti àwọn obìnrin kan ń ṣèwọ́de tako ìtúsílẹ̀ afurasí náà

Gbajumọ osere tiata lobinrin, Iyabo Ojo, ẹni to n gbara ta lori ọrọ Baba Ijesha ati ọmọde ti wọn lo fi tipa ba lopọ, ti mu ileri rẹ sẹ.

Iyabo, to n leri leka ninu fidio kan to se loju opo Instagram rẹ lalẹ Ọjọru, lo ni ohun yoo ba ọrọ ẹsun ti wọn fi kan Baba Ijesha de opin, ti idajọ ododo yoo si wa.

Iyabo, ẹni to ni kede pe awọn eeyan kan n saayan lati yọ baba Ijesha latimọle ọlọpaa lọjọ Ẹti, wa fọwọ gbaya pe oun ko ni gba ki wọn tu afurasi naa silẹ.

Lọna ati mu ileri rẹ sẹ, Iyabo ti wa gba agọ ọlọpaa Panti lọ nilu Eko lati lọ fi ẹhonu rẹ han pe wọn ko gbọdọ tu Baba Ijesha silẹ ni ahamọ.

Iyabo, ẹni to kọwọ rin pẹlu awọn obinrin kan ti ọpọ wọn jẹ osere tiata bakan naa, ni wọ́n n ke fata fata niwaju agọ ọlọpaa naa pe wọn ko gbọdọ tu Baba Ijesha silẹ.

"Ọrọ eyi kii se ọrọ eeyan kan mọ, o ti di ọrọ gbogbo abiyamọ. Ko si ibi ti a n lọ, ibi ti a maa wa ni eleyi.

Gbogbo wa la bimọ, bawo ni agbalagba ọkunrin yoo se maa ba ọmọkekere lopọ, a ni gba. Ta lo fẹ́ fi silẹ, nibo lo fẹ wọ, gbogbo wa la bimọ."

Àwọn iròyin tì ẹ leè ní ìfẹ̀ síí:

Titi di akoko ta n ko iroyin yii jọ, Iyabo ati awọn akẹẹgbẹ rẹ naa si wa niwaju agọ ọlọpaa Panti nilu Eko nibi ti wọn ti n fi ẹhonu han.

Òṣèré tíátà gbọnmú lórí ẹnu àbùkù tó ń kun àwọn òṣèré Yorùbá torí Baba Ijesha

Yoruba ni ti ọrọ ba se n pẹ nilẹ, naa ni yoo maa gbọn si.

Bẹẹ ni ọrọ ẹsun ifipa ba ọmọde lopọ ti wọn fi kan gbajumọ osere tiata kan, James Olanrewaju Omiyinka, ti ọpọ eeyan mọ si Baba Ijesha ri.

Idi ni pe oniruuru ọrọ lo ti n jẹyọ lẹyin ti iroyin naa jade sita, tawọn akẹẹgbẹ rẹ ninu isẹ tiata atawọn araalu si ti n sọ oniruuru ero wọn nipa isẹlẹ naa.

Lara wọn ni gbajumọ osere tiata lọkunrin kan, ti gbogbo eeyan mọ si Legemiami, to sọrọ nipa ẹsun ti wọn fi kan Baba Ijesha.

Lege, ẹni to fi ọrọ naa sita loju opo Instagram rẹ lasiko ti iroyin jade nipa rẹ ni ko dara bi awọn eeyan kan se n da baba Ijesha lẹbi lori ẹsun naa saaju idajọ ileẹjọ.

Lege ni lootọ ni wọn fi ẹsun kan gbajumọ osere naa pe o fipa ba ọmọde lopọ, amọ wọn ko se afihan fidio bi Baba Ijesha ti n hu iwa ibajẹ naa.

"Se ile kanna abi adugbo kanna ni wọn jọ n gbe ni, lo se rọrun fun lati ba ọmọ naa lopọ lati ọmọ ọdun meje, ko ye mi.

Awọn akẹẹgbẹ mi kan ti n jade, ti wọn si n sọrọ nipa isẹlẹ naa eyi to n fun awọn eeyan kan lọrọ sọ, ti wọn si n sọrọ buruku nipa agbo isẹ tiata Nollywood, ẹka ti Yoruba.

To ba jẹ pe bẹẹ ni, ika to ba sẹ ni ọba n ge, bi o tilẹ jẹ pe oun ko se atilẹyin fun ohun ti baba Ijesha se."

Legemaimi wa n beere pe ki ni awọn osere fiimu Yoruba se fun awọn eeyan to n bu awọn osere tiata lede Yoruba, se awọn lo sẹ wọn ni?

O ni ko si idaniloju pe Baba Ijesha hu iwa naa, yoo si dara ki wọn ni suuru ki ileẹjọ dajọ naa, ki wọn to maa tanuku awọn osere.

Osere tiata naa wa jẹjẹ pe awokọse rere ni oun maa jẹ fawọn ololufẹ oun, oun ko si le fara mọ iwa ifipa banilopọ.

Àwọn iròyin tì ẹ leè ní ìfẹ̀ síí:

Amọ awọn ọrọ to Legemiami sọ yii ti bọ si apo ibinu awọn eeyan kan, ti wọn si ti bọ sori ayelujara lati maa naka aleebu si osere tiata naa.

Ọpọ awọn obinrin si lo n naka aleebu si pe ọwọ oun gan ko mọ nipa iru ẹsun ti wọn fi kan Baba Ijesha, nitori naa lo se n gbe lẹyin rẹ.

Awọn miran kan tiẹ tun fi ẹsun gbajuẹ kan, eyi tawọn ileesẹ iroyin ayelujara kan n gbe soju opo wọn.

Koda, oju opo ayelujara ti kun nipa orisirisi iroyin nipa awọn osere tiata kan lede Yoruba, ti wọn n naka aleebu si pe wọn n hu iru iwa ti baba Ijesha hu, eyi ti awa ko ni darukọ wọn.

Awọn ẹsun naa pọ to bẹẹ gẹẹ ti osere tiata yii fi tun bọ sori ayelujara lati maa bẹ awọn obinrin pe ki wọn tu eekanna lẹyin ọrun oun.

Legemiami ni kawọn obinrin to n pa irọ mọ oun nitori ero ohun nipa ọrọ baba Ijesha jọọ dari jin oun, oun ko ni se bẹẹ mọ.

O ni "Nibi ta ba de yii, o daa bayii, mo bẹ ẹyin obinrin patapata pe ki ẹ dari jin mi, n ko ni se bẹẹ mọ.

N ko fara mọ nnkan ti ko dara, mo kan ni ọrọ naa ko ri bẹẹ ni amọ ẹ dari jin mi.

Nnkan ti n ko se ni wọn ti fi n kan mi bayii, ẹ dakun ẹ dari jin mi. Ẹ ko ni ri ibi, ẹ ko ni sofo tabi sunkun ọmọ"

Ọrọ wa di ibẹru obinrin ni ipilẹsẹ ọgbọn fun Legemiami, to si n rawọ rasẹ si gbogbo obinrin pe ki wọn fori jin oun.