Ўзбекистон: Мамлакатдан чиқарилмаган Жаҳонгир Отажонов, 18 йилда прописка олган Мирзиёев ва қандай жарималар кескин камайтирилмоқда? O‘zbekiston Mirziyoyev dunyo yangiliklar

"Бу одам тадбиркор"

19 октябрь куни президентликка номзод Шавкат Мирзиёев пойтахт Тошкентдаги Талабалар шаҳарчасида сайловчилар билан учрашган.

Учрашув чоғида Тошкент шаҳрининг иқтисодий имкониятларига тўхталиб ўтган номзод нега Жаҳонгир Ортиқхўжаевни пойтахт ҳокими этиб танлагани ҳақида гапирган.

"Бу одам тадбиркор. Тадбиркорлик билан пойтахтни ривожлантириши учун бу лавозимни бердик. Замон шиддат билан ўзгаряпти. Тадбиркорлик замон талаби бўляпти.

Энди Ортиқхўжаев ҳам керак бўлса 10 баробар кўпроқ ҳаракат қилиши лозим", президентликка номзод сўзларини келтирган Kun.uz нашри.

Учрашув давомида Мирзиёев қандай қийинчиликлар билан Тошкент пропискасига эришгани тўғрисида ҳам сўзлаган.

"…Жиззах вилоятида туғилганман, лекин 18 ёшимдан буён Тошкентдаман, яъни мен барча таълим-тарбияни сизлардан олганман.

Ижараларда яшаганман, қийинчиликларни кўрганман. Мен бежиз уй-жой масаласига жиддий қарамайман. Ўзим бу муаммоларни ҳис қилганман. 18 йил прописка муаммоси билан яшаганман. Мана, муаммо ечимини қилса бўлар эканку!".

"Бу - мухолиф сиёсатчи ҳуқуқининг поймол қилиниши"

Хонанда Жаҳонгир Отажонов Мажбурий ижро бюроси томонидан қўйилган тақиқ туфайли Туркияга учиб кета олмаганини таъкидлаган видеомурожаат тарқатган.

Видеомурожаатда Отажонов ўғлини даволатиш мақсадида Урганч аэропортидан Истанбулга учиб кетар чоғи унинг мамлакатдан чиқишига тақиқ қўйилганидан хабар топганини билдирган.

Хонанданинг сўзларига кўра, расмийлар унга қўйилган тақиқ сабабини алимент тўловлари юзасидан МИБдан қарздорлиги билан изоҳлаган, аммо Отажоновнинг ўзи видеомурожаатда алиментни вақтида тўлаб келганини таъкидлайди.

19 октябрь куни хонанданинг иддаоларига муносабат билдирган МИБ унинг Ўзбекистондан чиқиш ҳуқуқи вақтинча чекланганини тасдиқлаган.

Расмий баёнотда маълум қилинишича, Отажоновга нисбатан судларнинг тегишли қарорлари билан уч фуқаро фойдасига уч нафар вояга етмаган фарзандлари учун алимент ундиришга оид учта ижро иши юритилган.

"Хусусан, Фуқаролик ишлари бўйича Урганч туманлараро судининг ижро ҳужжатларига асосан қарздор Ж.Отажоновдан ундирувчилар М.С. ва Е.И. фойдасига алимент ундириш белгиланиб, Бюронинг Юнусобод туман бўлими томонидан мажбурий ижро ҳаракатлари олиб борилган ва унинг Ўзбекистон Республикасидан чиқиш ҳуқуқи "Суд ҳужжатлари ва бошқа органлар ҳужжатларини ижро этиш тўғрисида"ги Қонуннинг 42-1-моддасига асосан вақтинча чекланган.

Фуқаро С.Ф. фойдасига алимент ундириш тўғрисидаги ижро ҳужжати эса, унинг аризасига асосан ижросиз қайтарилган ва ижро иши тамомланган", дейилади МИБ баёнотида.

Бундан аввал яқинларининг талаби билан сиёсий фаолият ва президент сайловида иштирок этиш мақсадларидан воз кечганини эълон қилган Отажонов 17 октябрь куни тарқатган видеомурожаатида ушбу ҳолатни "президент сайлови олдидан мухолиф сиёсатчи инсоний ҳақ-ҳуқуқларини поймол қилиниши" ўлароқ баҳолаган.

Камайтирилган жарималар

Қонунчилик палатаси депутатлари беш турдаги жарималар миқдорини кескин камайтириш кўзда тутилган қонун лойиҳасини учинчи ўқишда қабул қилган.

Эндиликда, муддати ўтган суғурта полиси ёки суғурта полисида назарда тутилмаган шахс автотранспорт воситасини бошқарганлиги учун жарима миқдори икки бараварга камайтирилади.

Шунингдек, транспорт воситалари эгалари томонидан суғурта полисини олмаганлик учун жарима фуқароларга икки бараварга, мансабдор шахсларга эса учдан бир қисмга камайтирилмоқда.

Фуқаролар томонидан валюта қийматликларини ноқонуний олиш ёки ўтказиш учун жарима миқдори базавий ҳисоблаш миқдорининг ўн бараваридан йигирма бараваригача бўлган миқдор оралиғида белгиланмоқда.

Қонун лойиҳаси билан бухгалтерия ҳисоби ва ҳисоботи тартибини бузганлик учун мансабдор шахсларга нисбатан жарималар миқдорини деярли икки бараварга, йўловчиларни лицензиясиз ташиш билан шуғулланганлик учун жарима миқдорини уч бараварга камайтириш кўз тутилган.

Бундан ташқари, фуқаролар томонидан шахсини тасдиқловчи ҳужжати бўлмаган, вақтинча ёки доимий рўйхатдан ўтмаган фуқароларни турар-жой биноларида яшашга рухсат берганлик учун жарима миқдорини 735 минг сўм, йил давомида такрорий содир этилган тақдирда 1,2 миллион сўм этиб белгилаш таклиф қилинмоқда.

"Депутатларнинг айтишича, мазкур қонун лойиҳасининг қабул қилиниши маъмурий жазолар миқдорининг инсонпарварлик, одиллик тамойилларига мувофиқ равишда камайтирилишига олиб келади", дейилади Қонунчилик палатаси хабарида.

Фарғонада электромобиллар ишлаб чиқарилади

Фарғона шаҳрида шу йилнинг декабрь ойида тест режимида 12 та электромобиль ишлаб чиқарилади.

Вилоят ҳокимлигининг хабар беришича, умумий қиймати $50 миллион бўлган "Central Asia Motors" корхонаси 2022 йилда тўлиқ қувват билан ишга туширилади ва йилига 10 минг дона электромобиль ишлаб чиқариш имконига эга бўлади.

Ҳокимлик хабарида бугунги кунда электромобилларни қувватлантирувчи шохобчалар оммалашмаганидан, илк машиналар гибрид қувватли (электр ва бензин) бўлиши ҳақида сўз боради.

BBCUZBEK.COM билан Telegram орқали +44 7858860002 номери билан боғланинг.

Telegram каналимиз: https://t.me/bbcuzbek