Ўзбекистон: Икки қишлоқ аҳли олтин кони талашиб уришди ва 8 ой ичида четдан қанча доллар келди? – Янгиликлар O‘zbekiston mintaqa dunyo yangiliklar

"Цензурани деярли йўқотдик"

"Одамлар давлат бошқарувини баҳоламоқда ва танқидий қарашларини қўрқмасдан баён этмоқда".

Президент қизи Саида Мирзиёеванинг ушбу сўзларини Кун.уз нашри келтирмоқда.

Президент Мирзиёевнинг тўнғич қизи 9 сентябрь куни Тошкентда ўтган Европада хавфсизлик ва ҳамкорлик ташкилотининг ОАВ эркинлиги бўйича ташкил этилган Марказий Осиё медиа конференциясида иштирок этган.

Маълум қилинишича, Мирзиёева фактларни текшириш, ўз вақтида ҳақиқатга мос хабарлар берилиши, муаммоларни ёритиш, давлатнинг қўллаб-қувватловига муҳтож бўлмасликни ўтган 5 йилда оммавий ахборот воситаларида кўзга ташланган ижобий натижалар ўлароқ тилга олган.

Шунингдек, у Ўзбекистон очиқ маълумотлар манбалари бўйича АҚШ, Испания, Франция ва Буюк Британия билан бир сафда эканини таъкидлаган.

Масс-медиа фонди раисининг ўринбосари бўлмиш Мирзиёева қонунларни кескинлаштириш, турли мавзулардаги чиқишларни тақиқлаш, ижтимоий тармоқларни тўсиб қўйиш ва фикрларни бошқариш орқали ижобий натижаларга эришиб бўлинмаслигини таъкидлаган.

У Ўзбекистоннинг бу каби конференциялардаги иштироки ҳам сўз эркинлигига эришишнинг энг биринчи босқичи - цензура ҳамда ўз-ўзини цензуралаш ортда қолганининг ёрқин далили эканини билдирган.

Кон талашган қишлоқлар

Навоийнинг Хатирчи туманидаги икки қишлоқ аҳли олтин кони талашиб, оммавий жанжаллашган.

ИИВнинг хабар беришича, воқеа тумандаги Олтинсой ва Чилаш қишлоқлари яшовчилари ўртасида юзага келган.

Маълум қилинишича, фойдаланишдан тўхтатилган олтин конларини "қўлбола усулда қонунга хилоф тарзда" ўзлаштириб олган икки фуқаро кон талашиб муштлашганидан хабар топган профилактика катта инспектори воқеа жойига етиб борган.

Инспектор у ерда икки қишлоқ яшовчилари оммавий жанжалга тайёргарлик кўраётгани устидан чиққан.

"Олтинсой қишлоғида яшовчи 33 нафар ва Чилаш қишлоғида яшовчи 20 нафарга яқин фуқаролар тахминан 40-50 метр оралиқ масофада бир-бирларини ҳақорат қилиб, жанжал қилиш мақсадида қўлларига тош ва таёқлар олиб тўпланиб турганликларини кўрган ходим жанжални олдини олиш мақсадида қўшимча куч воситалар келгунга қадар фуқароларни тинчлантириш чораларини кўради", дейилади расмий хабарда.

Бироқ ИИВ, шунга қарамай, одамлар жанжални давом эттирганини билдирган:

"Оқибатда бир-бирларига ҳамда ходимларнинг автомашиналарига тошлар отиб, профилактика катта инспекторига тегишли бўлган Матиз русумли автомашинани яроқсиз аҳволга келтиришгача етди. Вазият жиддий тус олди. Осмондан тош ёмғири ёғди. Тошлар шунчалик кўп эдики, ким, қаердан отаётганини сезилмайди".

Вазирлик хабарида етиб келган қўшимча 20 нафар ходим ёрдамида оммавий тус олган катта жанжални тугатишга эришилгани ҳақида сўз боради.

"Хатирчи туман суди томонидан 28 нафар фуқарога нисбатан сайёр суд йиғилиши ўтказилди. Улардан 26 нафарига — 15 сутка, 2 нафарига эса — 10 суткадан маъмурий қамоқ жазоси белгиланди", дейилади ИИВ хабарида.

Миллион доза Pfizer

Яқин кунларда Ўзбекистонга 1,2 миллион дозадан ортиқ Pfizer/BioNTech ва 600 минг дозадан зиёд AstraZeneca вакциналари олиб келинади.

Бу ҳақда ССВ хабар бермоқда.

Шу тариқа Pfizer/BioNTech ўзбекистонликлар олиши мумкин бўлган бешинчи вакцинага айланади.

ССВ маълумотларига кўра, 9 сентябрь ҳолати бўйича Ўзбекистонда коронавирусга қарши жами 16 миллион дозадан ортиқ вакцина қўлланган.

2,8 миллиондан зиёд инсон тўлиқ эмланган.

Четдан келган миллиардлар

Ўзбекистонга йил бошидан бери хориждан қарийб $4,9 миллиард пул ўтказмаси амалга оширилган.

Бу ҳақда 9 сентябрь куни Марказий банк маълум қилган.

Келтирилган рақамларга кўра, 2020 йилнинг мос даври (январь-август)да Ўзбекистонга четдан $3,6 миллиард ва 2019 йилнинг айни даврида $3,9 миллиард кириб келган.

Шу тариқа, мамлакатга хориждан пул ўтказмалари ҳажми бу йилда 2020 ва 2019 йилларга нисбатан, мос равишда, 35 ва 26 фоизга ўсган.

Марказий банк, шунингдек, 2021 йилнинг илк саккиз ойи давомида экспорт ҳажми, олтинни ҳисобга олмаганда, $6,7 миллиардни ташкил этганини билдирган.

Бундан ташқари, январь-август ойлари давомида сўм алмашув курси 10,449 - 10,683 сўм/АҚШ доллари оралиғида тебраниб, миллий валюта йил бошидан 2 фоизга қадрсизланган.

BBCUZBEK.COM билан Telegram орқали +44 7858860002 номери билан боғланинг.

Telegram каналимиз: https://t.me/bbcuzbek