Ўзбекистон: Мирзиёев одамлар истаган номзодни сайлаши мумкинлигини айтди, депутатлар “прописка”дан воз кечмоқчи O‘zbekiston Mirziyoyev dunyo yangiliklar

"Муносиб номзодни сайлашга имконият бор"

"Сайловчилар ўзлари танлаган, давлат равнақи учун муносиб бўлган номзодни сайлаши учун барча имконият бор".

Шавкат Мирзиёев 13 октябрь куни Навоий вилоятида сайловчилар билан учрашув чоғида ушбу сўзларни тилга олган.

Мирзиёев яқинлашиб келаётган президент сайлови эркин ва шаффоф ўтишига яна бир бор ишора қилиб, бу ҳолатни "демократик ислоҳотлар ютуғи" ўлароқ атаган.

У ўтган беш йил анча оғир ўтганини таъкидлаган.

Президентликка номзод Мирзиёев Навоийдаги учрашувда ҳам Афғонистон масаласига тўхталган.

"Афғонистондаги вазиятни ҳаммамиз кўриб турибмиз. Қўшни танланмайдику, қўшнимизда вазият ёмон деб қаергадир кўчиб кета олмаймизку. Бундан 2 йил аввал мен Толибон раҳбарият билан музокаралар олиб борганимда ҳамма ҳайрон бўлганди. Лекин бугунги кунга келиб тўғри йўл танлаганимиз маълум бўлди.

Албатта, ҳамма давлат раҳбари биринчи навбатда ўз давлати ҳақида ўйлайди. Мен ҳам биринчи навбатда ўз халқимни ўйлашга мажбурман, менга кафолатланган тинчлик керак! Бирорта ўқ отилмайдиган, барча масалалар музокаралар билан ҳал бўладиган тизим керак", унинг сўзларини келтирмоқда ЎзЛиДеП.

Маънан эскирган "прописка"

Қонунчилик палатаси депутатлари қонун ҳужжатларидан "прописка" сўзини чиқариб ташлашмоқчи.

"Сир эмаски, "прописка" сўзи маънавий эскирганлиги ва ушбу атама фуқаролар онгида "тўсқинлик қилувчи", "бир жойга боғланган", "эркинликни чекловчи" деган тушунчаларни келтириб чиқараётган эди", маълум қилинади Қонунчилик палатаси хабарида.

Билдирилишича, эндиликда, айрим қонун ҳужжатларидаги "доимий прописка қилиш" тушунчаси "доимий яшаш жойи бўйича рўйхатга олиш" тушунчасига алмаштирилмоқда.

Шунингдек, "турган жойи бўйича ҳисобга олиш" тушунчаси "вақтинча турган жойи бўйича рўйхатга олиш" тушунчасига ўзгартирилиши хабар қилинган.

Бундан ташқари депутатлар томонидан биринчи ўқишда қабул қилинган қонун лойиҳасига кўра, Маъмурий жавобгарлик тўғрисидаги кодексига фуқаро ID-картани олиш ёки алмаштириш юзасидан ўз вақтида мурожаат қилмаганида, яроқсиз ҳолга келтирганда ва йўқотиб қўйган тақдирда, маъмурий жавобгарликка тортилмаслиги чиқариб ташланмоқда.

Трендга чиққан билим

Президент Шавкат Мирзиёев "Заковат" интеллектуал клуби учун пойтахтда бино қуриб бериш, клуб ўйинларига ҳар йили 50 миллиард сўм маблағ ажратиш, "Заковат" стипендиясини жорий қилиш бўйича таклифлар берган.

Бу ҳақда Миллий масс-медиа фонди Васийлик кенгаши раиси Комил Алламжонов хабар берган.

12 октябрь куни Шавкат Мирзиёев Бухорода ўтган "Заковат" интеллектуал ўйинининг финал босқичини шахсан кузатгани хабар қилинган эди.

Комил Алламжонов ўзининг Telegram каналида президентнинг билим олишга хизмат қиладиган ҳар қандай лойиҳани доим қўллаб-қувватлашга тайёр эканини гапиргани ҳақида ёзган.

"…31 мингдан зиёд "Заковат" клуби аъзолари жуда хурсанд. Билим ҳақиқий трендга чиқди. Бунинг учун катта раҳмат, муҳтарам Президент", миннатдорлик билдирган Алламжонов.

Шу куннинг ўзида президент Мирзиёев "Заковат" интеллектуал ўйини фаол иштирокчиларининг бир гуруҳини мукофотлаш тўғрисидаги фармонга имзо чеккан.

Фармон билан "Заковат" лойиҳаси асосчиси, клуб ўйинларига узоқ йиллар бошловчилик қилиб келаётган Абдурасул Абдуллаев "Ўзбекистон Республикасида хизмат кўрсатган ёшлар мураббийси" фахрий унвони билан тақдирланган.

Шу йилнинг январь ойида Комил Алламжонов ва президентнинг тўнғич қизи Саида Мирзиёева "Заковат" интеллектуал клуби нодавлат нотижорат ташкилотини тузиш, клуб фаолиятини янгидан жонлантириш ишларини бошлаганликлари ҳақида маълум қилган эди.

Sputnik Light ва қурувчилар

Ўзбекистондан Россияга юборилиши кутилаётган 10 минг нафар қурувчи Sputnik Light вакцинаси билан эмланади.

Бу ҳақда Соғлиқни сақлаш вазирлиги хабар берган.

Аввалроқ, ўзбекистонлик 10 минг нафар меҳнат муҳожири келишув асосида Россиядаги қурилишларда ишлаш учун юборилиши маълум бўлган эди.

Мазкур меҳнат муҳожирларини эмлаш учун куни кеча Россиядан 12 минг доза Sputnik Light вакцинаси олиб келинган.

ССВнинг маълум қилишича, ушбу вакцина бир компонентли бўлиб, у билан тўлиқ эмланиш учун вакцинанинг бир дозасини олиш кифоя қилади.

Вазирлик хабарида вакцинация жараёни россиялик тиббиёт ходимлари томонидан амалга оширилиши қўшимча қилинган.

Туркиядан беғараз ёрдам

13 октябрь куни Ўзбекистонга олтинчи турдаги коронавирусга қарши вакцина олиб келинган.

Бу сафар Туркия Хитойда ишлаб чиқарилган Sinovak вакцинасини беғараз ёрдам ўлароқ Ўзбекистонга юборган.

11 октябрь куни Ўзбекистон ва Туркия ўртасида соғлиқни сақлаш соҳасида грант ёрдамига оид битим имзолангани хабар қилинган эди.

Орадан икки кун ўтгач бортида 200 минг доза Sinovak вакцинаси ва 20 минг қути Фавипиравир дори препарати ортилган учоқ Истанбулдан Тошкентга қўнган.

Бунга қадар Ўзбекистонда аҳолини коронавирусга қарши оммавий эмлашда AstraZeneca, ZF-UZ-VAC2001, Sputnik V, Moderna ва Pfizer/BioNTech вакциналаридан фойдаланиб келинаётган эди.

BBCUZBEK.COM билан Telegram орқали +44 7858860002 номери билан боғланинг.

Telegram каналимиз: https://t.me/bbcuzbek