కింగ్ చార్లెస్ 3: దేశాధినేతగా రాజును ఆమోదించాలా? రిపబ్లిక్ దేశంగా మారాలా? - రిఫరెండం చేపడతామన్న ఆంటిగ్వా

అంటిగ్వా అండ్ బార్బుడా ప్రధాన మంత్రి గాస్టన్ బ్రౌన్

ఫొటో సోర్స్, Getty Images

ఫొటో క్యాప్షన్, ఆంటిగ్వా అండ్ బార్బుడా ప్రధాన మంత్రి గాస్టన్ బ్రౌన్
    • రచయిత, మ్యాట్ మర్ఫీ
    • హోదా, బీబీసీ న్యూస్

రిపబ్లిక్ దేశంగా మారాలా? వద్దా? అనే అంశంపై ఆంటిగ్వా మరియు బార్బుడా దేశం ఓటింగ్‌ను నిర్వహిస్తుందని ఆ దేశ ప్రధాన మంత్రి గాస్టన్ బ్రౌన్ చెప్పారు.

మూడేళ్లలో దీనిపై ప్రజాభిప్రాయ సేకరణ (రిఫరెండం) జరుగొచ్చని ఆయన ఆశాభావం వ్యక్తం చేశారు.

చార్లెస్ 3ను బ్రిటన్ కొత్త రాజుగా, కరీబియన్ దేశానికి అధిపతిగా ప్రకటించిన తర్వాత ప్రధాని ఈ వ్యాఖ్యలు చేశారు.

వచ్చే ఏడాది ఒకవేళ మళ్లీ తాను ప్రధానిగా ఎన్నికైతే ప్రజాభిప్రాయ సేకరణ చేపట్టాలని భావిస్తున్నట్లుగా బ్రౌన్ తెలిపారు.

'హౌజ్ ఆఫ్ రిప్రజెంటేటివ్స్'లోని 17 సీట్లలో గాస్టన్ బ్రౌన్ పార్టీకి 15 సీట్లు ఉన్నాయి. వచ్చే ఏడాది గెలుపుపై ఆయన ఆశాభావం వ్యక్తం చేశారు.

వీడియో క్యాప్షన్, క్వీన్ ఎలిజబెత్ 2: ‘మా జీవితంలో మళ్లీ మేం ఒక రాణిని చూడలేం’ - బ్రిటన్ ప్రజలు

ఆస్ట్రేలియాలోనూ చర్చ..

అయితే, రాబోయే నాలుగేళ్లలో ఇలాంటి ప్రజాభిప్రాయ సేకరణ ఉండబోదని ఆస్ట్రేలియా పేర్కొంది.

క్వీన్ ఎలిజబెత్ 2 మరణం, ఆస్ట్రేలియాలో రాచరికంపై మరోసారి చర్చకు దారి తీసింది.

ఆస్ట్రేలియాకు నూతన ప్రధానిగా మే నెలలో ఎన్నికైన ఆంథోనీ ఆల్బనీస్ ఒక రిపబ్లికన్.

''మన రాజ్యాంగానికి సంబంధించిన ప్రశ్నలు ఇప్పుడు అడగాల్సినవి కావు. ఎందరో ఆస్ట్రేలియన్లు ఈ క్షణంలో అనుభవిస్తోన్న బాధను పంచుకోవాల్సిన తరుణం ఇది. ఆస్ట్రేలియాకు క్వీన్ అందించిన సహకారం పట్ల ప్రగాఢమైన గౌరవం, అభిమానాన్ని చూపెట్టాలి'' అని స్కై న్యూస్‌తో ఆంథోనీ అన్నారు.

యూకేతో పాటు మరో 14 దేశాలకు కూడా కింగ్ చార్లెస్ 3 అధిపతిగా ఉంటారు.

ఆంటిగ్వా అండ్ బార్బుడా, ఆస్ట్రేలియా, ద బహమాస్, బెలిజ్, కెనడా, గ్రెనెడా, జమైకా, న్యూజీలాండ్, పపువా న్యూ గినియా, సెయింట్ కీట్స్ అండ్ నెవిస్, సెయింట్ లూసియా, సెయింట్ విన్సెంట్ అండ్ ద గ్రెనడెన్స్, సోలోమన్ ద్వీపాలు, తువాలు దేశాలకు ఆయనే అధిపతిగా వ్యవహరిస్తారు.

వీడియో క్యాప్షన్, కలిసి కనిపించిన అన్నదమ్ములు విలియం, హ్యారీ

రాచరిక పాలన పాత్ర గురించి పలు దేశాలు పునఃసమీక్షిస్తున్నాయి.

గణతంత్ర రాజ్యంగా మారడం అంటే, ''నిజమైన సార్వభౌమాధికార దేశంగా మారడానికి స్వతంత్రం అనే వృత్తాన్ని పూర్తి చేయడంలో తుది దశ'' అని బ్రౌన్ చెప్పారు.

గతేడాది బార్బడోస్ గణతంత్ర దేశంగా మారింది. దేశాధిపతిగా క్వీన్ స్థానంలో తొలి అధ్యక్షురాలిని బార్బడోస్ దేశ పార్లమెంట్ ఎన్నుకుంది.

72 ఏళ్ల సాండ్రా మేసన్ ఆ దేశానికి తొలి అధ్యక్షురాలు అయ్యారు.

జమైకాలోని అధికార లేబర్ పార్టీ కూడా గణతంత్ర రాజ్యంగా మారడానికి రిఫరెండాన్ని నిర్వహించడమే తమ లక్ష్యమని చెబుతోంది.

ఇవి కూడా చదవండి:

(బీబీసీ తెలుగును ఫేస్‌బుక్, ఇన్‌స్టాగ్రామ్‌, ట్విటర్‌లో ఫాలో అవ్వండి. యూట్యూబ్‌లో సబ్‌స్క్రైబ్ చేయండి.)