Yollywood: Ṣé Iyabo Ojo ń gbèrò láti ṣe ìgbéyàwó? Wo àwọn ohun tó sọ nípa olólùfẹ́ rẹ̀

Ọ̀rọ̀ ìfẹ́ bí àdánwò ni, Yorùbá sì bọ̀ wọ́n ní bí ọmọdé bá tó lọ́kọ́ ó máa ń lọ́kọ́ ni, tí ọmọdé bátó ládàá, ó máa ń ládàá ni.

Tí ó bá ti ń tó àkókò kan nínú ìgbésí ayé ọmọnìyàn, ìgbéyàwó a máa múmú lọ́kàn tọkùnrin tobìnrin.

Gbajúgbajà òṣèré tíátà, Iyabo Ojo ti tú àṣírí rẹ̀ wí pé òun ní olólùfẹ́ tí òun àti rẹ̀ dìjọ ń jáde ṣùgbọ́n òun kò ní ṣe àfihàn ẹni náà àyàfi tí àwọn bá ṣe ìgbéyàwó.

Iyabo Ojo ní ó dìgbà tí àwọn bá parí gbogbo ayẹyẹ ìgbéyàwó kí òun tó mú ẹni náà yọjú lórí ayélujára.

Ní ọdún 1999 ni Iyabo Ojo kọ́kọ́ ṣe ìgbéyàwó àkọ́kọ́ lẹ́ni ọdún makànlélógún.

Ọdún 1999 àti 2001 ló bí àwọm ọmọ rẹ̀ méjéèjì ṣùgbọ́n tí ìgbéyàwó náà túká lẹ́yìn tó bí ọmọ rẹ̀ kejì.

Iyabo Ojo wá ṣàlàyé pé òun àti olólùfẹ́ òun tuntun ti wà fún bí ọjọ́ mẹ́ta kan ṣùgbọ́n òun kìí sọ̀rọ̀ nípa rẹ̀ nítorí ẹni náà kò fẹ́ràn láti máa wà lórí ayélujára.

"Olólùfẹ́ mi gbàgbọ́ wí pé bí àwọn ènìyàn ṣe máa ń bú mi lórí ayélujára ti pọ̀jù, kò sì fẹ́ kí àwọn ènìyàn bẹ́ẹ̀ tún wá mú òun papọ̀ mọ́ gbogbo èyí tí wọ́n máa ń ṣe fún mi".

''Ó jẹ́ ẹni tí kò fẹ́ràn láti máa wà lórí ayélujára, ó fẹ́ràn láti máa gbé ara rẹ̀ pamọ́".

Njẹ́ Iyabo Ojo ń gbèrò láti tún ṣe ìgbéyàwó mìíràn?

Iyabo Ojo ní kí òun tó le gbé ẹnìkan gẹ̀gẹ̀ láti ṣe àfihàn ẹnìkan gẹ́gẹ́ bí olólùfẹ́ lórí ayélujára, á jẹ́ wí pé àwọn ti ṣe ìgbéyàwó.

Ó làá mọ́lẹ̀ wí pé òun kò rò wí pé ó ṣeéṣe fún òun láti gbèrò tàbí dámọ̀ràn dídán ilé ọkọ wò mọ́.

Ó ní bí ó tilẹ̀ jẹ́ pé òun ní ẹnìkan tí àwọn jọ ń ṣeré ìfẹ́, òun kò gbàá lérò láti tún máa ṣe aya ní ọ̀dẹ̀dẹ̀ ọkùnrin kan.

Bákan náà ló ní bí ó tilẹ̀ jẹ́ pé òun kìí sọ̀rọ̀ nípa ọ̀rọ̀ olólùfẹ́ òun àmọ́ òun ní ẹni tí òun ń fẹ́.

"Báwo ni ọmọbìnrin tó rẹwà bí tèmi kò ṣe ní ní ọkùnrin kan nínú ayé rẹ̀."