దేవుడికి జ్వరం వచ్చింది, 15 రోజులు దర్శనాలు లేవు!

పూరీలో ఉన్న జగన్నాథుడుకీ ఆయన అన్న బలరాముడికీ, చెల్లెలు సుభద్రకీ జ్వరం వచ్చింది. అందుకే ఆ గుడిలో 15 రోజులు దర్శనాలు నిలిపేశారు.

నిజమే.. ప్రతీ ఏటా పూరీలో దేవుడికి జ్వరం వస్తే నయం అయ్యే వరకూ దర్శనాలుండవు. పూజలుండవు. జ్వరం తగ్గాకే అన్నీ..

జ్యేష్ఠ పౌర్ణమి (2023 జూన్ 4) రోజు జగన్నాథుడి పుట్టిన రోజు అని భక్తుల నమ్మకం. జగన్నాథ రథోత్సవం జూన్ 20 నుంచి మొదలవుతుంది.

జగన్నాథుడి పుట్టిన రోజును పూరీలో స్నాన యాత్ర లేదా స్నాన పౌర్ణమి అని కూడా అంటారు.

ఆ రోజు పూరీ మూల విరాట్‌కి 108 కుండలతో అభిషేకం చేస్తారు. అభిషేకం తరువాత ఏనుగు తొండం తరహాలో గజ వేషంలో దేవుణ్ణి అలంకరిస్తారు.

అయితే ఇలా 108 కుండల నీళ్లలో తడిసిపోవడంలో భగవంతుడికి జ్వరం వచ్చిందని దేవాలయ పూజారులు ప్రకటిస్తారు.

‘‘పూరీ గుడి ప్రాంగణంలో బంగారు బావి (సోనా కువా) అని ఒకటి ఉంటుంది. శీతలా దేవి ఆ బావిని కాపాడుతుంది. ఆ బావి ఏడాదికి ఒకసారి తెరచి అందులో నీళ్లతో స్వామికి అభిషేకం చేస్తారు. ఆ రోజు గర్భాలయం నుంచి మూల మూర్తులను తెచ్చి స్నానవేది అనే చోట భక్తులందరికీ కనిపించేలా విగ్రహాలను ఉంచి ఈ బావి నీటితో 108 బిందెలతో అభిషేకం చేస్తారు.

అన్ని నీళ్లలో తడిస్తే మనకు కూడా జలుబు చేస్తుంది కదా.. అలానే స్వామి వారికి కూడా అనారోగ్యం కలిగినట్టుగా చేస్తారు. అలంకరణలు తీసేసి, మఫ్లర్లు చుట్టి అచ్చం జ్వర బాధితుడిలానే ఉంచుతారు. గర్భాలయంలో రత్నవేదికి (మూల విగ్రహాలు పెట్టే వేదిక) ఎడమ పక్కన ఒక ఖాళీ స్థలంలో మూర్తులను పడుకోబెడతారు.’’ అంటూ అక్కడ జరిగే ప్రక్రియను బీబీసీకి వివరించారు ఆధ్యాత్మికవేత్త నండూరి శ్రీనివాస్.

ఈ పదిహేను రోజులనూ అనాసారగా పిలుస్తారు. ఈ సమయంలో భక్తుల కోసం గర్భ గుడిలో జగన్నాథుడి పాత చిత్రాలు (పెయింటింగ్) ప్రదర్శిస్తారు.

సాధారణంగా పూరీ అంటేనే ప్రసాదాలకు ఫేమస్. అక్కడ దేవుడికి అనేక రకాల నైవేద్యాలు పెడతారు. చప్పన్ భోగ్గా పిలిచే 56 రకాల నైవేద్యాలు ఏడాది పొడవునా పెడతారు.

‘‘కానీ ఈ 15 రోజులు ఆ నైవేద్యాలు కూడా పెట్టరు. నైవేద్యం బదులు మందులే ఇస్తారు’’ అన్నారు శ్రీనివాస్. దేవుడికి ఆయుర్వేద మందులు ఇస్తారు.

