ఐపీసీ, సీఆర్‌పీసీ, ఎవిడెన్స్ యాక్ట్‌లలో మార్పులు, రాజద్రోహం నేరం కాదు... ఇంకా ఏమేం మారుతున్నాయి?

భారత శిక్షాస్మృతి(ఐపీసీ), నేర శిక్షాస్మృతి(సీఆర్‌పీసీ), సాక్ష్యాధారాల చట్టం(ఇండియన్ ఎవిడెన్స్ యాక్ట్)ల స్థానంలో కొత్త శాసనాలను తీసుకొచ్చేందుకు వీలుగా కేంద్ర హోం మంత్రి అమిత్ షా శుక్రవారం లోక్‌సభలో మూడు బిల్లులు ప్రవేశపెట్టారు.

ది భారతీయ న్యాయ సంహిత-2023, ది భారతీయ నాగరిక్ సురక్ష సంహిత-2023, ది భారతీయ సాక్ష్య బిల్-2023 పేరుతో ఈ మూడింటిని లోక్‌సభ ముందుకు తీసుకొచ్చారు.

ఈ మూడు బిల్లులను పార్లమెంటు స్థాయీసంఘం సమీక్షకు పంపించారు.

నేరాల విచారణ ప్రక్రియలు ఇప్పుడు మూడు చట్టాలు అత్యంత ముఖ్యమైనవి. ఏ నేరానికి ఏ శిక్ష విధించాలన్నది భారతీయ శిక్షాస్మృతి చెప్తుంది. అరెస్టులు, విచారణ పద్ధతులు అన్నీ క్రిమినల్ ప్రొసీజర్ కోడ్‌లో ఉంటాయి. కేసులో నిజాలను రుజువు చేయడం ఎలా, వాంగ్మూలాలు ఎలా రికార్డ్ చేయాలి, రుజువు చేసుకోవాల్సిన, చూపించాల్సిన బాధ్యత ఎవరిపై ఉంటందనేది సాక్ష్యాధారాల చట్టం చెప్తుంది.

అయితే, ఇప్పుడున్న ఈ మూడు చట్టాలు వలసపాలనకు ఆనవాళ్లని.. ప్రస్తుత కాలానికి అనుగుణంగా వీటి స్థానంలో కొత్త చట్టాలను తీసుకొస్తున్నామని హోం మంత్రి అమిత్ షా సభలో చెప్పారు.

1860 నుంచి ఇప్పటివరకు భారత్‌లోని నేర న్యాయవ్యవస్థ బ్రిటిషర్లు చేసిన చట్టాల ఆధారంగానే పనిచేసిందని, ఆ స్థానంలో ఇప్పుడు భారతీయ ఆత్మతో కూడిన మూడు చట్టాలు అమలులోకి వస్తాయని బిల్లులు ప్రవేశపెట్టిన సందర్భంగా అమిత్ షా అన్నారు.

ఇవి చట్టరూపం దాల్చి అమలులోకి వచ్చిన తరువాత దేశ నేర న్యాయవ్యవస్థలో భారీ మార్పులు వస్తాయని, చాలా మెరుగుపడుతుందని ఆయన తెలిపారు.

‘ఇప్పుడున్న మూడు చట్టాలలో వలస పాలన గుర్తులు ఉన్నాయి. వీటిని అప్పట్లో బ్రిటిష్ పార్లమెంటులో ఆమోదించారు, ఆ తరువాత భారత్‌లో అమలు చేస్తున్నారు. ఈ చట్టాలలో క్రౌన్, యునైటెడ్ కింగ్‌డమ్, లండన్ గెజిట్ వంటి వలసవాద ఆనవాళ్లు 475 ఇప్పటికీ ఉన్నాయి’ అని అమిత్ షా సభకు చెప్పారు.

కొత్త చట్టాలతో ఎలాంటి మార్పులు వస్తాయో కూడా ఆయన సభకు వివరించారు.

ఈ మూడు బిల్లులను పార్లమెంట్ స్థాయీ సంఘానికి పంపించారు.

2020 మే నెలలో మూడు పాత చట్టాలలో మార్పులు సూచించడానికి కేంద్ర హోం మంత్రిత్వ శాఖ ఒక కమిటీ ఏర్పాటు చేసింది.

రిటైర్డ్ జడ్జ్‌లు, సీనియర్ లాయర్లు, రిటైర్డ్ ఉన్నతాధికారుల నుంచి అభిప్రాయాలు తీసుకుంది.

ఇప్పుడు కొత్త బిల్లలు పార్లమెంటు స్థాయీసంఘానికి పంపించడంతో ప్రతిపక్షాలు కూడా తమ అభిప్రాయాలు తెలియజేస్తాయి.

అనంతరం కొత్త బిల్లులను లా కమిషన్‌కు పంపిస్తారు.అనంతరం పార్లమెంటులో దీనిపై చర్చిస్తారు.

బిల్లుల తుది ముసాయిదా వెలువడితే పూర్తిగా ఎలాంటి మార్పులు రానున్నాయి, వాటి ప్రభావం ఎలా ఉండనుందనే స్పష్టత వస్తుంది.

చట్టపరమైన ప్రక్రియలను వేగవంతం చేసే లక్ష్యంతో చాలా కేసులను మూడేళ్లలో పరిష్కరించాని లక్ష్యంగా పెట్టుకున్నామని, అలా చేయడం వల్ల పెండింగ్ కేసుల భారం తగ్గుతుందని అమిత్ షా సభలో చెప్పారు.

ఇవి కూడా చదవండి: