సూలూరు సుబ్బారావు మర్డర్ కేసు: మహిళల వెంటపడే ఆయన ఎలా చనిపోయారు

సూలూర్ జమీందార్ సుబ్బారావు ఓ హత్య చేసి కోర్టు కేసు నుంచి తప్పించుకున్నారు. కానీ, ఆ హత్య తదనంతర ప్రతీకారాలు మాత్రం ఆయనను వదిలిపెట్టలేదు.

తమిళనాడులోని కోయంబత్తూరు ప్రాంతంలో దశాబ్దాల కిందట సంచలనం రేపిన క్రైం కథ ఇది.

ఐదేళ్లలోనే ఇక్కడ రెండు హత్యలు జరిగాయి. మొదటి ఘటనలో కోయంబత్తూరుకు చెందిన ఓ ఫొటోగ్రాఫర్ హత్యకు గురయ్యారు. ఆయనను హత్య చేశారని ఒక జమీందారుపై ఆరోపణలు వచ్చాయి. దీన్ని ‘కోయంబత్తూరు ఫొటోగ్రాఫర్ మర్డర్ కేస్’గా అప్పట్లో పిలిచేవారు.

కోర్టు నుంచి విడుదలైన కొన్నాళ్లకే కొందరు గుర్తు తెలియని వ్యక్తులు ఆ జమీందారును హత్య చేశారు. ఆ జమీందారు పేరు సుబ్బారావు. ఈ హత్య కేసును సూలూరు సుబ్బారావు హత్య కేసుగా పిలిచేవారు.

1920 జనవరి 16న మేకలను మేపుకొనే ఓ బాలుడు బాగా కుళ్లిపోయిన ఒక మృతదేహాన్ని చూశాడు. ఆ మృతదేహానికి తల లేదు. పోలీసులు అక్కడికి వచ్చి చూసినప్పుడు మొండెం మాత్రమే కనిపించింది.

ఆ మృతదేహం ఎవరిది?

దీనికి కొన్ని రోజుల ముందు సెబాస్టియన్ అనే వ్యక్తి పోలీసులకు ఫిర్యాదు చేశారు. తన తండ్రి, ఫొటోగ్రాఫర్ కురుస్వామి పిళ్లై కనిపించడంలేదని ఆయన ఫిర్యాదులో పేర్కొన్నారు.

తలలేని మృతదేహం కనిపించడంతో పోలీసులు సెబాస్టియన్‌ను పిలిచారు. ఆ మృతదేహం బట్టలను చూపించారు. అవి తన తండ్రివేనని ఆయన ధ్రువీకరించారు.

అప్పట్లో కోయంబత్తూరుకు సమీపంలోని సూలూర్‌లో సుబ్బారావు పెద్ద జమీందారు. ఆయన పేరిట చాలా భూములు ఉండేవి. అంతేకాదు ఈ కుటుంబానికి చుట్టుపక్కల ప్రాంతాల్లో చాలా పేరుంది. కానీ, సుబ్బారావు ఆ కుటుంబానికి చెడ్డ పేరు తెచ్చే పనులు చేసేవారని చెప్తారు.

మహిళలతో ఆయన చాలా దారుణంగా ప్రవర్తించేవారు. అలానే కురుస్వామి పిళ్లై కుమార్తెపై సుబ్బారావు కళ్లు పడ్డాయి.

ఆ అమ్మాయిని తన దారికి తెచ్చుకునేందుకు సుబ్బారావు చాలా ప్రయత్నించారు.

కానీ, వీటికి కురుస్వామి పిళ్లై అడ్డుపడేవారు.

జనవరి 13న కురుస్వామి పిళ్లై ఇంటికి ఇద్దరు వ్యక్తులు వచ్చారు. ఓ గ్రామంలో ఫొటోలు తీయాలని వీరిద్దరూ కురుస్వామికి చెప్పి, తీసుకెళ్లారు. అయితే, అలా వెళ్లిన కురుస్వామి పిళ్లై తలలేని మృతదేహంగా కనిపించారు.

కురుస్వామిని ఇంటికి నుంచి తీసుకెళ్లిన మొహమ్మద్ గౌస్, పొన్నుస్వామిలను పోలీసులు ఆ తర్వాత అరెస్టు చేశారు. వీరిద్దరూ సుబ్బారావు దగ్గర పనిచేసేవారు.

విచారణలో వీరిచ్చిన సమాచారం ఆధారంగా నాంజపన్‌ను అరెస్టు చేశారు. ఆయన సుబ్బారావుకు స్నేహితుడు. ఆ తర్వాత మరో వ్యక్తిని కూడా అరెస్టు చేశారు. చివరగా సుబ్బారావు కూడా అరెస్టు అయ్యారు. మొత్తంగా ఈ కేసులో ఐదుగురు అరెస్టు అయ్యారు.

