ప్రైవేట్ కోచింగ్ సెంటర్లలో 16 ఏళ్లలోపు వారిని చేర్చుకోవద్దు.. కేంద్రం కొత్త నిబంధనలు

ప్రైవేట్ కోచింగ్ సెంటర్లకు కేంద్ర విద్యా మంత్రిత్వ శాఖ కొత్త మార్గదర్శకాలు విడుదల చేసింది.

విద్యార్థుల మానసిక ఆరోగ్యం, బోధనలో సమగ్రత, ఫీజుల నియంత్రణను దృష్టిలో ఉంచుకుని ఈ నిబంధనలను రూపొందించారు.

విద్యార్థుల ఆత్మహత్యలు, తరగతి గదుల్లో అగ్ని ప్రమాదాలు, సౌకర్యాలు లోపించడం వంటి వాటిని కూడా ఈ నిబంధనలు రూపొందించేటప్పుడు ప్రభుత్వం పరిగణనలోకి తీసుకుంది.

ఈ సందర్భంగా కేంద్ర ప్రభుత్వం.. చట్టవిరుద్ధంగా సాగుతున్న ప్రైవేట్ కోచింగ్ సెంటర్ల వ్యవహారాన్ని ప్రస్తావించింది.

ఎలాంటి నియంత్రణా లేకపోవడం వల్ల దేశంలో చట్టవిరుద్ధంగా సాాగే ప్రైవేట్ కోచింగ్ సెంటర్లు పెరుగుతున్నాయని కేంద్ర ప్రభుత్వం తన లేఖలో పేర్కొంది.

అలాంటి సెంటర్లు విద్యార్థుల నుంచి ఇబ్బడిముబ్బడిగా ఫీజులు వసూలు చేస్తున్నాయని, విద్యార్థులపై ఒత్తిడి తీసుకొచ్చి వారు ఆత్మహత్య చేసుకునేలా చేస్తున్నాయని తెలిపింది. ఈ విషయాలు ఎన్నోసార్లు చర్చకు వస్తున్నాయని, పార్లమెంట్‌లో పలు ప్రశ్నలు లేవనెత్తుతున్నారని చెప్పింది.

వీటన్నింటిన్నీ పరిగణనలోకి తీసుకున్న కేంద్ర ప్రభుత్వం ప్రైవేట్ కోచింగ్ ఇన్‌స్టిట్యూట్ల కోసం నియమ, నిబంధనలను రూపొందించింది.

ఒక బ్యాచ్‌లో ఎంతమంది విద్యార్థులుంటారో ముందే చెప్పాలి

ఫీజులు, క్లాస్ రూమ్(భవంతి), బోధన పద్ధతులు, అధ్యాపకులు, తరగతుల వ్యాపార ప్రకటనల నిబంధనలను కేంద్రం తన రెగ్యులేషన్‌ ఆదేశాలలో స్పష్టం చేసింది.

టెన్త్ క్లాస్ తరువాతే

ఫీజుల గురించిన నిబంధనలు

పలు కోర్సులకు విధించే ఫీజులు పారదర్శకుండా, సమంజసంగా ఉండాలి. విద్యార్థులు ఫీజులను చెల్లించిన తర్వాత రశీదులు తప్పనిసరిగా వారికి అందించాలి.

ఒకవేళ విద్యార్థులు ఎవరైనా కోర్సును మధ్యలో వదిలేస్తే, ‘ప్రో-రోటా’ బేసిస్‌లో 10 రోజుల లోపల మిగిలిన మొత్తాన్ని కోచింగ్ క్లాస్‌లు రీఫండ్ చేయాలి. ఒకవేళ విద్యార్థి హాస్టల్‌లో నివసిస్తున్నట్లు అయితే, దానిలో హాస్టల్, మెస్ ఫీజులు కూడా కలిసి ఉండాలి.

ఒకసారి పేరు నమోదు చేసుకున్న తర్వాత, ఫీజులు, కోర్సులను పెంచకూడదు. కోచింగ్ క్లాస్ భవంతి కచ్చితంగా ‘ఫైర్ సేఫ్టీ కోడ్’ను, ‘బిల్డింగ్ సేఫ్టీ కోడ్’ను అనుసరించాలి.

విద్యార్థుల అవసరమైనప్పుడు సాయపడేలా ప్రాథమిక చికిత్సా కిట్, వైద్య సదుపాయాలు తప్పనిసరిగా కోచింగ్ సెంటర్లలో ఉండేలా చూసుకోవాలి.

కోచింగ్ సెంటర్ బిల్డింగ్‌లో ప్రతి తరగతి గదికి వెంటిలేషన్ ఉండాలి. బయట నుంచి వచ్చే శబ్దాలు, వేడిమి నుంచి తరగతి గదులకు రక్షణ ఉండాలి. అవసరమైన సూర్య కాంతి తరగతి గదిలో పడేలా చూసుకోవాలి.

అదేవిధంగా, మంచినీటి సదుపాయం, ఫిర్యాదుల బాక్స్, సీసీటీవీ కెమెరాలు, పురుషులకు, మహిళలకు ప్రత్యేకంగా వేరువేరుగా మరుగుదొడ్లు వంటి సౌకర్యాలు కోచింగ్ సెంటర్లలో ఉండాలి.

ఇవి కూడా చదవండి:

(బీబీసీ తెలుగును ఫేస్‌బుక్ఇన్‌స్టాగ్రామ్‌, ట్విటర్‌లో ఫాలో అవ్వండి. యూట్యూబ్‌లో సబ్‌స్క్రైబ్ చేయండి.)