షుగర్ ఉన్న వాళ్లు మామిడి పండ్లు తినొచ్చా, తినకూడదా? డాక్టర్లు ఏం చెప్పారంటే..

రుచి మాత్రమే కాకుండా మామిడి పండ్లలో పోషకాలు ఉంటాయి.

మామిడి పండ్లలో సహజ చక్కెరలు ఉంటాయి. ఇవి శరీరంలో చక్కెర స్థాయిలని పెంచుతాయి.

అందుకే, షుగర్ వ్యాధి ఉన్నవాళ్లు మామిడి పండ్లు తినొద్దని కొందరు చెబుతుంటారు.

అసలు మామిడి పండ్లు తింటే రక్తంలో చక్కెర స్థాయి పెరుగుతుందా? మధుమేహం ఉన్నవారు మామిడి పండ్లను ఎప్పుడు తినాలి? ఎప్పుడు తినకూడదు?

ఈ ప్రశ్నలకు సమాధానాలు తెలుసుకునేందుకు వైద్యులతో మేం మాట్లాడాం.

మామిడి పండ్లలోని పోషకాలు

మామిడి పండ్లలో అనేక సూక్ష్మ, స్థూల పోషకాలు ఉన్నాయి.

ఈ పండ్లలో కార్బోహైడ్రేట్లు, ప్రోటీన్లు, అమైనో ఆమ్లాలు, లిపిడ్లు, పీచు పదార్థం ఉంటాయి.

వీటితో పాటు కాల్షియం, పొటాషియం, ఐరన్, విటమిన్ ఎ, సి వంటి సూక్ష్మ పోషకాలు కూడా ఉంటాయి.

100 గ్రాముల మామిడిపండును తింటే 60-90 కిలో కెలోరీల శక్తి లభిస్తుంది.

దీనితోపాటు మామిడి పండ్లలో 75-85 శాతం నీరు ఉంటుంది.

100 గ్రాముల మామిడిలో కింది పోషకాలు లభిస్తాయి.

మామిడి పండ్లు బ్లడ్ షుగర్‌ను పెంచుతాయా?

డాక్టర్ మనోజ్ విఠలానీ అహ్మదాబాద్‌లో డయాబెటాలజిస్ట్.

మీకు డయాబెటిస్ ఉంటే మామిడి పండ్లను తినకూడదనేది పూర్తిగా అపోహ అని డాక్టర్ మనోజ్ బీబీసీతో చెప్పారు.

‘‘మామిడి పండ్లలోని చక్కెరలు ఫ్రక్టోజ్ రూపంలో ఉంటాయి. పండ్లలో ఉండే సహజ ఫ్రక్టోజులు శరీరానికి హాని కలిగించవు. అయితే, పరిమితంగా వాటిని తినాలనే విషయాన్ని మర్చిపోకూడదు’’ అని ఆయన వివరించారు.

మామిడి పండ్లలో యాంటీ ఆక్సిడెంట్ గుణాలు ఉంటాయి. ఈ పండ్లలో జీర్ణక్రియకు సహాయం చేసే పీచు పదార్థాలతోపాటు పొటాషియం ఉంటుంది. ఈ రెండూ బీపీని నియంత్రించడంలో సహకరిస్తాయి.

మామిడి పండ్లలోని చక్కెరలు రక్తంలో కలిసే ప్రక్రియను పీచుపదార్థాలు నెమ్మదించేలా చేస్తాయి. కార్బోహైడ్రేట్ల ప్రవాహాన్ని నియంత్రించడానికి, రక్తంలో చక్కెర స్థాయిలను స్థిరీకరించడానికి ఇది శరీరానికి సాయం చేస్తుంది.

మామిడి పండ్లలో గ్లైసెమిక్ ఇండెక్స్ మితంగా ఉంటుంది. ఈ పండ్లను పరిమితంగా తీసుకుంటే ఆరోగ్యానికి ప్రయోజనకరంగా ఉంటుంది.

తక్కువ గ్లైసెమిక్ ఇండెక్స్ ఉండే ఆహారాలు చాలా నెమ్మదిగా జీర్ణమవుతాయి. ఫలితంగా శరీరంలో చక్కెర స్థాయిలు ఒక్కసారిగా కాకుండా క్రమంగా పెరుగుతాయి.

గ్లైసెమిక్ ఇండెక్స్ అంటే ఏంటి?

డాక్టర్ మనోజ్ చెప్పిన వివరాల ప్రకారం గ్లైసెమిక్ ఇండెక్స్ అనేది శరీరంలోని చక్కెర స్థాయిలపై చూపే ప్రభావం ఆధారంగా ఆహారపదార్థాలకు ఒక సంఖ్యను కేటాయిస్తుంది.

