South Africa KwaZulu-Natal Floods: Wọ́n ti sin òkú èèyàn bí 200 nínú 435 tí omiyalé pa

Ẹbí kan pàdánù ọmọ mẹsan-án nínú èèyàn 435 tí omiyalé pa

Inu ibanujẹ ati ìpayínkeke si ni awọn olugbe agbegbe KwaZulu-Natal, ni orile-ede South Africa wa, lẹyin iṣẹlẹ omiyale to pa eeyan 435 ni oṣù to kọja.

Iṣẹlẹ omiyale naa ni eyi to tíì buru ju ni orile-ede naa lati ọgọta ọdun.

Lọwọlọwọ, isinku apapọ ti n waye, bo tilẹ jẹ pe ọpọ idile ni ko ti le sin oku eeyan wọn, nitori pe àgbàrá gbe wọn lọ.

Kini oju akoroyin BBC to wa nibẹ ri?

Akọroyin BBC to lọ si agbegbe naa, sọ pe idile kan wa to padanu ọmọ mẹsan-an, ati iya kan.

Oju orun ni omiyale naa ba Arabinrin Slindile Mdalose, ẹni ọdun mẹtalelogojj, ati ọmọ mẹsan-an, ti ọjọ ori wọn wa laarin ọdún meji si mẹwaa.

Niṣe ni omi àgbàrá ya wọ inu ile wọn, to si wó lulẹ.

Wọn ti sin oku obinrin naa, ati awọn ọmọ rẹ marun-un.

Wọn ko tii ri oku awọn ọmọ mẹrin to kù, to jẹ ibatan obinrin ọhun.

Bo ṣe ri ninu ẹbi Mdalose, naa ni ibanujẹ kun ile awọn ẹbi eeyan yooku lara awọn 435.

Ogunlọgọ ni wọn ko tii ri oku wọn.

Wọn ti sin awọn to din ni igba, oku eeyan mọkandinlọgọta si wa ni mọṣuari.

Oju wo ni Aare South Africa di wo iṣẹlẹ yii?

Aarẹ Cyril Ramaphosa sapejuwe iṣẹlẹ naa gẹgẹ bi òfò nla ni fun orile-ede naa.

O ni awọn si nilo owo si ju miliọnu mejidinlaadọrin Dọla, ti ìjọba ti ya sọtọ lati fi mu agbegbe KwaZulu-Natal pada sipo.

Ijọba si ti n wa ilẹ ti yoo fi kọ ibugbe fun ẹgbẹẹgbẹrun eeyan to di alainilelori jakejado agbegbe naa.