UN: Nàíjíríà, ẹ sọ ìlò igbó fún ìwòsàn di òfin

Ní ọjọ́ ajé ni àjọ ìsọ̀kan orílẹ̀èdè àgbáyé (United Nations) ní, òun ti fòǹtẹ̀ lu ìlò èròjà igbó fún ìwòsàn, tó sì rọ orílẹ̀èdè Nàíjíríà láti dẹ ọwọ́ lóríi òfin tó de fífi ọwọ́ sí ìlò igbó bíi òògùn fún ìwòsàn àwọn èèyàn.

Bákannáà ló ní dípò ká máa fi òfin ìwà ọ̀daràn de lílò òògùn olóró, ńse ló yẹ kí orílẹ̀èdè Nàíjíríà máa fojú aláìsàn wo àwọn èèyàn tó bá kúndùn igbó mímu, ká sì sètọ́jú wọn bọ ti yẹ.

Níbi ìjókòó ìta gbangba kan tí ìgbìmọ̀ tó wà fọ́rọ̀ òògùn olóró nílé asòfin àgbà ilẹ̀ wa gbé kalẹ̀ ni asojú kan fún àjọ ìsọ̀kan àgbáyé, Harsheth Kaur Virk, ti gbé ìmọ̀ràn yìí kalẹ̀.

Ìdí rèé tí BBC Yorùbá se fẹ́ mọ èrò àwọn aráàlú nípa ìmọ̀ràn yìí àti ipa tí yóò ní lóríi ìlera àwọn ọmọ̀ orílẹ̀èdè Nàíjíríà lápapọ̀.

Awọn iroyin ti ẹ lee nifẹẹ si:

Lérò Dókítà Kúnlé Òbílàdé, tíí se onísègùn òyìnbó, ó ní àmúsẹ òfin yìí yóò lẹ́yìn tó burú fún ìlera àwọn ọmọ Nàíjíríà.

Sùgbọ́n onímọ̀ kan nípa ìdènà àwọn òògùn olóró ní orílẹ̀èdè Nàíjíríà, tó fẹ́ ka fi orúkọ bo òun ní àsírí sàlàyé pé kò sí ohun tó burú nínú àbá náà, orílẹ̀èdè Nàíjíríà ni yóò dènà irúfẹ́ àwọn èèyàn tí yóò ní ànfààní sí èròjà igbó.

Àmọ́ èyí tó wù kó jẹ́, ó yẹ kí á se ohun gbogbo ní ìwọ̀n tunwọ̀nsì.