Gómìnà Zamfara ní kò sí ìdáríjí fún àwọn jàndùkú mọ́ ní ìpínlẹ̀ òun

Gomina ipinlẹ Zamfara, Bello Matawalle ti sọ pe ijọba oun ko ni maa ṣe aforiji fun awọn janduku mọ nitori wọn ti gun igi kọja ewe.

O ni awọn gbe igbesẹ yii lẹyin ti gbogbo igbiyanju ijọba lati ni ijiroro alaafia pẹlu awọn janduklu naa ja si pabo.

Matawalle lo sọ ọrọ naa nibi eto adura kan to waye ni Mọṣalaṣi Gusau, ni ipinlẹ ọhun.

O ni "Awọn janduku naa ran awọn eeyan kan lati bẹ wa pe ki a ṣi ọna fun wọn lati maa ko ounjẹ lọ sibi ti wọn wa, ṣugbọn mo kọ jalẹ."

"Ohun ti a oo maa ṣe bayii ni pe a oo maa ran wọn lọ si ọrun lati lọ jẹjọ lọdọ Eledumare."

Gẹgẹ bii ohun ti gomina naa sọ, awọn janduku naa ti n foju wina ija awọn agbofinro, opin yoo si de ba wọn laipẹ.

O ni lootọ ni awọn ọdaran naa ti kọkọ ṣetan lati joko fun ijiroro lori eto abo to mẹhẹ ni Zamfara, ṣugbọn bayii o ti bọ sori.

Lẹyin naa lo gba awọn olugbe ipinlẹ ọhun nimọran lati ṣe suuru nitori ọrọ awọn janduku yoo di ohun igbagbe laipẹ jọjọ.

O tun rọ awọn oloṣẹlu lati dẹkun ati maa ra alupupu fun awọn eeyan gẹgẹ bii ohun amuṣagbara.

Gomina naa pari ọrọ rẹ pe pupọ ninu awọn ti awọn oloṣelu n ra alupupu fun lo maa n ta awọn alupupu naa fun awọn janduku, eyii ti awọn janduku ọhun fi ṣiṣẹ ibi.