ఈ సూచికలో 0 నుంచి 100 వరకు సంఖ్యలు ఉంటాయి. 0 అనేది ఒక ఆహారం తీసుకుంటే శరీరంలోని చక్కెరలపై ఎలాంటి ప్రభావం చూపదని అర్థం. 100 స్కోరు ఉంటే ఆ ఆహారం చక్కెర స్థాయిలను పెంచుతుందని లెక్క.

గ్లైసెమిక్ ఇండెక్స్ స్కోరు 55 లేదా అంతకంటే తక్కువ ఉన్న ఏ ఆహారమైనా తినడానికి చాలా సురక్షితం. ఎందుకంటే ఈ ఆహారాలు రక్తంలో చక్కెర స్థాయిలను పెంచవు.

మామిడి పండ్ల గ్లైసెమిక్ ఇండెక్స్ స్కోరు 51. అంటే ఇది తినడానికి సురక్షితమైనది. ఇది రక్తంలోని చక్కెరలను ఎక్కువగా పెంచదని అర్థం.

అయితే, మామిడి పండ్ల గ్లైసెమిక్ స్కోరు సరిహద్దుల్లో ఉన్నందున ఇప్పటికే డయాబెటిస్ ఉన్నవారు, మధుమేహం బారిన పడే ప్రమాదం ఉన్నవారు కాస్త జాగ్రత్తగా ఉండాలి.

ఈ సూచిక ప్రకారం చూసుకుంటే పైనాపిల్ (అనాస), పుచ్చకాయ (వాటర్ మిలన్), బంగాళదుంపలు, బ్రెడ్ వంటి ఆహారపదార్థాల స్కోరు 70 కంటే ఎక్కువే. అంటే వీటిని తింటే తక్షణమే రక్తంలో చక్కెర స్థాయిలు పెరుగుతాయని అర్థం.

డయాబెటిస్ ఉన్న వాళ్లు ఎన్ని మామిడిపండ్లు తినొచ్చు?

భారత్‌లోని వివిధ కాలేజీలకు చెందిన పరిశోధకులు ఇటీవలే ‘మామిడిపండ్లు, డయాబెటిస్’ అనే పరిశోధనా పత్రాన్ని విడుదల చేశారు.

ఈ పేపర్ ప్రకారం, డయాబెటిస్ ఉన్న వ్యక్తి మామిడిపండ్లను తినడం మానేయాల్సిన అవసరం లేదు. కానీ, వైద్యుల సిఫార్సుల మేరకు వారు తగు మోతాదులో వాటిని తినాలి.

మామిడి పండ్లను పరిమితంగా తింటే డయాబెటిస్, చక్కెర స్థాయిలు పెరిగే అవకాశం లేదని డాక్టర్ మనోజ్, ఇతర పరిశోధకులు అంటున్నారు.

వారు చెప్పిన వివరాల ప్రకారం,

ముక్కలుగా తింటే కాస్త తిన్నప్పటికీ మీకు అధికంగా తిన్న భావన కలుగుతుంది.

కాబట్టి మధుమేహం ఉన్న వారు మామిడిపండ్లను మితంగా తీసుకోవాలి.

ఈ పండును తినేటప్పుడు కేలోరీల పరిమాణం, గ్లైసెమిక్ స్థాయి వంటివి గుర్తుంచుకోవాలి.

భారత్‌లో మామిడి ఉత్పత్తి

భారత ఆర్థిక వ్యవస్థలో మామిడి అత్యంత ముఖ్యమైన పంట. మామిడి ఉత్పత్తిలో భారత్‌దే అగ్రస్థానం.

భారత్‌లో 21.79 మిలియన్ మెట్రిక్ టన్నుల మామిడి ఉత్పత్తి అవుతుంది.

భారత్‌లో 1000 రకాల మామిడి పండ్లను పండిస్తారు.

ఆంధ్రప్రదేశ్, ఉత్తర్‌ప్రదేశ్, బిహార్, కర్ణాటక, గుజరాత్, తెలంగాణ రాష్ట్రాలు ప్రధానంగా మామిడిని పండిస్తాయి.

(గమనిక - ఈ కథనం అవగాహన కోసం మాత్రమే. సందేహాలు ఉంటే వైద్యులను సంప్రదించండి.)

ఇవి కూడా చదవండి:

బీబీసీ తెలుగును ఫేస్‌బుక్, ఇన్‌స్టాగ్రామ్‌, ట్విటర్‌లో ఫాలో అవ్వండి. యూట్యూబ్‌లో సబ్‌స్క్రైబ్ చేయండి.)