Sunday Igboho: N kò fẹ́ oyè ọ̀gá àgbà páta fún ikọ̀ Amotekun nílẹ̀ Yorùbá

Ṣe lootọ ni pe wọn fẹ fi oloye Sunday Adeyẹmọ, ti ọpọ mọ si Sunday Igboho jẹ olori gbogbo iko amọtẹkun ilẹ Yoruba?

Ibeere to n ja kaakiri ree bayii lẹyin ipade apapọ awọn gomina ipinlẹ ilẹ Yoruba to waye lọjọ Aje nilu Akurẹ, tii ṣe olu ilu ipinlẹ Ondo.

Sunday Igboho lo bọ si agbami ojutaye iroyin lẹyin to gbe gbedeke ọjọ meje kalẹ fawọn Fulani nilu Igangan lagbegbe Ibarapa laipẹ yii.

Igboho ni ki awọn ọdaran Fulani naa ko aasa wọn nitori iwa ifipabanilopọ, ijinigbe, idigunjale ati ipaniyan ti wọn n hu.

Awọn eeyan kan to sunmọ Igboho bi iṣan ọrun, la gbọ pe wọn lu awo ọrọ naa si awọn akọroyin leti.

Amọ nigba to n fesi lori ahesọ ọrọ naa fun awọn akọroyin, ti BBC Yoruba wa lara wọn, Sunday Igboho ni oun ko fẹ ipo oludari patapata fun ikọ Amotekun yika ilẹ Yoruba, ti wọn n yọ ọ naa.

O ni oun to jẹ oun logun bayii ni bi awọn ọdaran Fulani yoo se fi ilẹ Yoruba silẹ, ti alaafia yoo si jọba pada.

"N ko nilo ipo olori Amotekun tabi owo lọdọ ẹnikẹni tabi oloselu kankan.

Alaafia fun awọn Yoruba lo jẹ mi logun lasiko yii, kii se ipo rara."

Sunday Igboho wa rọ awọn gomina to n daba iyansipo naa lati mase fi oun jẹ oye naa.

Lootọ ni awọn kan lara awọn alatilẹyin Sunday Igboho ko fọwọ si igbesẹ naa, amọ sibẹsibẹ ọpọ wọn lo ti gba aba naa wọle gẹgẹ bi a ṣe gbọ.

Ikọ Amọtẹkun lawọn ijọba ẹkun iwọ oorun gusu orilẹede Naijiria gbe kalẹ lati koju gulegule awọn Fulani darandaran to n da omilẹgbẹ ọran kaakiri ẹkun naa.

Ẹ̀rú kò bà mí lórí ìkéde ọ̀gá ọlọ́pàá láti gbé mi sí àhámọ́ - Sunday Igboho

Saaju la ti mu iroyin wa fun yin pe Ajafẹtọ ọmọ Yoruba to lewaju lori ọrọ aawọ to da lori gulegule awọn Fulani si ẹya Yoruba, Sunday Igboho ti sọ pe, oun ko bẹru ihalẹ atimọle ti awọn alaṣẹ n daba rẹ.

Ninu fọnran fidio kan to lu ayelujara pa ni o ti sọ ọrọ yii, to si tun dupẹ fawọn agbaagba Yoruba fatilẹyin wọn.

Igboho sọ pe ''awọn darandaran ko le le wa kuro lori ilẹ wa, oju wa ti ṣi bayi, ayafi ti wọn ba fẹ pa wa lo ku''

O wa kesi awọn alatilẹyin rẹ lati mase kọ ẹnu eebu sawọn ọba alade ilẹ Yoruba.

Bakan naa ni Igboho n fọwọ gbaya pe ẹru ko ba oun rara lori asẹ ọga agba ọlọpaa to ni ki wọn mu oun wa.

''Ẹ maṣe tẹnbẹlu awọn ọba Yoruba wa tabi ki ẹ bẹnu atẹ lu wọn. Mo fi ogun bura, inu awọn naa ko dun si ohun to n sẹlẹ yii. Wọn ti n sọrọ soke bayii''

O ni "idi ree ti gbogbo wọn ati awọn olori ilẹ Yoruba fi dide pe ki wọn ma ṣe mu Sunday Igboho."