నలుగురికి ఉరిశిక్ష

పోలీసుల సమాచారం ప్రకారం, కురుస్వామి పిళ్లైను మోసపూరిత మాటలతో మహమ్మద్ గౌస్, పొన్నుస్వామి కారులోకి ఎక్కించుకొని వెళ్లారు. ఆ కారును నడిపింది సుబ్బారావు. ఆ తర్వాత పిళ్లైను మొండెం నుంచి తలను వేరుచేసి, హత్య చేశారు.

కిడ్నాప్ కోసం ఉపయోగించిన కారును అద్దెకు తీసుకున్నారు.

ఈ కేసుపై కోయంబత్తూరు సెషన్సు కోర్టులో విచారణ జరిగింది. ప్రాసిక్యూషన్ తరఫున ఈఆర్ ఆస్బర్న్ మొదట వాదనలు వినిపించారు. ఆ తర్వాత ప్రముఖ లాయర్ ఈఎల్ ఎథిరాజ్ కూడా ప్రాసిక్యూషన్ తరఫున పనిచేశారు.

అప్పట్లో ఈ కేసులో జరిగే పరిణామాలపై ఆ చుట్టుపక్కల ప్రాంతాల్లో చాలా చర్చ జరిగేది.

మొత్తంగా ఈ కేసులో సుబ్బారావును నిర్దోషిగా జ్యూరీ ప్రకటించింది. అయితే, ఈ కేసును విచారించిన జేజే కాటన్ మాత్రం మిగతా నలుగురిని దోషులుగా గుర్తించారు. వీరికి మరణ శిక్ష విధించారు.

ఇక్కడ మరణ శిక్షను హైకోర్టు ధ్రువీకరించాల్సి ఉంటుంది. దీంతో ఈ కేసు హైకోర్టుకు వచ్చింది. మరోవైపు దోషులుగా నిరూపితమైన వ్యక్తులు కూడా అప్పీలు చేసుకున్నారు.

ఈ రెండు కేసులనూ కలిపే విచారణ చేపట్టారు. నిందితుల తరఫున ఆర్.శఠగోపాచార్య వాదనలు వినిపించారు. ఎర్డ్‌లీ నోర్టన్ ఆయనకు సాయం చేశారు. నాంజపన్ తరఫున మరో వ్యక్తి వాదనలు వినిపించారు.

సుబ్బారావును ఎవరు హత్య చేశారు?

దిగువ కోర్టులో కంటే హైకోర్టులో ఈ కేసు ప్రజల్లో మరింత ఆసక్తిని రేకెత్తించింది. అసలు దేని ఆధారంగా ఈ కేసులో ఆరోపణలు చేస్తున్నారని ఎర్డ్‌లీ ప్రశ్నించారు.

‘‘నిజంగా పిళ్లై కూతురిపై సుబ్బారావు కన్నువేస్తే ఆమెను ఎత్తుకుని వెళ్లేవారు. అసలు కురుస్వామిని పిళ్లైని ఎందుకు ఎత్తుకొస్తారు?’’ అని ఆయన ప్రశ్నించారు.

మరోవైపు ఆ మృతదేహానికి తల లేకపోవడంతో అసలు ఆ మృతదేహం కురుస్వామి పిళ్లైదేనని ఎలా చెబుతారు? అని ఆయన ప్రశ్నించారు.

ఆ మృతదేహానికి కురుస్వామి పిళ్లై బట్టలువేసి, కట్టుకథలు అల్లేస్తున్నారని ఆయన అన్నారు.

ఎర్డ్‌లీ వాదనతో జడ్జిలు ఐలింగ్, జేజే హ్యూగ్స్‌లు ఏకీభవించారు. అంతేకాదు, దిగువ కోర్టు ఇచ్చిన శిక్షను కొట్టివేశారు. పోలీసులను గట్టిగా మందలించారు.

ఆ వెంటనే, సుబ్బారావు, ఆయనతోపాటు ఉండేవారు జైలు నుంచి బయటకు వచ్చారు. ఆ తర్వాత కూడా సుబ్బారావు ధోరణి ఏమీ మారలేదు. అలానే కొన్ని సంవత్సరాలు గడిచాయి.

అయితే, 1925 ఏప్రిల్ 9న సేలంకు రెండు మైళ్ల దూరంలోని కన్నంపాలయంలో తన సేవకులతోపాటు సుబ్బారావు హత్యకు గురయ్యారు.

ఈ హత్య ప్రజలకు షాక్‌గా అనిపించలేదు. ఎందుకంటే కురుస్వామి పిళ్లైను హత్య చేసింది సుబ్బారావు మనుషులేనని, ఈ హత్యలతో పిళ్లై కుటుంబానికి న్యాయం జరిగిందని ప్రజలు భావించేవారు.

ఇవి కూడా చదవండి:

(బీబీసీ తెలుగును ఫేస్‌బుక్, ఇన్‌స్టాగ్రామ్‌, ట్విటర్‌లో ఫాలో అవ్వండి. యూట్యూబ్‌లో సబ్‌స్క్రైబ్ చేయండి.)