| Doniol iawn oedd clywed sut y cafodd ei enw. Roedd ei dad yn "ffanatig rygbi" ac yn chwaraewr da ac fe enwodd ei fab ar ôl y tref honno "Garyowen" yn Iwerddon a ddyfeisioddy gic enwog "up and under" . Bu ei fam yn ei arwain hyd Eisteddfodau'r wlad a bu'n adrodd yn Eisteddfod Pontiets am y tro cyntaf yn 5 mlwydd oed. Yn Ysgol Ystalyfera ymddiddorodd ym myd y Ddrama, ond dilyn cwrs yn y Gyfraith a wnaeth ym Mhrifysgol Aberystwyth. Pan ddychwelodd i'r Bont ddechreuodd gyflwyno rhaglenni ar Sain Abertawe a dyma fu'n brentisiaeth da iddo ar gyfer y dyfodol. Bu tri newyddiadurwr arall yn cyd-weithio gydag ef yn Sain Abertawe - Huw Edwards, Siân Thomas a Guto Harri. Mae ganddo ddiddordeb mewn pobl a'u hamgylchiadau a dros yr ugain mlynedd diwethaf mae'n cofio'n arbennig am Streic y Glowyr ac ymdrech y dynion a'r gwragedd i sicrhau dyfodol iddynt eu hunain a'u cymunedau. Daeth sawl cymeriad cryf i'r golwg yn y cyfnod yma ac mae'n cofio gyda gwên ymdrech menywod Blaendulais! Roedd bwrlwm yn y Newyddion yn y cyfnod yma ac roedd hefyd yn ddiwedd cyfnod pwysig yn ein hanes. Mae Garry Owen yn un o'n lleisiau a wyneb mwyaf cyfarwydd. Clywir ef ar Post Cyntaf rhwng 7 - 8.30 y bore ac ar y Newyddion ar S4C am 7.30. Braf yw gwrando arno a gweld y wên lydan a'r winc ddireidus.
 | 
