కరోనావైరస్: బంగ్లాదేశ్‌లో వేలాది మంది సామూహిక ప్రార్థనలు... వైరస్ వ్యాప్తికి దారితీస్తుందన్న భయాందోళనలు

బంగ్లాదేశ్‌లో బుధవారం సామూహిక ప్రార్థనల కోసం వేలాది మంది ప్రజలు ఒకచోట గుమిగూడటంతో.. ఇది కరోనావైరస్ విస్తృతంగా వ్యాపించటానికి దారితీస్తుందన్న భయాందోళనలు వ్యక్తమవుతున్నాయి.

ఖురాన్‌ లోని ''స్వస్థత వాక్యాల'' పఠనం కోసం 10,000 మంది ముస్లింలు రాయపూర్‌ పట్టణంలో ఒక చోట గుమిగూడారని స్థానిక పోలీస్ చీఫ్ టోటా మియా ఏఎఫ్‌పీ వార్తా సంస్థకు తెలిపారు.

అయితే.. అక్కడ దాదాపు 30,000 మంది జనం పోగయ్యారని ప్రత్యక్ష సాక్షి ఒకరు బీబీసీతో చెప్పారు.

ఇటీవల మలేసియాలో ఒక మత కార్యక్రమంలో పాల్గొన్న వారిలో 500 మందికి పైగా కరోనావైరస్ సోకినట్లు నిర్ధారణ అయింది. ఆ కార్యక్రమం వల్ల పొరుగు దేశాలైన బ్రూనై, సింగపూర్, కంబోడియాల్లోనూ కొంత మందికి వైరస్ సోకింది.

దీంతో మలేసియా ప్రభుత్వం దేశంలో అన్ని రకాల ప్రజా సమావేశాలనూ నిషేధించింది. వైరస్ మరింతగా విస్తరించకుండా ఉండటానికి సరిహద్దులను మూసివేసింది.

ఈ నేపథ్యంలో బంగ్లాదేశ్‌లో సామూహిక ప్రార్థనా కార్యక్రమం పట్ల ఆందోళన వ్యక్తమవుతోంది.

ఇండొనేసియాలో కూడా ఈ వారాంతంలో జరగాల్సిన ఇదే తరహా సామూహిక మత కార్యక్రమాన్ని.. వైరస్ వ్యాప్తి చెందవచ్చుననే భయంతో రద్దు చేశారు.

ప్రార్థన.. రక్షణ

బంగ్లాదేశ్‌లో కరోనావైరస్ కారణంగా తొలి మరణం సంభవించిన సమయంలో, లక్ష్మీపూర్ జిల్లాలోని రాయపూర్ పట్టణంలో ఈ సామూహిక ప్రార్థనా కార్యక్రమాన్ని నిర్వహించారు.

ఇప్పటివరకూ ఈ దేశంలో 17 మందికి కరోనావైరస్ సోకినట్లు నిర్ధరణ అయింది. అయితే, ఈ సంఖ్య మీద చాలా మంది నిపుణులు సందేహాలు వ్యక్తం చేస్తున్నారు.

రాయపూర్ సామూహిక ప్రార్థనా కార్యక్రమాన్ని నిర్వహించటానికి అధికారుల నుంచి సంబంధిత నిర్వాహకులు అనుమతి పొందలేదని పోలీస్ అధికారి మియా పేర్కొన్నారు. నిజానికి బంగ్లాదేశ్‌లో ఇటువంటి స్థానిక సమావేశాల నిర్వహణకు అధికారిక అనుమతులు కోరటం చాలా అరుదు.

పట్టణంలో కొంత పలుకుబడి గల ఒక మత పెద్ద ఈ కార్యక్రమాన్ని నిర్వహించారని స్థానికులు బీబీసీ బెంగాలీ ప్రతినిధి అక్బర్ హొస్సేన్‌తో చెప్పారు.

కరోనావైరస్ నుంచి రక్షణ కోసం ప్రార్థనల్లో పాల్గొనాలని ఆయన స్థానికులకు విజ్ఞప్తి చేశారు. ప్రార్థనలు చేసినందున వారికి ఇప్పుడు ''కరోనావైరస్ నుంచి విముక్తి'' లభించిందని కూడా ఆయన జనంతో పేర్కొన్నారు.

బంగ్లాదేశ్‌లోని దక్షిణ ప్రాంతంలో మత విశ్వాసాలు అధికమని బీబీసీ ప్రతినిధి చెప్తున్నారు. ''ఇస్లామిక్ ఉపదేశాలు, ప్రార్థనలు తమ సమస్యలను పరిష్కరించగలవ''ని అక్కడి జనం చాలా నమ్ముతారు.

ఢాకా ట్రిబ్యూన్ వార్తాపత్రిక కథనం ప్రకారం.. ఖురాన్‌లోని ఆరు స్వస్థత వాక్యాలను ఆ ప్రార్థనల్లో చదివారు.

సామూహిక వ్యాప్తి భయాలు

ఇండొనేసియాలోని సౌత్ సులావేసీలో గల గోవా అనే ప్రాంతంలో మార్చి 19 నుంచి 22 వరకూ మూడు రోజుల పాటు నిర్వహించాల్సి ఉన్న ఒక సామూహిక మత కార్యక్రమాన్ని రద్దు చేశారు.

ఆ కార్యక్రమం వల్ల వైరస్ సామూహికంగా విస్తరించే ప్రమాదం ఉందన్న భయంతో.. దానిని నిర్వహించవద్దని సంబంధిత నిర్వాహకులను ఒప్పించటానికి అధికార యంత్రాంగం రోజుల తరబడి ఒత్తిడి చేయాల్సి వచ్చింది.

చివరికి ఆ కార్యక్రమాన్ని రద్దు చేయటానికి నిర్వాహకులు గురువారం నాడు అంగీకరించారు. కానీ అప్పటికే దాదాపు 10,000 మంది జనం కార్యక్రమం జరగాల్సిన ప్రాంతానికి చేరుకున్నారు. వారిలో 474 మంది విదేశాల నుంచి కూడా వచ్చారు.

విదేశీయులను స్థానిక హోటళ్లలో 14 రోజుల పాటు క్వారంటైన్ చేయాలని తాము భావిస్తున్నట్లు రాష్ట్ర అధికారులు స్థానిక మీడియాకు తెలిపారు. ఇక్కడి కార్యక్రమంలో పాల్గొన్న వారు తిరిగి తమ తమ ప్రాంతాలకు చేరినపుడు వారిని కూడా క్వారంటైన్ చేయాలని ఇతర రాష్ట్రాల అధికారులకు కూడా చెప్తున్నట్లు వివరించారు.

ఈ కార్యక్రమంలో పాల్గొన్న వారిలో ఇప్పటివరకూ ఎవరికీ వైరస్ ఉన్నట్లు నిర్ధారణ కాలేదు. ఈ దేశంలో ప్రస్తుతం 309 నిర్ధారిత కేసులు ఉన్నాయి. వైరస్ వల్ల 25 మంది చనిపోయారు.

కరోనావైరస్ హెల్ప్‌లైన్ నంబర్లు: కేంద్ర ప్రభుత్వం - 01123978046, ఆంధ్రప్రదేశ్, తెలంగాణ - 104

ఇవి కూడా చదవండి

(బీబీసీ తెలుగును ఫేస్‌బుక్, ఇన్‌స్టాగ్రామ్‌, ట్విటర్‌లో ఫాలో అవ్వండి. యూట్యూబ్‌లో సబ్‌స్క్రైబ్ చేయండి.)