Ўзбекистон: Жаримага тортилган Санжай, танқидга учраган тил челленжи ва никоҳ қураётган энг кўп қариндошлар қайси вилоятда? O‘zbekiston dunyo yangiliklar

Танқидга учраган тил челленжи

Чирчиқ шаҳар ҳокимлиги тармоқ фойдаланувчиларининг кескин танқидига учраган тил челленжи борасида баёнот билан чиққан.

Ўтган ҳафта шаҳардаги жамоат жойларида аҳолини ўзбек тилида тўғри гапиришга ундовчи варақалар илиб чиқила бошланган.

Уларда "обед", "магазин", "касса" каби ўзбекистонликлар томонидан кенг қўлланилувчи сўзларнинг ўзбек тилидаги муқобили келтирилганини кўриш мумкин.

Мазкур челленж шаҳардаги "Маънавият бўлинмаси" ташаббуси билан бошланганини билдирган Чирчиқ шаҳар ҳокимлиги расмий хабарида "Давлат тилини тўлақонли ўзлаштирганлигимиз, миллатга ва Давлатга бўлган ҳурмат ва муҳаббатимизни белгилайди" жумласини ўқиш мумкин.

Бироқ фаолларнинг бу амали аксар тармоқ фойдаланувчилари томонидан "ўзга тилларни камситиш ва чеклаш" ўлароқ қабул қилинган.

Бунинг ортидан баёнот билан чиққан Чирчиқ шаҳар ҳокимлиги "ўзбек тилининг софлигини сақлаш, давлат тилининг расмий мақомини мустаҳкамлаш" мақсадида қилинаётган бундай тарғибот ишларига бошқача тус бермасликка чақирган.

Ҳокимликнинг таъкидлашича, бу челленждан асосий мақсад кундалик ҳаётда кўп қўлланиладиган ўзлаштирма сўзларнинг ўзбек тилидаги муқобилини топиш ҳамда ишлатишга кўмаклашишдир.

"…бу ҳолатдан норозилик кайфиятини билдираётган фуқароларга тарқатилаётган материалларда ҳеч бир тилни камситиш каби бошқа мақсадлар йўқлигини, бу тилимиз софлигини бузаётган айрим ажнабий сўзларнинг давлат тилидаги муқобили борлигини эслатиш ва ундан фойдаланишга хайрли бир даъват эканлигини эслатамиз", дейилади расмий баёнотда.

Жаримага тортилган Санжай

Санжай тахаллуси билан танилган хонанда Санжар Джавбердиев муаллифлик ҳуқуқларини бузган, дея топилиб, жаримага тортилган.

Интеллектуал мулк агентлигининг маълум қилишича, Санжай таниқли қўшиқчи Шерали Жўраевнинг "Гулбадан" ва "Атиргулим атрингни соч" номли шеърий асарларидан ҳуқуқ эгасининг рухсатисиз, ноқонуний тарзда фойдаланганлиги бўйича чора кўриш сўралган мурожаат келиб тушган.

"Агентлик томонидан олиб борилган ўрганишлар натижасида мурожаатда келтирилган ҳолатлар ўз тасдиғини топган", дейилади агентлик хабарида.

Натижада, 20 сентябрь куни Санжайга нисбатан Маъмурий жавобгарлик тўғрисидаги кодексининг 177(1)-моддаси биринчи қисми билан жарима жазоси қўлланилган.

Бироқ расмий хабарда хонанда устидан ким арз қилгани ва унга нисбатан тайинланган жарима миқдори очиқланмаган.

Агентлик қонунчиликка киритилган ўзгартиришлар ортидан, эндиликда, ҳуқуқ эгаси ўз муаллифлик ҳуқуқларини бузган ҳуқуқбузардан суд тартибида ўзларига етказилган зарар қопланиши ўрнига базавий ҳисоблаш миқдорининг йигирма бараваридан минг бараваригача миқдорда товонни тўлашини талаб қилиши мумкинлигини эслатиб ўтган.

Ошиб кетган бензин импорти

2021 йилнинг январь-август ойларида мамлакатга 281 миллион литрдан зиёдроқ автомобиль бензини импорт қилинган.

Давлат статистика қўмитасининг маълум қилишича, бу ҳажм ўтган йилнинг мос даврига нисбатан 3,2 баробарга ортиқдир.

Жорий йил январь-август ойларида бензин Ўзбекистонга, асосан, Россия (139 миллион литр) ва Қозоғистондан (121 литр) олиб келинган.

Импорт маҳсулотнинг умумий қиймати $100 миллионни ташкил этган.

Август ойининг ўзида 7 миллион литр бензин импорт қилинган.

2021 йилнинг илк саккиз ойида мамлакатнинг ўзида 730 минг тонна бензин ишлаб чиқарилган.

Кескин пасайган кўрсаткич

Ўзбекистонда коронавирус билан боғлиқ кунлик касалланиш кўрсаткичи кескин пасайган.

ССВ 4 октябрь куни мамлакат бўйлаб 304 нафар инсонда коронавирус аниқланганини хабар қилган.

Бу Ўзбекистонда июнь ойи ўртасидан бери кузатилган энг паст кўрсаткичдир.

Буйрак трансплантацияси барча ҳудудларда

2022 йил якунига қадар барча ҳудудларда буйрак трансплантацияси амалиёти йўлга қўйилади.

ССВнинг хабар беришича, ушбу жараён президентнинг тегишли қарорига асосан В.Воҳидов номидаги Республика ихтисослаштирилган хирургия илмий-амалий тиббиёт маркази, Республика шошилинч тиббий ёрдам илмий маркази ва Республика ихтисослаштирилган нефрология ва буйрак трансплантацияси илмий-амалий тиббиёт маркази томонидан амалга оширилади.

Шунингдек, В.Воҳидов номидаги Республика ихтисослаштирилган хирургия илмий-амалий тиббиёт марказида юрак ва ўпка трансплантацияси жорий этилиши белгиланган.

Республика ихтисослаштирилган хирургия илмий-амалий тиббиёт маркази ва ҳудудий давлат тиббиёт муассасаларининг хорижий тилларни яхши биладиган ходимларининг 2021-2022 йилларда хирургия соҳаси учун долзарб йўналишлар бўйича нуфузли хорижий тиббиёт муассасалари ва марказларига малака ошириш ва стажировка ўташ учун юбориш, шунингдек, марказ фаолиятига етакчи хорижий мутахассисларни жалб этиш чоралари кўрилиши ҳам маълум қилинган.

Эр-хотин қариндошлар

Июль-сентябрь ойларида бир-бирига қариндош бўлган 675 нафар келин-куёвнинг никоҳлари қайд этилган.

"Шундан, 285 нафар келин-куёв бир-бирига нисбатан холавачча, 172 нафари тоғавачча, 114 нафари амакивачча ва 104 нафари аммавачча ҳисобланади", маълум қилган Давлат хизматлари агентлиги.

Агентлик маълумотларига кўра, қариндошлар ўртасида никоҳ энг кўп қайд этилган ҳудудлар қуйидагича: Сурхондарё (268 та), Қашқадарё (179 та) ва Сирдарё (40 та).

Яқин қариндошлар ўртасида никоҳ тузиш тақиқланганини эслатиб ўтган агентлик бундай никоҳлар келажак авлод саломатлиги учун хатарли эканидан аҳолини огоҳлантирган.

BBCUZBEK.COM билан Telegram орқали +44 7858860002 номери билан боғланинг.

Telegram каналимиз: https://t.me/bbcuzbek