''Ohun to bani ninujẹ ni bi wọn ṣe n ṣe wa baṣubaṣu, ti wọn n pa awọn ọmọ obinrin wa, ti awọn afurasi apaayan darandaran yii tun n fipa bawọn lo pọ.A ko le lọ si oko mọ, a ko le lọ sodo.O to gẹ!''

Bi a ko ba gbagbe laipẹ yi ni ọga patapata ọlọpaa Naijiria paṣẹ ki Kọmisana ọlọpaa ni ipinlẹ Oyo mu Sunday Igboho wa si Abuja lati wa jẹjọ.

Eyi waye lẹyin to lọ si Ibarapa lati lọ sọ fun olori awọn Fulani nibẹ pe ki wọn kuro nilẹ awọn laarin ọjọ meje.

Sunday Igboho sọ̀rọ̀ fún ìgbà àkọ́kọ́ lẹ́yìn àbẹ̀wò rẹ̀ sí Igangan

Eekan ọmọ Yoruba nni, Oloye Sunday Adeyẹmọ, ti ọpọ mọ si Sunday Igboho, ti sọrọ fun igba akọkọ lyin to sabẹwo silu Igangan lọjọ Ẹti.

Sunday Igboho ṣalaye pe asiko to fawọn alakoso iṣejọba ni ilẹ Yoruba lati mọ pe, bi wọn ba kuna lati mojuto abo araalu to dibo fun wọn, ko si igba ti araalu o ni gbe ara wọn nija.

Oloye Sunday Igboho ṣalaye eyi ninu awọn atẹjade kan to fi sita loju opo Twitter rẹ, @SundayIgboho2

Igboho ni o ṣeni laanu pe awọn iwa ti aye rẹ o si fawọn ọmọ Yoruba to tẹdo si agbegbe miran lorilẹede Naijiria, ni wọn n fi n lọ Yoruba lori ilẹ won.

Oloye Igboho ni omilẹgbẹ awọn eekan ọmọ Yoruba lo ti jade laye nipasẹ awọn agbebọn darandaran Fulani, ninu eyi to ti darukọ gbajugba oniṣegun ibilẹ ni, ti ọpọ mọ si ọkọ Oloyun ati Ọmọwe Aborode.

"O ko lee ri ọmọ Yoruba ko lọ maa paniyan ni ipakupa nilu Kano.

Bi ọmọ Yoruba ba gba Hausa/Fulani loju, wọn lee tori rẹ bẹ ẹ lor,i ka to wa sọ pe ko ba nnkan oko jẹ"

O ni ko si nnkan ti ijọba tii ṣe lori gbogbo awọn ti awọn afurasi Fulani darandaran pa nilẹ Yoruba, sibẹ ojojumọ l'ẹmi n ṣofo si.

Igboho ni gbogbo awọn to n sọ ahesọ ọrọ kiri pe nitori owo, ipo abi gbajumọ loun se gbe igbesẹ naa, ko mọ iru eeyan ti oun jẹ ni.

O fikun pe gẹgẹ bi ọmọ agbegbe Oke Ogun ni ipinlẹ Ọyọ, asiko kan wa sẹyin to jẹ pe ifọkanbalẹ l'awọn eeyan fi n gbe aye wọn lagbegbe naa eleyii ti kori bẹẹ mọ bayii.

"L'awọn igba naa a maa n pada lati oko nibii agogo kan oru laisi ibẹru tabi ikayasoke pe ẹnikan le e kọlu wa."

O ni nnkan o fara rọ mọ lagbegbe naa nitori gulegule awọn kọlọransi darandaran Fulani kan.

Sunday Igboho wa fi ọwọ gbaya pe idunkooko ileesẹ ọlọpaa ko le da jinni-jinni bo awọn eeyan ipinlẹ Oyo nitori o gba oun ni akoko ati igbaradi ki oun to gbe igbesẹ to lagbara yii, eyi to jẹ ipinnu to bọ sasiko.

O fikun pe igbesẹ́ naa waye nitori ara wa ati ọjọ ọla iran to n bọ.