Gwariaf hanner fy amser yn y swyddfa a'r hanner arall yn cyfarfod â thrigolion y wlad, mewn ysgolion, colegau, wrth eu gwaith yn y ffatrïoedd neu allan yn y caeau. Rwy'n esbonio peryglon y clefyd ac yn awgrymu y dylai pawb ddefnyddio condoms wrth gael rhyw â'i gilydd. Er bod condoms yn brin iawn, mae modd cael gafael arnynt, ond mae trigolion Botswana yn amharod i newid eu dulliau caru.

Mae HIV/AIDS wedi effeithio ar dros drydedd rhan o'r boblogaeth ac eto mae cymaint yn amharod i wrando ac yn gwneud fy ngwaith yn rhwystredig iawn. Mae'n rhaid i mi bwysleisio iddynt fod:
AIDS yma yn eu mysg
AIDS yn lladd
AIDS wedi lladd - eu ffrindiau, cymdogion a theulu
a bod yn rhaid gweithredu ar frys i ddiogeli eu hunan a'r sawl yr ydynt yn eu caru.

Cyfartaledd oes bywyd person ym Motswana ar hyn o bryd yw 38 mlwydd oed. Bymtheng mlynedd yn ôl y ffigwr oedd 58 mlwydd oed. Pa ddyfodol sydd i'r wlad yma a'i phoblogaeth os bydd y duedd yma'n parhau.

Rhaid dyfalbarhau! Rhaid i mi gyfarfod â chymaint â phosibl o bobl a'u haddysgu a'u darbwyllo - dyna yw fy nod bersonol. Mae'n druenus gweld cymaint yn marw o'r clefyd ofnadwy yma, ag eto gydag ychydig o amynedd a synnwyr cyffredin gallant osgoi'r cyfan.Os oes diddordeb gennych yn fy ngwaith a'r sefyllfa ym Motswana, yna mae croeso i chwi gysylltu a mi drwy e-bost ar - schlabang@hotmail.com

Pob hwyl!
Rhian Curtis