15 రోజుల తరువాత దేవుడికి నయం అయిపోయిందని రాజవైద్యుడు ప్రకటిస్తాడు. అభిషేకం వల్ల విగ్రహాలకు రంగు వెలుస్తుంది కాబట్టి కొత్త రంగులు వేస్తారు.

జ్వరం తరువాత రథయాత్రకు ఒకరోజు ముందు దేవుడు దర్శనం ఇస్తాడు. దాన్ని నవయవ్వన దర్శనం అంటారు. అప్పుడు రథ యాత్ర ప్రారంభిస్తారు.

‘‘అఖిలాండ కోటి బ్రహ్మాండ నాయకుడికి జ్వరం ఏంటని అనుకోవచ్చు. చిన్న పిల్లాడు బొమ్మ తుపాకి పట్టుకుని తండ్రికి చూపించి పేల్చగానే తండ్రి కింద పడిపోయినట్టు చేస్తాడు. అది నిజం కాకపోయినా పిల్లాణ్ణి సంతోషపరచడానికి. ఇదీ అలాంటిదే. సాక్షాత్తూ దేవదేవుడే అయినప్పటికీ, శరీరంతో ఆయన అక్కడ ఉన్నాడని భావించి, మనిషికి చేసినట్టే సపర్యలు చేస్తారు భక్తులు.’’ అని పూరీలో సంప్రదాయల గురించి వివరించారు నండూరి శ్రీనివాస్.

‘‘అక్కడ ఉన్నది విగ్రహం అని ఎవరూ అనుకోరు. ఆయన విగ్రహాలు శరీరంగానూ, అందులోని రహస్య పదార్థం ఆత్మలానే చూస్తారు. అందుకే అక్కడ దేవుడికి ప్రతిరోజూ ఉదయం పళ్లుతోముతారు (దంతధావనం). బుధవారం సాయంత్రం పూట గెడ్డం గీస్తారు (క్షుర కర్మ).’’ అని వివరించారు నండూరి శ్రీనివాస్.

రథయాత్రకు విగ్రహాలను తీసుకెళ్లే పద్ధతి కూడా ప్రత్యేకంగా ఉంటుంది. ఆదివాసీ తెగలకు చెందిన విశ్వావసువు అనే వ్యక్తి వారసులే ఈ విగ్రహాలను రథయాత్రకు తీసుకువస్తారు. వారు నృత్యం చేస్తూ విగ్రహాలను తెస్తారు.

చరిత్రలో ముస్లింలు ఈ ఆలయంపై చాలా సార్లు దాడి చేశారు. బౌద్ధులు కూడా దాడులు చేశారు. దాంతో ఇక్కడి విగ్రహాలను రహస్యంగా దాచి పెట్టాల్సిన పరిస్థితులు ఏర్పడ్డాయి.

‘‘గతంలో ఒకసారి బౌద్ధులు ఈ ఆలయంపై దాడి చేసి అక్కడ బౌద్ధ ధర్మాన్ని స్థాపించే ప్రయత్నం చేశారు. దీంతో దైత్య పాండాలు ఆ విగ్రహాలను గుండీచా ఆలయంలో దాచారు. అన్నీ సద్దుమణిగాక ఆ విగ్రహాలను తిరిగి తెచ్చి అక్కడ ప్రతిష్టించారు. ఆ ఘటనలకు గుర్తుగా ‘పాండు విజయం’ పేరుతో నృత్యం చేస్తూ దేవుణ్ణి రథం దగ్గరకు తీసుకు వస్తారు.

రథయాత్ర ప్రారంభించే ముందు స్థానిక గజపతి రాజ వంశానికి చెందిన వారు రథం ముందు కస్తూరి కళ్లాపిజల్లి, బంగారు చీపురుతో ఊడ్చుతారు. తరువాత రథయాత్ర ప్రారంభం అవుతుంది" అని చెప్పారు నండూరి శ్రీనివాస్.

పూరీలో ఎన్నో ప్రత్యేకతలు:

ఇవి కూడా చదవండి:

(బీబీసీ తెలుగును ఫేస్‌బుక్, ఇన్‌స్టాగ్రామ్‌, ట్విటర్‌లో ఫాలో అవ్వండి. యూట్యూబ్‌లో సబ్‌స్క్రైబ్ చేయండి.)