Yoruba Nation: Ilana Omo Oodua ní pàbó ní aáyan Aregbesola láti tako ìyapa Nàíjíríà yóò já sí

Awọn ọmọ ẹgbẹ Ilana Omo Oodua, to jẹ ọkan pataki lara awọn ẹgbẹ to n pe fun iyapa ilẹ Yoruba kuro lara orilẹ-ede Naijiria ti fun minisita fun ọrọ abẹle, ọgbẹni Rauf Aregbesola lesi, lẹyin to sọrọ abuku saaju si awọn ọmọ ẹgbẹ naa.

Ninu atẹjade kan ti alukoro ẹgbẹ ọhun, Maxwell Adeleye buwọlu, wọn ni Aregbesola kii ṣe ọmọluabi, lo jẹ ko ri adari ẹgbẹ naa fin, iyẹn Ọjọgbọn Banji Akintoye.

Atẹjade naa ni "Awa ọmọ ẹgbẹ Ilana Omo Oodua labẹ akoso Ọjọgbọn Banji Akintoye fẹ sọ ni gbangba pe, Aregbesola kii ṣe ọmọlubai lo jẹ ko gboju-gboya lati pe ẹgbẹ baba rẹ ni omugọ."

Wọn ni gẹgẹ bii minisitia lori ileeṣẹ ijọba to n ri si ọrọ abẹle, o yẹ ki Aregbesola le e bojuto awọn ẹnubode Naijiria, ti awọn atọhunnrinwa darandaran to n da Naijiria laamu, n gba wọle.

Atẹjade ọhun tẹsiwaju pe "Lẹyin wakati diẹ ti Aregbesola dunkoko mọ ẹya Yoruba tan, ni awọn ọdaran daradaran kọlu Igangan, lagbegbe Ibarapa nipinlẹ Oyo.

Nibẹ lo ni wọn ti gba ọpọ ẹmi, ti wọn si tun ba ọpọ dukia olowo iyebiye jẹ."

"Titi di akoko yii Aregbesola ko tii fi atẹjade kankan sita lati bu ẹnu ẹtẹ lu ikọlu ọhun."

Ilana Omo Oodua wa n beere lọwọ minsita naa boya oponu ni gbogbo awọn ogunlọgọ eeyan to n darapọ mọ ijijagbara Yoruba Nation lojojumọ.

Wọn ni "Ṣe nnkan ti Aregbosola n sọ ni pe oponu ni nnkan bii ẹgbẹrun lọna ogoji eeyan to darapọ mọ iwọde wa niluu Ado Ekiti?

Abi awọn ogunlọgọ to darapọ mọ wa nipinlẹ Osun, to jẹ ipinlẹ ti oun funra rẹ ti ṣe ijọba le lori tẹlẹ?"

Atẹjade naa sọ siwaju si pe, olori pipe ni awọn ọmọ Ilana Omo Oodua, ko si omugọ kankan laarin wọn.

Alukoro ẹgbẹ ọhun ni ẹru Fulani ni Aregbesola, ara lo si n ta a nitori itẹsiwaju to n waye ninu ijijagbara ti awọn n ṣe.

Maxwell pari atẹjade ọhun pe, pabo ni gbogbo akitiyan Aregbesola atawọn to n ṣiṣẹ fun yoo ja si lẹyin o rẹyin nitori ipinnu awọn araaalu lo maa n pada ṣẹ ninu ijọba awarawa.

Bi ẹ ko ba gbagbe, ṣaaju ni Aregbesola ti kọkọ ṣapejuwe awọn to n pe fun idasilẹ orilẹ-ede Yoruba ati Biafra, gẹgẹ bii alamọkan ati omugọ eeyan.

O ni idasilẹ awọn orilẹ-ede ti wọn n pe fun, le yọri si ogun abẹle, eyii ti ko ni tan nilẹ fun nnkan bii aadọta ọdun si asiko yii.

Aláìmọ̀kan àti òmùgọ̀ ló ń pè fún ìdásílẹ̀ Yorùbá Nation - Aregbesola

Saaju la ti mu iroyin wa fun yin pe, Minisita feto abẹle ni Naijiria, Rauf Aregbesola ti bẹnu atẹ lu awọn to n beere fun idasilẹ orilẹede Yoruba ati Biafra ni Naijiria.

Aregbesola wa ṣe apejuwe awọn ajijagbara yii gẹgẹ bi ''alaimọkan ati omugọ eeyan''

Minisita fọrọ abẹle naa woye ọrọ yii lasiko ayẹyẹ ọjọ ibi rẹ to waye ni Ijebu-jẹsa.

Aregbesola kilọ pe wahala ti wọn n da silẹ yii le yi gbogbo Naijiria ka, to si le da ogun ti yoo ja fun aadọta ọdun silẹ.

O ni ''ikilọ pataki mi fun ẹyin tẹ wa nibi ni ki ẹ mọ pe, omugọ ati alaimọkan lawọn to n pe fun idasilẹ orilẹede Yoruba ati Biafra, ti wọn o si mọ nkan ti ipe naa le bi.

Idi ni pe ọla Naijiria lawọn orileede ilẹ okere n wo, ti wọn fi n gboṣuba fun awa alawọdudu lagbaye.

Boya awọn ajijagbara ko mọ pe bi ogun ba fi bẹ silẹ, aadọta ọdun loni, o le ma pari.

Àwọn iròyin tì ẹ leè ní ìfẹ̀ síí:

Nitori naa o yẹ ki a fi tọkan tọkan daabo bo isọkan wa, lootọ nkan ko ri bo se yẹ amọ mo lero pe iṣejọba bo ti ṣe yẹ lo tọ ki a maa beere dipo ijagbara ki a tu Naijiria ka''

Gomina tẹlẹ nipinlẹ Osun naa fi kun ọrọ rẹ pe, awọn ọmọde ati arugbo ni wahala ogun yoo ṣakoba fun ju lọ, nitori naa, o yẹ ki wọn ro ọrọ yii daada ki wọn to maa lulu ogun ati ọtẹ.

O tẹnumọ pe ki ẹnikẹni to ba fẹ ogun abẹle silẹ ni Naijiria pa ara rẹ tabi ki irufẹ ẹni naa fi Naijiria silẹ.

''A gbọdọ gbaruku ti Naijiria ni, ori bibẹ kọ loogun ori fifọ''