Police-cultists clash: Èèyàn méjì dèrò ọ̀run nínú ìkọlù ọlọ́pàá àtàwọn afurasí akẹ́kọ̀ọ́ ẹlẹ́gbẹ́ òkùnkùn Kwara Poly

Eeyan meji lo jẹ Ọlọrun nipe nigba tawọn akẹkọọ ile ẹkọ gbogbonṣe Kwara Poly kọlu awọn ọlọpaa niluu Ilorin lọjọ Abamẹta.

Iroyin sọ pe aṣita ibọn lo pa akẹkọọ kan ati ẹnikan to wa ladugbo ti iṣẹlẹ ọhun ti waye ni Elekoyangan.

A gbọ wi pe awọn sọja ni wọn pada lọ pẹtu si aawọ naa ki alaafia to jọba nibẹ.

Ileeṣẹ ọlọpaa ṣalaye ohun to ṣẹlẹ

Ileeṣẹ ọlọpaa ipinlẹ Kwara ṣalaye ninu atẹjade to fi sita pe rogbodiyan bẹ silẹ lẹyin tawọn ẹlẹgbẹ okunkun kọju ija sawọn ọlọpaa to wa lati Abuja fẹ mu awọn afurasi akẹkọọ ẹlẹgbẹ okunkun kan lagbegbe Elekoyangan.

Alukoro ileeṣẹ ọlọpaa, CSP Ajayi Okesanmi ni ọpọ ninu awọn ẹlẹgbẹ okunkun naa lo sapamọ lagbegbe Lajolo to wa lẹgbẹ ile ẹkọ naa.

Agbegbe yii ni a gbọ pe awọn ẹlẹgbẹ okunkun ti ṣe ikọlu si akẹkọọ kan ti orukọ rẹ n jẹ Idris Aderemi.

Okesanmi ni ''eyi gan an lo jẹ ki awọn ọlọpaa STS yabo agbegbe naa lai mọ pe awọn ẹlẹgbẹ okunkun naa gẹgun de wọn.

Ṣadeedee ni wọn bẹrẹ si ni yinbọn mọ bọọsi awọn ọlọpaa nibi ti ọlọpaa kan, Adebayo Abdulahi ti ṣeṣe lori.''

Ọwọ awọn ọlọpaa pada tẹ awọn ẹlẹgbẹ okunkun meji, Ahmed and ati Musibau 'm' ti inagijẹ rẹ jẹ Shaban.

Wọn ka ibọn pẹlu oriṣiiriṣii ọta ibọn ati iwe lilo ibọn mọ wọn lọwọ.

Awọn akẹkọọ yari

Lẹyin iṣẹlẹ yii ni awọn akẹkọọ pejọ biba ti wọn si di ọna iwaju ile ẹkọ naa.

Awọn akẹkọọ bẹrẹ si ni ṣe ifẹhonuhan, wọn sun taya mọto loju titi eleyii to da sun kẹrẹ fakẹrẹ ọkọ silẹ.

Awọn ọlọpaa naa lo pada ri i pe alaafia jọba nibẹ.

Ẹwẹ, awọn alaṣẹ ile ẹkọ naa ti sun idanwo to yẹ ko bẹrẹ lọjọ Abamẹta siwaju nitori iṣẹlẹ to ṣẹlẹ.