Ọmọọba Harry àti Meghan Markle di tọkọtaya

Lẹ́yin gbogbo ètò, Ọmọọba Harry ati Meghan Markle ti di tọkọtaya báyì. Olórí ìjọ Anglican ti a mọ̀ sí Archbishop Canterbury, Justin Welby ni ó so wọn pọ̀ ní ilé ìjọsìn St. George ní Windsor.

Bí ìsìn náà ṣe parí ni àwọn mékéèjì ṣe jáde síta tí wọn sì fi enukonu ní iwájú gbogbo èro tí ó wà ní ita ilé ìjọ́sìn.

Ogunlọ́gọ̀ àlejò kákàkiri àgbáye ni ó wá sí ibi ìgbéyàwó náà.

Ìyá Meghan Markle, Doria Ragland, nìkan ni ẹbí ìyàwó tí ó wá si ibi igbéyàwó náà.

Bíṣọ́ọ́bù aláwọ̀ dúdú kan láti orílẹ̀ede Amerika, Michael Curry ni ó wàásù níbi ìgbéyàwó náà.

Bí tọkọtaya náà ṣe jáde nínú ilé ìjọsìn ni ẹṣin gbé wọn lọ tí gbogbo àwọn ẹbí, ará àti ọ̀rẹ́ tí ó tò sí gbogbo ẹ̀gbẹ́ ọ̀nà sí bẹ̀rẹ̀ ju ọwọ́ sí wọn.

Ẹgbẹ̀ta alejò ni ó wá si ibi ìsìn igbéyàwó náà. Nínu wọn ni ọ̀pọ̀lọ́pọ̀ òṣèré bìì ti Meghan Markle.

Àwọn aṣọ àti ẹ̀ṣọ́ ìyàwó

A gbọ́ pé arábinrin kan tí orúkọ rẹ̀ ń jẹ́ Waight Keller ní ó ṣe aṣọ ìyàwó labẹ́ àkósó ilé iṣẹ́ Givenchy ti orílẹ̀ede France.

Eyí tí ó wá jọni lójú jù ni wípẹ́ ẹ̀ṣọ́ orí ìyàwó, Ọbabinrin Elizabeth ni ó yáà lò. Wọn ní iyá iyá ọbabinrin náà tí orúkọ rẹ̀ ń jẹ́ Queen Mary, ni ó ní. Ọdún 1932 ni wọ́n ṣe ẹ̀ṣọ́ náà.