School resumption in Nigeria: Ibi ọ̀rọ̀ dé dúró rèé lórí ṣíṣí àwọn ilé ìwé padà ní Naijira àti nílẹ̀ Afrika

Lẹyin oṣu diẹ ti igbele Coronavirus bẹrẹ kaakiri agbaye, awọn ile iwe alakọbẹrẹ ati girama ni Tanzania ti pada bẹrẹ lọjọ Aje, ọjọ kọkandinlọgbọn, oṣu kẹfa, ọdun 2020.

Igbesẹ yii lo waye lẹyin ti aarẹ John Magafuli paṣẹ ni nnkan bi oṣẹ diẹ sẹyin pe ki wọn ṣi awọn ile iwe pada.

Ijọba ilẹ naa ti gbe ilana kalẹ lori awọn ohun to yẹ ki awọn ile iwe ṣe lati dabo bo awọn akẹkọọ.

Tanzania ni orilẹ-ede akọkọ ti yoo ṣilẹkun ile iwe rẹ fun awọn ekẹkọ nilẹ Afrika lẹyin igbele Coronavirus.

Awọn orilẹ-ede miran nilẹ Afrika to ti ṣilẹkun ile iwe rẹ.

Guinea

Ọjọ kẹrin, oṣu karun un, ọdun 2020 ni ilẹ New Guinea ṣilẹkun ile iwe rẹ pada.

Ajọ to n risi eto ilera lagbaye, WHO ti fọwọsowọpọ pẹlu ijọba ilẹ naa fun alakalẹ lori bi abo to peye yoo ṣe wa fun awọn ọmọ ile iwe.

Awọn irinṣẹ to n ṣayẹwo bi ara eeyan ṣe n gbona si, omi ati ọṣẹ fun ọwọ fifọ atawọn ohun miran ti wa ni sẹpẹ lawọn ile iwe ọhun.

South Africa

Bo tilẹ jẹ pe awọn obi ni ko yẹ ko ri bẹ, ọjọ kẹjọ oṣu Kẹfa ni ijọba South Africa ṣi awọn ile iwe rẹ pada.

Cameroon

Ọjọ kinni oṣu kẹfa ọdun 2020 ni awọn akẹkọ to wa ni ipele ikẹyin ni ile iwe alakọbẹrẹ ati girama pada sẹnu ẹkọ wọn ni Cameroon.

Minisita eto ẹkọ ilẹ naa, Pauline Lyonga ni igbesẹ ọhun jẹ ọna lati jẹ ki awọn ọmọ ile iwe má gbagbe awọn ohun ti wọn ti kọ ṣaaju igbele Coronavirus.

Ivory Coast

Orilẹ-ede Ivory Coast wa lara awọn ilẹ ni Afrika to kọkọ ṣi ile iwe rẹ pada.

Ọjọ karundinlọgbọn, oṣu karun un, ọdun 2020 ni awọn akẹkọọ pada sẹnu ẹkọ wọn.

Senegal

Aarẹ Macky Sall sun ṣiṣi ile iwe siwaju ni Senegal lẹyin ti awọn olukọ kan lugbadi arun Covid-19.

Ṣaaju lo ti kọ sọ pe ọjọ keji ọsu kẹfa ni oun yoo ṣi awọn ile iwe nilẹ naa.

Uganda

Ni ti Aarẹ Yoweri Museveni, o sọ pe oun ko tii ṣetan lati ṣi ile iwe bayii.

O ni ilẹ naa ko ni irinṣẹ ayẹwo to to lati ṣayẹwo Coronavirus, nitori naa, ki ile iwe ṣi wa ni titi pa lọwọ yii.

Naijiria

Ṣaaju ni ipinlẹ kan ṣoṣo to ni oun ko tii ni arun Coronavirus ni Naijiria, Cross Rivers ti pinnu lati ṣi awọn ile iwe rẹ lọjọ kẹrindinlogun, oṣu kẹfa, ọdun 2020, ṣugbọn o wọgi le ipinnu naa lẹyin akitiyan ijọba apapọ.

Ọkan lara awọn igbimọ aṣẹjọba ipinlẹ naa ṣo pe ijọba ipinlẹ ọhun yi ipinnu ṣiṣi ilwe iwe naa pada nitori ijọba apapọ ko faye gba a.

Bakan naa ni awọn ẹgbẹ kan, bi ẹgbẹ awọn dokita sọ pe o lewu lati ṣi awọn ile iwe pada lasiko naa.