Bu Terry Adams yn un o'r rhai fu'n trefnu adeiladu peipen cludo olew o ddinas Baku yng ngwlad Azerbaijan i wlad Twrci, a'i brofiadau wrth fod yn y wlad anghysbell a garw honno oedd yr ysbrydoliaeth oedd ei angen ar gynhyrchwyr ffilmiau James Bond i greu stori addas ar gyfer y ffilm The World is Not Enough.
Gweld pobol amheus
Tra yn Azerbaijan fe ddaeth ar draws nifer o bobol amheus oedd eisiau siâr yn y fenter o gysylltu olew eu gwlad hwy gydag Ewrop a dyna yw sail y ffilm.
Mae'r wlad ar ei gliniau o ran arian, ac roedd y dynion lleol yn dwyn offer y cwmni olew er mwyn eu gwerthu i gael bwyd i'w gwragedd a'u plant.Oherwydd yr anhawster yma gwahoddodd Adams y bobol leol i'r cantîn bwyd a'u digoni a chynnig swyddi i'r lladron oedd yn dwyn yr offer. Mae'n cyfaddef mai dyna'r gweithwyr gorau iddo eu cyflogi erioed!
Am 35 mlynedd fe fu Terry Adams yn rheoli prosiectau tyllu am olew gwerth biliynau o ddoleri i gwmnïau fel Shell a BP yng ngwledydd Syria, Iran, Yemen a Sawdi Arabia.
Gallu uniaethu ei hun â'r bobol
Roedd Adams yn gallu uniaethu ei hun â phobol Azerbaijan oedd yn byw yng nghysgod gwlad imperialaidd Rwsia, gan ei fod wedi ei godi yn Gymro yng nghysgod grym Lloegr. Dywedodd "mae dod o Gymru yn rhoi mantais i chi wrth ddelio gyda'r lleiafrifoedd mewn gwledydd Arabaidd hefyd".
Mae Adams yn cyfaddef bod y ffaith ei fod yn Gymro wedi ei helpu wrth iddo sefydlu cysylltiadau busnes gyda Moslemiaid, sydd wrth reddf yn ddrwgdybus o'r Saeson.
Fe gafodd Terry Adams ei fagu ym mhentref Sgiwen yn dilyn yr Ail Ryfel Byd. Mynychodd Ysgol Ramadeg Castell-nedd yr un cyfnod â Tony Lewis y cyn-chwaraewr criced.
Wrth dyfu, roedd Terry Adams yn hoff iawn o farddoniaeth a gwleidyddiaeth. Mae'n sôn am David Adams, brawd ei dad, yn ennill Coron yr Eisteddfod Genedlaethol ym 1891, ond nid yw ef ei hun ddim yn medru'r Gymraeg.
 | 
