 |  | | Cyhoeddi dyfodiad yr Eisteddfod
Mai 2002
Ymhen ychydig dros flwyddyn, sef Wythnos y Sulgwyn 2003, bydd ein hardal gyfan yn croesawu Eisteddfod Genedlaethol Urdd Gobaith Cymru - Tawe, Nedd ac Afan. | | |
| Mae'n draddodiad cynnal Gwyl Cyhoeddi flwyddyn o flaen llaw, a digwyddodd hynny yng Nghastell-nedd ddydd Gwener a Sadwrn, Mai 3ydd a'r 4ydd.
Ar y Nos Wener, yn Neuadd Chwaraeon Cwrt Herbert, cynhaliwyd Cyngerdd y Cyhoeddi. Dau o fechgyn y teledu, sef Phyl Harries a Ieuan Rhys gyda'u doniolwch naturiol a gyflwynodd y talent lleol gyda Fflur Wyn yn canu rhai o'r ffefrynnau yn swynol.
Hudo gyda'u hofferynnau
Bu tri o Bedwarawd Nedd, sef Rhian Porter, Rahel Jones a Huw Daniel yn ein hudo gyda'u hofferynnau ynghyd â Chôr Telynau Sali Wyn a'u telynau. Hefyd cafwyd eitemau gan Ysgolion Cyfun Glanafan ac Ystalyfera.
I ddiweddu'r noson fe'n hysbrydolwyd gan gyflwyniad llafar effeithiol ieuenctid Ysgol Ystalyfera, cyflwyniad a berfformiwyd hefyd ar lwyfan y Brifwyl yn Eisteddfod Caerdydd yn ystod wythnos Eisteddfod yr Urdd eleni.
Mae'n werth cyhoeddi'r gân a ganwyd ganddyn nhw, cerdd o waith Eurig Davies. Prifathro Ysgol Gyfun Ystalyfera:
Gorwel pell uwchben y bae,
Eithin aur yn glogwyn dros y bryn;
Awyr las a llyfn yw'r llyn.
Llethrau'r grug yn borffor a gwyn.
Y fro a'r blaenau, clywch y gân.
O'r fferm a'r ffatri unwch;
Gwyr y ffwrnes, gwyr y wlad.
Y dur sydd yn eich gwâd.
Craith y gwaith ar Ian y bae.
Staen y dur ar fro rhwng môr a mynydd;
Aur y traeth a'i gwmni llon
Hyd y dwr yn heulwen y dydd.
Cysgod y castell a'i furiau llwyd.
A hanes gormes gweithwyr;
Saif y werin yn erbyn brad -
Y dur sydd yn ein gwâd.
Mae'r gân ym Margam i Gymru gyfan,
O bedwar ban, dewch atom, dewch i'r Wyl;
Y gân ym Margam sy'n uno'r cyfan,
Ar y maes yn un llais y codwn hwyl.
Hwyl a sbri wrth orymdeithio
Ar y Sadwrn canlynol casglodd cannoedd o blant, eu rhieni a'u hathrawon y tu allan i Neuadd Gwyn, Castell-nedd i orymdeithio trwy'r dref a thua Caeau Cwrt Herbert ar gyfer hwyl a sbri.
Arweiniwyd yr orymdaith gan Fand y Waun a braf oedd gweld cymaint o ysgolion lleol yn cael eu cynrychioli gan gynnwys Ysgolion Cymraeg Castell-nedd, Glynnedd, Blaendulais, Tyle'r Ynn, Rhos Afan, Pontardawe ynghyd ag Ysgolion Saesneg eu cyfrwng, megis Ysgol Gynradd y Gnoll ac Eastern Primary, Margam.
Hyfryd oedd gweld y plantos bach o Fudiad Ysgolion Meithrin yn mwynhau eu hunain hefyd. Wedi cyrraedd Cwrt Herbert roedd stondinau, ffair bleser, wal ddringo Glanllyn a sêr S4C Planed Plant yno i'w diddanu.
Roedd y tywydd o'u plaid hefyd a chafwyd dathliad teilwng i'r achlysur. Edrychwn ymlaen at groesawu Cymru gyfan i'n hardal ymhen y flwyddyn.
| | | |
|
|
