Wo bí o ṣe lè dáàbò bo ara rẹ lásìkò ìwọ́de tó ń bọ̀ kí o má baà fara káásá

Yoruba bọ, wọn ni o n bọ, o n bọ, awọn la a dẹ ẹ de e; eyi gan an ni BBC Yoruba fi fẹ ki o mọ bi o ti le daabo bo ara rẹ lasiko ifẹhonuhan ‘ebi n pa wa’ ti yoo bẹrẹ kaakiri orilẹede Naijiria ni Ọjọbọ ti i ṣe ọjọ kinni oṣu Kẹjọ ọdun yii.

Bi ọjọ ṣe n sun mọ ọjọ kinni oṣu kẹjọ ti ifẹhonuhan yoo waye ni Aarẹ Bola Tinubu ti n ṣe oniruuru ipade pẹlu awọn gomina, ọba alaye, awọn olori ẹsin at'awọn mii tọrọ kan.

Aarẹ lo awọn ipade yii lati le jẹ kawọn alẹnulọrọ yii le b'awọn to n gbero lati ṣe ifẹhonuhan sọrọ ki wọn le wọgile iwọde ọhun.

Amọ, nibi ti ọrọ naa de duro bayii, o dabi ẹni pe iwọde naa yoo gberasọ l’Ọjọbọ lai ṣe ani ani.

Ti o ba gbagbe, ọpọ ọmọ Naijiria lo ti padanu ẹmi wọn ninu awọn iwọde kan to ti waye sẹyin ni Naijiria.

Wọnyii ni awọn nnkan ti o le ṣe lati daabo bo ara rẹ lasiko ifẹhonuhan.

Mọ ohun to n lọ ni ayika rẹ

Lara ohun ti o gbọdọ ṣe ni pe ki o mọ ohun to n lọ ni ayika rẹ lasiko ti ifẹhonuhan n lọ lọwọ.

Gbiyanju lati mọ awọn ọna ti awọn oluwọde yoo gba lasiko iwọde, ki o si tun mọ ibi ti wọn ti maa ko ara wọn jọ fun iwọde.

Bakan naa, mọ ọna ti o le gba kuro nibi iwọde naa ai baa mọ ti rogbodiyan ba bẹ silẹ; ti ọrọ si di ẹni ori yọ o dile.

Feti silẹ si iroyin tawọn ileeṣẹ iroyin n gbe jade lori iwọde to n lọ lọwọ, ki o si maa wo ori itakun ayelujara lati mọ ohun to n lọ lori iwọde naa kaakiri orilẹede Naijiria.

Mọ ẹtọ rẹ

Ohun kan ti o tun dabi rẹ ni pe o gbọdọ mọ ẹtọ rẹ.

Mọ ohun ti ofin sọ nipa ẹtọ rẹ lori ṣiṣe ifẹhonuhan.

Mọ ohun ti o le ṣe ati ohun ti o o le ṣe labẹ ofin lasiko iwọde.

Ri i daju pe o mọ nnkan ti o le ṣe to le jẹ ki o dero ahamọ ọlọpaa.

Daabo bo ara rẹ t’ọlọpaa ba yin taju taju

O le lo aṣọ ṣikaafu lati bo ẹnu ati imu rẹ tawọn ọlọpaa ba yin taju taju nibi iwọde.

Bakan naa, mu awo dani ti o le wọ ki taju taju ma baa ṣakoba fun oju rẹ.

Jinna si ibi tawọn eeayn ba ti n ba ara wọn ja lasiko iwọde.

Ma bẹru

Ti iwọde ba ti bẹrẹ, ri wi pe o duro gidigba lai bẹru.

Ti o ba ti ṣe akiyesi pe nnkan ti fẹ maa daru, o le ba ẹsẹ rẹ sọrọ ki o kuro nibẹ.

Tẹti si ohun tawọn adari ifẹhonuhan n sọ, ki o si tẹle ilana wọn pẹlu.

O ṣeeṣe ki wọn ti ba ijọba sọrọ lati pese eto aabo to peye fun wọn lasiko iwọde.

Ma jẹ kawọn eeyan mọ iru ẹni ti o jẹ

Ohun to tun da bii rẹ ni pe ma jẹ kawọn eeyan mọ iru eeyan ti o jẹ nibi ifẹhonuhan.

Ri i wi pe kii ṣe tabi ika rẹ ni o fi n ṣi foonu rẹ lasiko iwọde.

Ma ṣe sọ ohun kohun nipa rẹ fun ẹnikẹni nibi iwọde papaa julọ awọn eeyan ti o ko mọ.

Mura silẹ daadaa fun iwọde to n bọ

O ni lati wa ni imurasilẹ fun ifẹhonuhan nipa irufẹ aṣọ ti wa a wọ lọ sibẹ.

Wọ aṣọ to maa duro lara rẹ daadaa ti ko ni ṣe idiwọ fun ọ lati rin daadaa tabi sare.

Bakan naa, wọ bata gidi ti o le fi sare ti ọrọ ba bẹyin yọ nibi ifẹhonuhan.

Ma mu nnkan tawọn eeyan le jagba lọwọ rẹ lasiko iwọde dani.

Koda, o le mu aṣọ mii lọwọ ti o le wọ kawọn ma le da ọ mọ gan an.

Gbe omi dani, mu ipapanu ti o le sare jẹ ti ebi ba n pa ọ dani bakan naa.

Mo wo dani pẹlu, ki o si ri pe batiri foonu rẹ kun daadaa ki o ma ba ku.

Wa lojufo

Wo lojufo nibi iwọde tori ti nnkan ba dari.

Mọ ọna ti o le gba kuro nibi iwọde lati ibẹrẹ ifọhonuhan.

Ma da wa nibi kibi lasiko iwọde, ri wi pe o wa pẹlu awọn eeyan nigba gbogbo.

Ri i wi pe o wa pẹlu awọn ti ọrọ ara yin ba ye ara yin.

Mu ilera rẹ ni ọkun-kundun

Mu omi daadaa ki o ri pe oungbẹ ko gbẹ ọ lasiko iwọde.

Ri daju wi pe o mu ounjẹ to maa to ọ jẹ dani lo sibi ifẹhonuhan.

Ma ṣe ju ara rẹ lọ nibi iwọde.

Beere fun iranwọ ti o ba ti ri pe ara rẹ n ṣe bakan bakan.

Ti ilera rẹ ko ba gbe e mọ, tete ba ẹsẹ rẹ sọrọ ki o fi ibi iwọde silẹ.