Olubadan: Aáwọ̀ ń parí láàrín ìgbìmọ̀ lọ́ba-lọ́ba nílẹ̀ Ibadan

Dukuu to n jẹyọ laarin Olubadan atawọn agba oye ti ijọba ana ni ipinlẹ Ọyọ gbe ade le lori, n ṣebi eyi ti n jẹ rodo lọ momi bayii.

Ni ọjọ Aje ni awọn agba oye to jẹ igbimọ Olubadan lọ ṣe baba kẹẹ pẹ si Olubadan laafin rẹ ni Popoyemọja nilu Ibadan, lasiko ayẹyẹ to fi n sami ọjọ ibi ọdun kọkanlelaadọrun rẹ loke erupẹ.

Àwọn iròyin tì ẹ leè ní ìfẹ̀ síí:

Pataki ohun toju ri nibi abẹwo wọn naa ni pe awọn agba oye naa ko wa pẹlu ade wọn, ti wọn si dọbalẹ gbalaja lati ki Olubadan.

Lara awọn agba oye mẹsan ilẹ Ibadan, mẹfa lo wa nibi abẹwo naa. Iyẹn Otun Olubadan, Lekan Balogun ati Balogun Owolabi Olakulehin.

Awọn yoku ni Osi Balogun Tajudeen Ajibola; Asipa Olubadan, Eddy Oyewole; Ekarun Olubadan Amidu Ajibade ati Ekarun Balogun Kola Adegbola.

Nibẹ ni wọn ti darapọ mọ awọn agba oye yoku bii Iyalode ilẹ Ibadan, Oloye Theresa Oyekanmi; Agbaakin Olubadan, Lekan Alabi atawọn Mọgaji ati Baalẹ.

Laipẹ yii ni iroyin gbe e pe, awọn agba oye ti wọn gbe ade le lori naa ti fi igba kan faake kọri pe, ko sẹni to lee gba kanbo lọwọ imu, ko si ẹni to lee gba ade naa lori awọn.

Sugbọn Olubadan ko dẹkun ipe rẹ pe gbogbo awọn agba oye naa lo gbọdọ gbe ade wọn silẹ nitori ọba meji kii wa ni aafin.

Ọpọ lo ti n ri igbesẹ ọjọ Aje naa gẹgẹ bii eyi ti o n ṣe afihan pe, alaafia ti n pada si aarin igbimọ lọbalọba ilu Ibadan.